1 Timothy 2

¹Ehinatthi khul'etthu, kinnootumereryani wira mwiireke mavekelo, mwaavekelelaka atthu othene mwaaxonttelaka n'umuxukhuru Muluku.

²Mwaavekeleleke mamwene ni makhulupale othene, wira nikhalaneke mukhalelo woomaaleleya ni wa murettele mwa nttittimiho ni mukhalelo wooreera.

³Okhala wira itthu ila ti yooreera, ennimusivela Muluku, Moopoli ahu,

⁴Owo ontthuna wira atthu othene yoopowe, ni esuwele ekeekhayi,

⁵Maana Muluku ori mmosa paahi ni mulipa-oolapelela eriyari ya Muluku n'atthu, ori mmosa paahi, mutthu-ene yoowo ti Yesu Kristu.

⁶Owo oovaha ekumi awe mwa esisapo yoowoopola atthu othene, wira akhale xaahithi okathi aya.

⁷Vano miyo kookhalihiwa mulipa oolaleya ni murummwa ni mwiixuttihi a ekeekhayi ni waamini, a nloko n'amalapo. Nave nkinootha, kinihimya ekhweeli.

⁸Tthiri, kintthuna wira atthu avekeleke, mapuro othene, evenxeke matat'aya ooreera, woohinanariwa hata woohivaanyihana.

⁹Siiso-tho kinnatumererya athiyana wira ewareke ikuwo ntoko vamphwanel'aya, ewareke oratta-ene voohuuliha muru, ehiiphwaneliheke n'utthava ikharari, nnakhala ni maniya a weero wala ni maluku oowaarya hata n'ikuwo soreeraxa,

¹⁰nto yiireeriheke ni miteko soreera ntoko simphwanel'aya athiyana anivara muteko woomurumeela Muluku.

¹¹Okathi aniixuttihiw'aya athiyana ekhaleke oomaala ni wiiwelela waya wothene.

¹²Nkinahiya athiyana wixuttiha, hata omuruma iya-ya, nto awo ekhaleke oomaala,

¹³Maana Atamu t'upacenrye opattuxiwa, numala khupattuxiwa Hawa.

¹⁴Atamu kahiyo t'otothiwe, nto muthiyana tootothiwe, vootothiw'awe aahimorela mootthekani,

¹⁵Vano muthiyana onimoopowa mwaha wookhala maama, aakhalelakaru nthiti wiisuumaliha, waamini, ophenta n'ureera murima.