1 Timothy 1

¹Paulo murummwa a Yesu Kristu orummwaka ni Muluku, moopoli ahu ni Yesu Kristu ororomela wahu,

²kinnimulepela Timotiyo mwan'aka a ekeekhayi moowaaminini, mahala, n'umoriwa ikharari ni murettele onikhuma wa Muluku, tiith'ihu ni wa Yesu Kristu, Pwiy'ahu.

³Ntoko soovekenly'akani okathi waaveny'aka kirowaka oMasetonia, wira muhale w'Efeso, wira mwaahiihe atthu akina, wira ehiixuttiheke miixuttiho mikina,

⁴hata ehitthareke ihantisi wala maloko ahinikisa, seiyo sinikumiherya ovaanyihana ohiya okhaliherya okelela ohoolo muteko wa Muluku, yoowo onooneya ni waamini.

⁵Koorumakani siiso, kimphavela wira mphentaneke ni murima wooreera, n'ankhili ooreera ni waamini w'ekeekhayi.

⁶Aakhala akina ahiyale ephiro ela, khuyeetta evaanyihanaka ithiru.

⁷Awo aniikhaliha awiixuttihi a ikano, nto khansuwela sinihimy'aya hata iye sinlavul'aya.

⁸Hiyo noosuwela wira ikano sa Monse ti sooreera naattharakaru ntoko vanreerel'aya.

⁹Vano nisuwele wira ikano sa Monse khasinaakhalela anaxariya, nto iyo sikhalihiwe mwaha w'ale ahikhanle anaxariya, ahinleeleya, atthu ootakhala murima ni anatampi, alipa ooveeha, alipa ahineettela itiini, ale aniwiiva atiith'aya wala amam'aya wala akhw'aya,

¹⁰sikhalihiwe mwaha w'anamuttompe ni w'ale anrupihana alopwanaru, mwaha w'ale anaakuxa atthu, ni mwaha w'anawoothe, ni mwaha w'ale anlaphela soowootha ni mwaha w'ale anvirikanya mwiixuttiho wooloka.

¹¹Ti siiso siniixuttih'aya Ehapari Yooreera ya nttittimiho na Muluku oreeriwa weiwo kivahereriw'aka.

¹²Miyo kinnimuxukhuru Yesu Kristu Pwiy'ahu yoowo onikilipiha, okhala wira ookiweha okhala oororomeleya, khukikhaliha murumeyi awe,

¹³yomo khalayi kaari nanveehi ni namalupattha, ni mulipa oohaaxa, nto vano koophwanya omoreliwa ikharari, okhala wira kaahiira kihisuwelaka, kihinatthi waamini.

¹⁴Vano mahala a Apwiy'ahu aatepa okaattela, vamosa ni waamini n'uphenta ori mwa Yesu Kristu.

¹⁵Masu ala toororomeleya ni toophwanela waakhuleliwa voomalela, wira Yesu Kristu orwiiye moolumwenkuni-mu, wira awoopole atthu oottheka, wa yaawo miyo kikhanle oopacerya.

¹⁶Tivo, koophwanya omoreliwa ikharari, wira mwa miyo kiri oopacerya ottheka, Yesu Kristu ooniherye ovilela wawe wothene, wira kikhale nthoonyeryo w'atthu ale antthuna omwaamini wira ephwanye ekumi ehinimala.

¹⁷Vano Mwene oohimala, ohinkhwa, ni ohinooneya, Muluku mmosaru, attittimihiwe ni avuwihiwe wa mahiku othene. Amen!

¹⁸Mwan'aka Timotiyo moolumo ala kinoorumani yenyu, kittharihelaka moolumo a Muluku yaahimeeriw'anyu khalayi, mwiilipihaneke yaawo nwanaka ekhotto yooreera.

¹⁹Mweetteleke waamini n'ankhili ooreera, akinaku yaahikhootta weettela seiyo, khuhonona waamini waya,

²⁰Mwa yaawo ti Himeneyo n'Alexantere, awo kihaavahererya Satana, wira yiixutte ohinveeha Muluku.