2 Timothy 2

¹Vano nyuwo mwan'aka mwiilipihe ni mahala ari mwa Yesu Kristu,

²ikeekhayi sikiiwaly'anyu kihimyaka ohoolo w'anamoona anci-ene, mwaaleele atthu oororomeleya wira y'awo-tho esuweleke owiixuttiha atthu akina.

³Tthiri muhaaweke vamosa ni miyo ntoko nakhotto oororomeleya a Yesu Kristu.

⁴Khaavo anwana ekhotto khuyasiveliwa n'itthu sihikhanle s'ekhotto, aphavelaka omusiveliha kapitawu awe,

⁵nave-tho akhala mutthu onwana ekhootto khantthuveliwa ohiwanaka ntoko simphwanel'aya,

⁶mulimi onlima mmatta ohaana okhala oopacerya olipula mihokorokho saya.

⁷Mutthokelele moolumo anoohimeeryaakani, okhala wira Apwiya animoosuwelihani itthu sothene.

⁸Mmupuwele Yesu Kristu ori a nloko na Taviti, oohihimuwa mw'alipa-ookhwa, ntoko sinihimy'aya Ehapari Yooreera enlaley'aka,

⁹Kinnihaawa kivaraka miteko mpakha otthukweliwa ntoko wira ki mutakhali, nto masu a Muluku khatthukweliwe.

¹⁰Tivo, kinnihaawa iya sothene mwaha woowaphenta ale oothanliwa, wira nave-tho awo aphwanye woopowa ori mwa Kristu Yesu, ni nttittimiho nihimmala.

¹¹Masu ala t'ekeekhayi wira: Nakhwa-ru vamosa ni yoowo, nnookhala-tho akumi ni yoowo,

¹²Nave-tho naahaawaka-ru ni yoowo nnookhala moomweneni vamosa ni yoowo,

¹³Naahiroromeleyeke, owo okathi wothene onikhala oororomeleya, khaavo oniwerya wiiruna mmansawe.

¹⁴Nwuupuxerye itthu iya sothene, mwaatumereryaka ohoolo w'Apwiya, wira ehinyakulihaneke mwaha wa moolumo, onyakulihana iwo khumphwanyiha etthu, ohikhanle wahuluxa ale aniiwa.

¹⁵Mphavele wiisooniherya wa Muluku muri-ene oororomeleya, ntoko namuteko ohinuuleliwa muru muteko awe, yoowo onlaleya oratta-ene masu a ekeekhayi.

¹⁶Nto mwaahuluweke ale oosiveliwa olavula itthu sooveeha, okhala wira anookumiherya sootakhala suulupale.

¹⁷Moolumo aya atthu awo annitharya ntoko nikhwatta na murupela, mw'atthu yaawo t'ala Himenewu ni Fileto,

¹⁸awo aahiya ekeekhayi, ehimyaka wira ohihimuwa mookhwaani woovira, siiso khuhonona waamini w'atthu anci-ene.

¹⁹Varokhalaru siiso, malitti a Muluku annikhala oolipa, nakhalaru neemexeryo nla: Apwiya annasuwela atthu ari awaya, nave mutthu ti mutthu onromola nsina na Kristu, ahiyeke sootakhala.

²⁰Vano, etthoko yuulupale, khenikhala mihasa sa wero ni sa eparatha paahi, nave-tho sinnikhala sa miri ni s'oloko, mwa seiyo sikina sinlyelyiwa mahiku malupale ikina sinlyelyiwa mahiku oohikhala malupale.

²¹Siiso-tho, akhala mutthu oniireeriha mwa itthu iya, onookhala muhasa wa nihiku noottittimiheya, ooreerihiwa ni oophwanela wira orumeeliweke n'Apwiya, ni oolikaniheriwa ovara muteko wothene wooreera.

²²Nave-tho muhuluweke soosivela s'emiravo, vano mweetteleke exariya, ni waamini, n'uphenta ni murettele vamosa n'ale anavekela Apwiya ni murima wooreera,

²³nave mukhootteke ovaanyihana wohiloka, ohinkhuma etthu, musuweleke wira ovaanyihana iwo onikumiherya owana-wana.

²⁴Vano murumeyi a Apwiya khivanimureerela owana-wana, nto akhaleke oowimaaliha eriyari y'atthu othene, asuweleke wiixuttiha, n'uvilela.

²⁵Awiixuttiheke ni murima w'omaala ale anivaanya, siiso Muluku atthunaka wavaha okathi w'orukunuxa murima, wira asuwele ekeekhayi,

²⁶ni atthukule-tho mai-tho, yiitaphulaka miraakho sa Satana, yoowo aavanre aakhanyererihaka wira s'atthun'aya.