2 Thessalonians 1

¹Miyo Paulo ni Silivano ni Timotiyo ninnoolepelani nyuwo atthu a Ekerexa y'oTesalonika muri atthu a Muluku, Tiith'ihu ni aPwiy'ahu Yesu Kristu.

²Mahala ni murettele onikhuma wa Muluku, Tiith'ihu, ni onikhuma w'Apwiya Yesu Kristu okhale ni nyuwo.

³Axinn'aka okathi p'ukathi ninnimuxukhuru Muluku mwaha wa nyuwo ntoko yoophwanelela, okhala wira waamini wanyu onnitepa wuncerereya, nave ophenta wa khula mutthu a nyuwo eriyari ya mukina ni mukhw'awe onnincererya.

⁴Tivo, hiyo ninniittottopa mwaha wa nyuwo eriyari ya Ikerexa sa Muluku, mwaha wa nthiti ni waamini wanyu, ni mwaha w'olupatthiwa ni maxakha othene munvilel'anyu.

⁵Iyo sinnooniherya vanlakani wira Muluku ori naxariya onoophuka, wira mukhale oophwanelihiwa okela moomweneni mwa Muluku, nave-tho ti yoowo munhaawel'anyu.

⁶Tthiri, yakhalaru ya xariya ohoolo wa Muluku wira onimwaavaha aalivaka n'uhaawa ale anoohaaxani,

⁷vano nyuwo munihaawa vamosa ni hiyo, nnoovahiwa omumula, okathi antthun'aya wiisooniherya Apwiya Yesu akhuruwaka wirimu vamosa n'ankelo aya oowerya,

⁸ni malumi a mooro wira yaahukhumu ale ahinimusuwela Muluku n'ale ahiniiwelela Ehapari Yooreera y'Apwiya Yesu Kristu,

⁹awo, mwaha woohukhummwa, onimwaaphwanya opweteya ohinimala, evalaanyiwaka vamaithoni v'Apwiya n'inttittimiho n'uwerya waya.

¹⁰Nihiku nlo Apwiya animoorwa wira ettittimihiwe n'atthu aya ooreera murima wira nihiku nlo ettottopeliwe n'atthu othene aniwaamini maana nyuwo muhaamini Ehapari yoolaleery'ahuni.

¹¹Tivo, okathi p'ukathi, nave-tho, nnoovekelelaahuni nyuwo, wira Muluku ahu oophwaneliheni oKristu wiihaneliw'anyu, ni weettela saana otthuna wawe wothene n'ureera wawe murima, n'uvara n'ikuru muteko wo waamini,

¹²wira nsina n'Apwiyahu Yesu Kristu nittittimihiweke mwa nyuwo, ni nyuwo-tho muttittimihiweke mwa yoowo, nittharihelaka mahala a Muluku ahu ni a Pwiya Yesu Kristu.