1 Thessalonians 5

¹Axinn'aka khamumphavela wira mulepeliwe mwaha wa okathi uwo ni mahiku awo,

²okhala wira nyuwo mwaxineene moosuwela saana wira nihiku ninrw'aya Apwiya ninlikana n'urwa wa nawiiye, ohiyu,

³tthiri, okathi atthu anihimy'aya wira: Wokhala murettele woovareleleya, nto vaavo, tuniir'aya waarweele opweteya naanaanoru, ntoko ohaawa wa muthiyana oorupala ohanle oyara, vano, hata vakhaani khanwerya otthyawa.

⁴Nto nyuwo axinn'aka, vano khamukhanle mweepiphini, ti vo nihiku nlo nihootutuxeni ntoko nawiiye.

⁵Tthiri nyuwo othene mw'anamwane a muthuko ni anamwane oothana, hiyo khanihiyo anamwane oohiyu hata eepiphi.

⁶Tivo nihirupe ntoko atthu akina, nto nilipeleleke nikhaleke oowiisumaaliha.

⁷Okhala wira ale anrupa, anrupa ohiyu, nave ale anihapaliwa anwurya ohiyu.

⁸Nto hiyo nikhanle anamwane oothana nikhaleke oowiisumaaliha niiwarihalaka nikula na yuumo n'oowaamini, n'uphenta nto niwanre-ene nroromelo n'owoopowa ntoko ekapaseeti.

⁹Okhala wira Muluku khanthanlenle oviruwa, vano onithanlenle wira niphwanye woopowa, mwa Yesu Kristu Pwiy'ahu,

¹⁰Yoowo onikhwenle hiyo wira nikhalane ekumi n'ataanne-ene ni yoowo hata nimulipelelaka hata nikhwaaka.

¹¹Siiso mutumereryaneke mukina ni mukhw'awe nave mulipihaneke mukina ni mukhw'awe ntoko siniir'anyu.

¹²Axinn'aka ninnoovekelani wira mwaattittimiheke ale anivara muteko eriyari anyu, ale anoohoolelani mmutekoni mw'Apwiya ni anoolopolani,

¹³ni wira mwaattittimiheke vanci-ene ni waphenta mwaha wa muteko onvar'aya. Mukhalaneke murettele mukina ni mukhw'awe.

¹⁴Axinn'aka ninnoovekelani-tho wira mwaalopoleke ale ahineettela oratta-ene, mwaahakalaliheke ale oohilipa-lipa mwaalipiheke ale oolosowa ni mwaavileleke atthu othene.

¹⁵Mwiipasoope wira ahikhale onlivela sootakhala ni sootakhala sikina nto mweetteleke oreera murima, akhale mukina ni mukhw'awe ni eriyari y'atthu othene.

¹⁶Mutteeliweke murima okathi p'ukathi.

¹⁷Nvekeleke okathi p'ukathi.

¹⁸Mmuxukhuruku Muluku mwa sothene, okhala wira Muluku ontthuna siiso mwa'Apwiy'ahu Yesu Kristu wa nyuwo.

¹⁹Muhittipiheke muteko wa Erooho Yooreera.

²⁰Muhithanyeke masu anrwa wa Muluku.

²¹Nweheke sothene nto muthanleke sooreera.

²²Mutthyaweke sootakhala sothene.

²³Siiso Muluku yoowo a murettele, ooreeriheni voomalela mwa sothene. Owo akhapelele makhalelo anyu othene: Murima anyu, ni Erooho anyu ni eruthu anyu wira mphwanyiwe muhirina mulattu nihiku ninrw'awe Pwiy'ahu Yesu Kristu.

²⁴Ole owiihanneni onoomaliherya sothene okhala wira t'ororomeleya.

²⁵Axinn'aka, munivekeleleke hiyo-tho.

²⁶Mwakhomaseke axinna othene n'epeeco yooreera.

²⁷Kinnoovekelani ni nsina n'Apwiya wira mwaasomele epaphelo ela axinna othene ooreera murima.

²⁸Mahala a Apwiy'ahu Yesu Kristu akhale ni nyuwo!