2 Timothy 1

¹Miyo Paulo murummwa a Yesu Kristu, n'utthuna wa Muluku, kittharihelaka ekumi yaalaiheriw'ahu eri mwa Kristu Yesu,

²kinoolepelani nyuwo Timotiyo mwan'aka onimphent'aka wira: Mahala ni othunku, ni murettele onikhuma wa Muluku Tiithi ni onikhuma wa Kristu Yesu, Pwiy'ahu.

³Kinnimuxukhuru Muluku yoowo kinimurumeel'aka n'ankhili ooreera okhuma okathi w'axitiithi aka, okathi wothene kinniwuupuwelani nyuwo mmavekeloni mwaka.

⁴Kuupuwelaka maithori anyu, kinnitthuna vanci-ene owoonani wira kisareye opuha.

⁵Kinnuupuwela waamini woohootha ori mwa nyuwo, weiwo woopaceryani waarin'aya apiip'inyu Loite n'ame anyu Eunisi, weiwo kinkupaly'aka wira waamini weiwo ori mwa nyuwo.

⁶Tivo, vaniwuupuxeryaakani wira mukhapelele yoovaha ya Muluku erin'anyu vawiixaathenryaakani mata'aka,

⁷okhala wira Erooho ya Muluku enivahaly'awe khennikhaliha woova, ohiya vo Munepa eyo enninivaha ikuru, n'uphenta, n'upixa murima.

⁸Tivo muhuuleliwe muru omulaleya Pwiy'ahu, hata muhuuleliwe muru mwaha wa miyo, kitthukiwe ni yoowo, nto muhaaweke vamosa ni miyo mwaha w'Ehapari Yooreera mwiilipihaka n'uwerya wa Muluku,

⁹yoowo onooponle ni oniihanenle okhala ooreera murima, kahiyo mwaha wa miteko sahu, masi mwaha w'otthuna wawe ni mahal'awe nivahiw'ahu mwa Kristu Yesu ohinatthi opattuxiwa olumwenku.

¹⁰Vano mahal'awo annooneya n'urwa wa Moopoli ahu, Yesu Kristu, Yoowo omalinhe okhwa khunimwaleela muthuko w'ekumi ohinintta muhina w'Ehapari Yooreera.

¹¹Ti yeeyo okikhalihaly'awe mulaleyi ni murummwa ni mwiixuttihi a amalapo.

¹²Nave-tho, mwaha wa itthu seiyo, miyo kinihaawel'aka, nto nkinuuleliwa muru okhala wira koomusuwela yoowo omwaaminni aka ni kinnikupali wira owo ookhalana owerya wokikhaliherya muteko ovahereriw'aka mpakha nihiku noolamuliwa.

¹³Mutthareke saana mwiixuttiho wooreera mukiiwaly'anyu, mweettelaka waamini n'uphenta ori mwa Kristu Yesu.

¹⁴Musukeke mwiixuttiho w'oreera n'uwerya wa Erooho Yooreera enikhala mwa hiyo.

¹⁵Nyuwo munnisuwela wira ale anikhala w'Asia othene aya aakinyanyala miyo, mw'atthu awo aahikhala Fixelo ni Hermonexes.

¹⁶Apwiya amorele ikharari etthoko ya Onesiforo, maana ookilipiha murima imaara sinci-ene ni khoonenle ehaaya otthukweliwa waka,

¹⁷ohiya vo vaaphiyaly'awe oRooma aahikiphavela mpakha okiphwanya.

¹⁸Apwiya anvahe omoreliwa ikharari nihiku nlo noolamuliwa, nyuwo munnisuwela saana okathi waakikhalihery'awe w'Efesu.