1 Timothy 4

¹Nto Erooho ennihimya voohiipithiha wira: Mahiku ookiserya atthu akina anookhootta waamini, yiiweleleka minepa soowootha ni miixuttiho sa Satana,

²anookuxiwa n'uwoka w'atthu anihimya soowootha, yaapahaka ankhili aya,

³anookhottiha othela hata otheliwa, anooruma okhoottiwa soolya seiyo Muluku aapattuxenry'awe atthu oowaamini, n'ale ansuwela ekeekhayi, wira awo elyeeke emuxukhuruku Muluku.

⁴Maana itthu sothene sipattuxiwe ni Muluku ti sooreera, nave khiivo etthu erin'ahu othanya, n'akhelaru n'omuxukhuru Muluku,

⁵okhala wira soothene sinreerihiwa muhina wa Masu a Muluku n'uvekela.

⁶Nyuwo mwawiixuttihaka axinna moolumo ala, munookhala murumeyi oororomeleya a Yesu Kristu, muupiwaka ni moolumo oowaamini ni mwiixuttiho wooreera oneettel'anyu.

⁷Nto mukhootteke ihantisi sooveeha n'itthu sihimphwanelela vano mulipiheryeke mukhalelo w'omoriwa ikharari.

⁸Okhala wira miteko sinikhoomaliha erutthu efait'aya eri vakhaani, nto omoriwa ikharari wookhlana efaita mwa sothene okhala wira onniroromeliha ekumi ya vano, n'ile yoohoolo.

⁹Moolumo ala t'ekeekhayi ni oophwanela waakhuleliwa voomalela.

¹⁰Tthiri hiyo ninnivara muteko niwanaka, okhala wira nimmulipelela Muluku mukumi, yoowo okhanle Moopoli a atthu othene, vanci-ene-xa atthu oororomela.

¹¹Itthu iya mwaatumererye atthu ni nwiixuttiheke.

¹²Ahikhale onothanyani mwaha wookhala mmiravo, nto mwaakhalele nthoonyeryo aKristu, muhina wa moolumo anyu ni mweettelo anyu, n'uphenta wanyu, muroohoni mwanyu, ni waamini wanyu ni wiisumaaliha wanyu,

¹³mukhaleleke nthiti osoma, otumererya ni wiixuttiha, mpakha miyo ophiya weiwo.

¹⁴Muhithanye yoovaha eri mwa nyuwo, yeeyo nvahiw'anyu, ntoko saahimwaly'aya nave mahumu khuwiixaatheryani matata.

¹⁵Muupuweleleke itthu iya, muthokoreryeke seiyo, wira mweettelo anyu wooreera wooniweke n'atthu othene.

¹⁶Mwiipasoopeke mmansinyu n'iye sinixuttih'anyu, mukhaleleke nthiti seiyo, maana mwiira siiso munimwiisoopola mmansinyu hata ale aniwiiwani animoopowa.