2 Thessalonians 3

¹Vookiserya, axinn'aka, munivekeleleke hiyo, wira masu a Apwiya yaakuve omwaramwareya ni ekhaleke oottittimihiwa, nave-tho ntoko sikhumelenly'aya eriyari anyu.

²Wira nikhale oowakihiwa w'atthu oohononeya ni ootakhala murima maana kahiyo atthu othene animwaamini.

³Nto Apwiya t'ororomeleya, awo animoolipihani ni anoowakihani mutakhali.

⁴Nimookupalini nyuwo, vamaithoni v'Apwiya, wira seiyo siniir'anyu nlelo munamwiira ntoko soorumaly'ahuni.

⁵Vano Apwiya yeettihe mirima sanyu moophentani wa Muluku n'uvilela wa Kristu.

⁶Axinn'aka ninnootumereryani ni nsina n'Apwiya Yesu Kristu, wira muheettaneke axinna othene aneetta voohiloka ni ahinttharihela mwixuttiho wa ikano siwiixuttihaly'ahuni.

⁷Okhala wira nyuwo mwaaxineene munnisuwela inamuna soonitakiha, nave miyo nkirale etthu yoonanana eriyari anyu.

⁸Wala nkinatoko olya mahaya yoolya ya mutthu, ohiya vo naanivara muteko n'ukukhumuwa, nivaraka muteko ohiyo n'uthana wira nihimuukhule mutthu nnakhala mmosa a nyuwo.

⁹Kahiyo wira naarina owerya, wira munitakiheke.

¹⁰Okhala wira okathi waary'ahu ni nyuwo naahorumani eyo, wira akhala mutthu ohintthuna ovara muteko, nave-tho owo ahilyeeke.

¹¹V'ekeekhayi nihiwa wira akhala akina eriyari anyu aneetta voohiloka, anihiya ovara muteko, khuniira itthu s'ethiru.

¹²Atthu ene yaawo, tthiri ninnoorumani ni wotumereryani, mwa nsina n'Apwiy'ahu Yesu Kristu, wira evareke muteko ni murettele, elyeeke yooly'aya ekukhumuwenly'aya.

¹³Vano nyuwo axinn'aka muhooceyeke wira sooreera.

¹⁴Nto akhala mutthu ohiniiwelele nuulumo nahu mpapheloni akhale mekhawe, wira uuliwe muru.

¹⁵Varookhalaru siiso muhimukhalihe ntoko nwanani, nto munvaheke miruku yoowo ntoko munn'inyu.

¹⁶Vano Apwiya a murettele, yoovaheeni murettele okathi p'ukathi wa inamuna sothene. Apwiya ekhale ni nyuwo othene.

¹⁷Makhomaso ala anrwa wa miyo Paulo, kilempe ni ntata naka nlo, enthonyiherya wa khula epaphelo aka enlipaaka.

¹⁸Mahala a Apwiy'ahu Yesu Kristu ekhale ni nyuwo othene. Amen!