2 Thessalonians 2

¹Vano axinn'aka, mwaha w'orwa wa Pwiy'ahu Yesu Kristu ni mwaha w'othukumana wahu ni yoowo, ninnoovekelani nyuwo,

²wira muhuukhuwe naanaanova siiso wa osuwela wanyu, hata muhuukhuwe, nnakhala mwa muroohoni, nnakhala mwa nulumo, nnakhala muhina mwa epaphelo ntoko sinoolepel'ahuni, muhuukhuwe okhalaka ntoko nihiku n'Apwiya nri vakhiviru.

³Ahikhale mutthu oniwootothani okhala wira nihiku nlo khanimphiya ohipacenrye toko okhumelela okhoottiwa waamini ni wiisooniherya wa mutakhali, mwaana a orimeela.

⁴Owo onookhootta ni onoovirikanya itthu sothene sa Muluku wala sinikokhoreliwa, mpakha orowa okilaathi ntoko Muluku, mpaani mwa Muluku, aphavelaka wiilikanyiha ni Muluku.

⁵Khamunuupuwela wira kaahohimeeryani itthu iya okathi, vaary'aka ni nyuwo?

⁶Vano nyuwo munnisuwela etthu enimukhottiherya, wira waphiya okathi awe akhumelele.

⁷Okhala wira owerya wotakhala onivira ovaraka muteko aya, vano ori mmosa paahi ole onimukhoottiherya, aanahale wooneya mpakha owo okumihiwa-vo eriyar'iyo,

⁸okathi yoowo onimooniheriwa mutakhali, yoowo Apwiya anoompwetexa n'iphumu sa mwaano mwaya, anoomaliha ninttittimiho na orwa waya,

⁹nave orwa iwo, onrowa otthariheliwa ikuru sa Satana, n'uwerya wawe wothene wookumiherya ithoonyeryo ni sootikiniha ni miiriirya soowootha.

¹⁰Owo onookumiherya sootakhala sothene wira awootothe ale ampweteya, okhala wira aakhootta waakhela ophenta w'ekeekhayi wira yiisoopole.

¹¹Tivo, Muluku onimwaahiya eweriwaka ni wootha, wira yaaminiki itthu sihikhanle s'ekhweeli.

¹²Wira elamuliwe y'ale othene ahaaminni ekeekhayi, nto ansiveliwa itthu sootakhala.

¹³Axinn'aka oophentiwa n'Apwiya, hiyo nihaana omuxukhuru Muluku okathi p'ukathi mwaha wa nyuwo, mwaha woothanliwa ni Muluku okhuma woopaceryani, muthanleliwaka woopowa, mureerihiwaka ni Erooho Yooreera ni waamini w'ekeekhayi,

¹⁴mwiihaneliwe mwaha w'Ehapari Yooreera yoolaleenry'akani, wira mukaweliwe nttittimiho n'Apwiy'ahu Yesu Kristu.

¹⁵Siiso axinn'aka mulipiherye waamini ni mutthareke oratta-ene ikano siixuttihiw'anyu ni masu hata n'ipaphelo ahu.

¹⁶Vano Pwiy'ahu Yesu Kristu mmansawe ni Muluku Tiith'ahu, yoowo oniphentale ni onivahale ohakalalihiwa woohimala wa mahala n'uroromela wuulupale,

¹⁷muhakalalihe mirima sanyu ni yoolipiheni wa moolumo othene ooreera ni miteko sanyu.