1 Timothy 6

¹Othene ale ari ipottha yaatiitiimiheke m'apwiy'aya ntoko simphwanel'aya, wira nsina na Muluku, ni mwiixuttiho awe ohiveehiwe.

²Nave ipottha s'axineene oowaamini ehaathanyeke, mwaha wookhala axinna, ohiya vo, evareke oratta-ene muteko, okhala wira atthu anaavarel'aya muteko atthu oowaamini ni oophentiwa.

³Akhala mutthu oniixuttiha mwiixuttiho mukina, wovirikana ni moolumo a ekeekhayi a Apwiy'ahu Yesu Kristu, ni mwixuttiho w'oreera,

⁴mutth'uwo t'owiisinnuwiha ni khonsuwel'etthu, masi onninyakula ophavelaka ovaanyihana n'unyakulihana, siiso vannikhumelela nrima, onyakulihana, oveehana, soowaanyiherya sootakhala,

⁵owanawana w'atthu oopahuwa ankhili ni ahinsuwela ekeekhayi, anuupuwela wira nttittimiho ninniphwanyiha muhakhu.

⁶Nto nttittimiho n'usiveliwa itthu siniir'awe t'ureeriwa wuulupale.

⁷Okhala wira nrw'aka moolumwenkuni khiivo eruuhaly'ahu, ni vannisuweliwa wira naakhumaka-mu khaninwerya okuxa etthu.

⁸Tivo, naakhalanaka yoolya n'etthu y'owiikhuneela nitteeliweke murima n'iseiyo.

⁹Nto ale antthuna okhala thaaciri annimorela moottehiwani ni muntaphani, ni mwa soowunlela sinci-ene soololo ni sootakhala, seiyo sinaasamiha atthu moopweteyani n'unyaanyiwa.

¹⁰Okhala wira ophenta musurukhu ephattuwelo wa soonanara sa khula enamuna, ni mwaha woophavelaxa muhakhu akina aahiya waamini khwiisariha mmansaya ni masooso manci-ene.

¹¹Vano nyuwo mutthu a Muluku, mutthyaweke itthu iya, mweetteleke exariya, ni nttittimiho ni waamini, n'uphenta, ni nthiti ni omaala.

¹²Nwaneke ekhotto yooreera yo waamini, wira mphwanye ekumi ehinimala y'eyo yiihaneliw'anyu, okathi moonihenry'anyu waamini wanyu w'oreera vamaithoni v'anamoona anci-ene.

¹³Kinoorumani vamoithoni va Muluku, yoowo onvaha ekumi itthu sothene ni vamaithoni va Kristu Yesu, yoowo aahimmye onamoon'awe wooreera ohoolo wa Ponsiyo Pilato,

¹⁴mwiiweleleke y'oruma ela n'uroromeleya muhinanarihaka etthu, mpakha wooniheriwa w'Apwiy'ahu Yesu Kristu,

¹⁵Owo waphiya okathi awe onomoniherya, ole ori ooreeriwa ni ori Pwiya mmosaru oowerya, Mwene a mamwene ni Pwiya a mapwiya.

¹⁶Owo paahi tohinikhwa, owo onikhala orukureriwe-ene ni muthuko yoowo oohinattameleya. Khaavo mutthu onwenhe nnakhala onwerya onweha, yoowo akhale oottittimihiwa n'uwerya wa mahiku othene. Amen!

¹⁷Mwaahimeerye mathaaciri a itthu solumwenk'ula wira ehiisooneke hata ehiroromeleke mihakhu seiyo sihinlekela, nto emuroromeleke Muluku yoowo onnivaha itthu sothene voowaatta, wira nipuheke seiyo,

¹⁸yiireke sooreera, ethaaciriki ni miteko sooreera, evaheke ni murima wooreera ni elavuleke oratta-ene n'atthu.

¹⁹Wira yiithukumanyerye mmansaya muhakhu wooreera ohoolo onkel'aya, wira awerye ophwanya ekumi ehinimala.

²⁰Nyuwo Timotiyo musukeke ele ehiyeriw'anyu, muhuluwaka moolumo oololo ni oonveha Muluku, n'unyakulihana mwaha woosuwela woowootha.

²¹Akina yaatthanre masuwelelo yaawo oowootha aahiya waamini. Mahala akhale ni nyuwo Amen!