2 Timothy 3

¹Musuweleke wira, mahiku ookiserya onimoorwa okathi w'oxanka,

²okhala wira anookhala atthu anrowa wiiphentaka mmansaya, atthu a milili, oowittottopa, atthu oowisoona, ooveeha, atthu ahiniwiiwelela atiithi aya ni amam'aya, atthu oohixukhuru, ahinimuttittimiha Muluku,

³atthu oohiphenta, atthu ahinaataaniheya, atthu oowootherya akhw'aya, oohisumaaliha, atthu ootakhala mirima, awanani a itthu sooreera,

⁴alipa-oowoka, atthu oothipelela, oowiisoona, atthu oosiveliwa itthu sooreera sa vathi ohiya opatthana ni Muluku,

⁵atthu oowooneya ntoko atthu oothunku, nto anookhootta owerya waya. Nyuwo atthu yaawo muheettaneke.

⁶W'atthu akina a yaawo, tiy'awo anikela mmaitthokoni, nave khuyaakuxa athiyana amasikhini ookhweya murima, oosareya itampi, yaawo aneettihiwa n'itthu sinaasivela soonanara.

⁷Mahiku othene anivira yiixuttaka nto annooceela osuwelexa ekeekhayi

⁸nave ntoko Yane ni Yampere yaahinvaanya Monse nave-tho awo aannivaanya ekeekhayi, khuyakhala atthu oopahuwa ankhili ni oorimeeliwa waamini.

⁹Awo khanikelela ohoolo, okhala wira ololo aya onoosuweliwa n'atthu othene, ntoko vaamwiiranenly'awe Yane ni Yampere.

¹⁰Nto nyuwo munnitthara mwixuttiho aka, muttharihelaka inamuna sookhala, soowuupuwela, waamini, ovilela, ophenta ni nthiti,

¹¹olupatthiwa n'uhaawa weiwo waakikhumelenle w'Antiyokiya ni w'Ikoonio n'olistra, kaahitepa olupatthiwa, nto Apwiya aakaakiherya olupatthiwa wothene.

¹²Nave-tho, y'ale othene antthuna okhala mwa Kristu Yesu ekhalanaka othunku anoophwanya olupatthiwa.

¹³Nto atthu ootakhala murima ni oowootha anoovira etepaka, ewootothaka akhw'aya ni yootothiwaka.

¹⁴Vano nyuwo mulipiheryeke sothene siixuttaly'anyu n'iye sikupanly'anyu, musuwelaka xeeni yiixuttenly'anyu.

¹⁵Nave-tho okhuma enamwane anyu munnisuwela Soolempwa sa Muluku, seiyo sinwerya wovahani ankhili, oowoophwanyihani woopowa, mwaha w'omwaamini Kristu Yesu.

¹⁶Soolempwa sothene, suupuxeriwe ni Muluku sinnivareliwa muteko wira siixuttiheke saavanyiheke ale anvonya, wira saattaruxeke ale anttheka wira silakiheryeke ephiro ya xariya,

¹⁷wira mutthu a Muluku akhale ooloka ni oolikaniheriwa oratta-ene ovara miteko sothene sooreera.