2 Timothy 4

¹Kinnootumereryani vanci-ene vamaithoni va Muluku ni v'Apwiya Yesu Kristu yoowo ontthuna walamula atthu akumi n'ale akhwiye muhina wa orwa wawe ni muhina wa omwene awe,

²wira mulaleye masu a Muluku, mwaathipeleliheke, okathi aya hata woohikhala okathi aya, mwaavaanyiheke, mwaapwapweleke, mwaatumereryeke nwixuttihaka ni murima w'ovilela,

³okhala wira onoophiya okathi atthu ahinrow'aya otthuna wiiwa mwiixuttiho wooreera, siiso owaruni onrowa waaneenaka, yiithukumanyeryeke awiixuttihi anihimya itthu sinaasivela wiiwa,

⁴ni anookhootta wiiwa ekeekhayi etthareka ihantisi soohiloka.

⁵Nto nyuwo mukhaleke oowiisumaaliha mwa itthu sothene, nvileleke ohaawa, nvareke muteko wa namalaleya, nvareke muteko wa Muluku woomalela.

⁶Maana miyo kihanle vakhaani wiiviwa, nihiku nintthun'aka okhwa nri vakhiviru.

⁷Koowana ekhotto yooreera, koomaliherya muteko aka, koosuka waamini.

⁸Vano, koosukeriwa ekhara ya xariya, yeeyo Apwiya anlamula ni xariya antthun'aya okivaha nihiku noolamuliwa, nto khanrowa okivaha miyo paahi, animwaavaha-tho y'ale aniphenta orwa wawe.

⁹Mpaveleke orwa okiphwanya voohilekela

¹⁰okhala wira Temasi ookinyanyala, mwaha woophenta itthu sa olumwenk'ula, khuvenya arowaka oKalasia, nave-tho Tito oovenya arowaka oTamalisia.

¹¹Luka paahi tuhanle ni miyo. Mmukuxe Marku mmurwaane, okhala wira onoowerya okikhaliherya mmutekoni mwaka.

¹²Nave-tho koomuruma Tekiku orowa wEfesu.

¹³Mwaarw'aka muruuhe ekaapa kihiyaly'aka oTrowate, owanny'awe Karpu, n'ilivuru, vanci-ene-xa iye silempwe musapalani.

¹⁴Mulipa oohana, Alexantre ookirela sootakhala sinci-ene, Apwiya amulive ntoko vamphwanel'awe miteko sawe.

¹⁵Nyuwo-tho mwiipasoopeke ni yoowo, okhala wira oovirikanya vanci-ene moolumo ahu.

¹⁶Khaavo okikhalihenrye okathi wapacery'aka wisaakiha, ohiya vo, atthu othene aakinyanyala, itthu sene seiyo Muluku aalevelele.

¹⁷Nto Apwiya yaahikhala ni miyo, khukivaha ikuru, wira mwa miyo emaliheriwe olaleiwa Ehapari Yooreera ni amalapo othene yiiwe Ehapar'iyo, vano-tho kihaakihiwa mwaano mwa kharamu.

¹⁸Nave Apwiya anookaakiherya miteko sootakhala sothene, ni anookoopola wira ekikelihe moomweneni mwaya wirimu, yaawo avahiwe nttittimiho wa mahiku othene.

¹⁹Mmukhomase Priska n'Akila n'atthu a etthoko y'Onesiforo.

²⁰Erasto ohanle oKorinto, nave Trofimu kimuhiyale oMileto awereiwaka.

²¹Mphavele orwa ehinatthi ophiya eyiita, Eupulo ni Putensi ni Lino ni Klautia n'axinna akina othene annookhomasani.

²²Apwiya Yesu Kristu akhale ni erooho anyu. Mahala akhale ni nyuwo othene. Amen!