Titus 1

¹Miyo, Paulo epottha ya Muluku ni murummwa a Yesu Kristu. Miyo kootthanliwa ni koorummwa wira kaakhaliheryeke waamini waya ale athanliwe ni Muluku ni kaasuweliheke yaawo ekeekhayi enruuha oreera murima.

²Waamini ni osuwela onruuha onroromelo y'ekumi ehinimala, yeeyo Muluku ororomelinhaly'awe ohootthaka okhuma khalayi olimwenku ohinatthi opattuxiwa.

³Nto vaphialyaya okathi aya, owo oohooniherya masu awe muhina w'olaleya w'aka weiwo kirummw'aka ni Muluku, Moopoli ahu.

⁴Miyo kinoolepelani nyuwo Tito, mwan'aka a ekeekhayi muhina moowaaminini mw'ahu, neemerenry'ahu vamosa. Mahala ni murettele anrwa wa Muluku Tiithi, ni Kristu Yesu, Moopoli ahu akhale ni nyuwo.

⁵Miyo koohiyaleni oKereta wira mmalelihe muteko waahanle ovara, ni mwaatthapele makhulupale anrowa ohoolelaka mutelo w'aKristu wa khula muttetthe, muttharihelaka ntoko siwiixuttihaly'akani.

⁶Mwamphwanya mutthu ohirina mulattu wala itampi, mulopwana orina muthiyana mmosa paahi, orina an'awe animwaamini Muluku nave ehinaanyheriwa ni makhalelo oowaakanyereya, wala ehikhanle oohiiwelela.

⁷Okhala wira mukhulupale aKristu ovahereriwe okhapelela muteko wa Muluku, Owo ohaana okhala mutthu ohirina mulattu wala itampi: Mutthu oowiisoona, wala oowaakuva onanariwa, wala namuhapaliwa, nnakhala oowali, wala ophwanya musurukhu wo waatta ohivanrya'ya muteko.

⁸Vano owo akhaleke mutthu oniwaakhela oratta-ene aletto, onsiveliwa ni sooreera, orina miruko, axariya, ooreera murima, owiisuumaaliha.

⁹Akhaleke mutthu onttharihela ni nthiti Ehapari y'Ekekhayi ntoko sixuttihiw'anyu wira alipiheke murima akhw'awe, aatthonyeryaka mwiixuttiho wooreera, aavanyihaka ale anvirikanya mwiixuttiho wooreera.

¹⁰Tthiri akhala atthu anci-ene: Ntoko nikhuru n'aYuta ninlipiherya olya masoma paahi ahiniiwelela, ni anlavula soohiloka, aniwoototha akina.

¹¹Awo muhaana waamaaliha, okhala wira annipwetexa itthoko sinci-ene, yiixuttihaka itthu soohiloka, yiirelaka wira ephwanyeke musurukhu ohivaryaya muteko.

¹²Hata Profeta mmosa wa yaawo oohimya wira: ?Atthu a oKereta mahiku othene anihimya soowootha paahi, awo inama sootakhala, ni t'onyonyiwa, awo anuupuwela olya paahi.?

¹³Tthiri owo oohimya ekeekhayi. Tivo, mwaapwapwele n'ikuru s'anyu, wira yeetteleke oratta-ene waamini w'ekeekhayi.

¹⁴Ni wira ehitthareke ithale s'Ayuta hata ikano s'atthu anikhoottha ekeekhayi.

¹⁵Ale ooreera murima, itthu sothene ti sooreera; vano ale ari ootakhala murima ni ahinaamini kiivo etthu yooreera. Okhala wira ankhili aya ni mirima saya soonanarihiwa.

¹⁶Awo annihimya wira annimusuwela Muluku, nto ariki miteko saya ti soomukhotta yoowo. Awo t'ophweeliha ni t'ohiiwelela, ni t'ohileleya, nnakhala khanwerya wira etthu yooreera.