1 Timothy 5

¹Muhaapwapwele n'uwali atthu oowuuluvala, masi mwaatumereryeke ntoko asitiithi anyu, amiravo ntoko axinn'inyu,

²athiyana oowuuluvala mwaatumereryeke ntoko aximai anyu, imwali ntoko axirokorinyu n'owuumaala vanci-ene.

³Mwaattittimiheke athiyana anaamukhweli y'ale v'ekeekhayi ari anaamukhweli.

⁴Nto yakhala athiyana anaamukhweli arina anamwane wala axisuulu aya, awo epaceryeke toko wiixutta waattittimiha amusi aya ni waakhaliherya yaakhapelelaka yaawo, ntoko awo sikhapeleliw'aya n'axitiithi aya, ti etthu enimusivela Muluku.

⁵Vano muthiyana ori namukhweli v'ekeekhayi ni ohikhalanne mutthu oomukhaliherya onnimuroromela Muluku ni onnikhalela nthiti oxonttela ni mavekelo othana n'uhiyu.

⁶Nto muthiyana namukhweli oniivahererya wa sooreera s'elapo, owo ohookhwa hata nlelo okhalaka.

⁷Nyuwo mwaatumererye itthu iya wira athiyan'awo akhaleke a xariya.

⁸Vano akhala mutthu ohinimuthokorerya mmusi awe vanci-ene-xa a vatthokoni vawe, mutth'uwo oohiya waamini nave owo t'otakhala murima onvikana mutthu oohaamini.

⁹Ahilempwe namukhweli muthiyana ahiphiyenrye iyaakha miloko mithanu na mosa, nave yoowo aatheliwe ni mulopwana mmosa paahi.

¹⁰Arina mweettelo wooreera ntoko walela oratta-ene an'aya, owaakhela oratta-ene aletto yakhala wira yaanarapiha inawu atthu ooreera murima, yaakhala wira yaahaakhaliherya alipa-oohaawa, yakhala wira yaaneettela miteko sothene sooreera.

¹¹Nto muhaakhalihe anaamukhweli athiyana oohuuluvala, okhala wira awo onimwaaphiyerya okathi wootthuna otheliwa, amuhiyeke Kristu.

¹²Vano awo anookhala oolamuliwa, mwaha woohiya waamini woopacerya.

¹³Ohiya vo, nave-tho anniixutta weetteetta etthoko t'itthoko ehiir'aka etthu, ohiya okilaathiru ehiiraka etthu, nave-tho waasivela olavulasa moolumo a elolo n'uphavela osuwela myaha s'axineene, elavulaka moolumo oohiphwanelela.

¹⁴Tthiri, kintthuna wira ale ari imwali khukhala namukhweli, etheliweke, y'ayareke anamwane yeettiheke itthoko saya, ni ehaaphwanyihe awanani okathi w'owapa.

¹⁵Okhala wira athiyana mweemusini mwawe anaamukhweli akina aahiya waamini, khumutthara Satana.

¹⁶Akhala muKristu orina anaamukhweli athiyana, aakhapeleleke, ahivahe muteko munci-ene Ekerexa, wira Ekerexa eweryeke waakhaliherya anamukhweli ahirina mutthu oowaakhapelela.

¹⁷Mahumu anisuwela wettiha oratta-ene muteko wa Muluku aniphwanela ottittimihiwa vaalupale, vanci-ene-xa ale anivara muteko woolaleya masu ni wiixuttiha,

¹⁸okhala wira Soolempwa sinnihimya wira: ?Muhitthuke eyano y'enyompe eninyakela inuku.? Nave namuteko oniphwanela olinvwa.

¹⁹Muhikupali sinihimyaniwawe muhooleli ehikhanle ele enihimyaniwawe n'anamoona anli wala araru.

²⁰Ale anttheka maapwapweleke ohoolo w'atthu othene, wira akina yooveke.

²¹Kinnootumereryani ohoolo wa Muluku ni n'uhoolo wa Yesu Kristu ni w'ankelo oothanliwa wira mutthareke moolumo ala muhimuthanlaka mutthu muhiiraka etthu vahixariy'aya-vo.

²²Muhimwiixatherye matata mutthu muhinatthi osuwela murimawe, hata muhirave itampi s'atthu akina, mukhalaneke mukhalelo wooreera.

²³Nave-tho muhiwuryeke maasi-ru paahi, nwuryeke eviinyu vakhaani, mwaha wa nipwiipwi nanyu ni mwaha woowereiwaka imaara sinci-ene.

²⁴Itampi s'atthu akina soosuweliwa ohinatthi ophiya okathi w'ophukiwa nave itampi ikina sinsuwanyeya numala ophukiwa.

²⁵Siiso-tho soowiira sooreera sinnooneya nave soowiira sihinsuwenyeya khasinwerya wiipithihiwa.