1 Timothy 3

¹Moolumo ala t'ekeekhayi, akhala mutthu omphavela muteko w'epixupu, muteko wooreera tumphavel'awe.

²Tthiri pixipu ohaana okhala mutthu a xariya, mulopwana a muthiyana mmosa, akhaleke oowehaweha, oowiphimela, ooreera murima, oosiveliwa owaakhela aletto ni asuweleke owiixuttiha atthu,

³ahikhaleke namuhapaliwa, nnakhala oowali hata ophavelexa muhakhu nnakhala namilili, nto akhaleke oopixa murima,

⁴Onsuwela weettiha oratta-ene etthoko awe, akhalanaka an'awe oowiiwelela ni wiisumaaliha wothene,

⁵okhala wira mutthu ohinsuwela weettiha etthoko awe, onrowa owerya sayi okhapelela Ekerexa ya Muluku?

⁶Ahikhaleke a naanaano wira ahiittottopeke aphwanye ehukhumu ephwanny'awe Satana.

⁷Nave-tho ohaana okhalanaka mweettelo wooreera vamaithoni v'ale ahimorele mmurakhoni mwa Satana.

⁸Siiso-tho matiyakono ahaana okhala atthu ooreera murima akhaleke a ekeekhayi akhaleke atthu ahimphavela muhakhu voohixariya,

⁹yeetteleke ekeekhayi yo waamini ni murima wooreera,

¹⁰nave-tho ehinatthi othanliwa epaceryeke owehiwa, numala wooniwa okhala atthu a xariya, ethanliweke muteko woorumeela.

¹¹Siiso-tho athiyana ekhaleke ooreera murima, ehikhaleke oowapa, ekhaleke oowiisumaaliha ni oororomeleya mwa sothene.

¹²Matiyakono ekhaleke alopwana a muthiyana mmosa, ni asuweleke oweettiha oratta-ene an'aya n'itthoko saya.

¹³Okhala wira ale anvara oratta-ene muteko w'etiyakono anniiphwanyiha nttittimiho nooreera, n'inroromelo n'ulupale noowaamini nrin'aya mwa Kristu.

¹⁴Kinnoolepelani nyuwo epaphelo ela, kiroromelaka orowa wowehani voohilekela.

¹⁵Nto kaapisaka, epaphelo ela enimoosuwelihani inamuna soophwanelela weetta mpaani mwa Muluku, eri Ekerexa ya Muluku mukumi, nivatta ni nlipiheryo n'ekeekhayi.

¹⁶V'ekeekhayi esiiri ya nttittimiho n'ulupale, wira: Owo ohiisooniherya ntoko mutthu, khukhalihiwa naxariya ni Erooho oowehiwa n'ankelo, oolaleiwa eriyari y'amalapo, khwaaminiwa moolumwenkuni ni khuwelihiwa wirimu ninttittimiho.