1 Thessalonians 4

¹Womaliheryani waya, axinn'aka, ninoovekelani ni wotumereryani mw'Apwiya Yesu, wira ntoko siiso mwiixuttihiw'anyu ni hiyo, makhalelo ooweetta oratta-ene, siiso wira mutepeke okelela ohoolo.

²Okhala wira nyuwo munnisuwela oratta-ene ikano soovahalyaahuni ni nsina n'Apwiya Yesu.

³Maana sintthun'awe Muluku t'iya mukhale ooreera murima wira mutthyaweke onamuttompe,

⁴khula mutthu a nyuwo asuweleke omukhapelela oratta-ene mwar'awe voomureerela murima ninttittimiho,

⁵Ahikhale oniihiya akuxiwaka ni munkhela woonanara, ntoko siniir'aya amalapo ahimmusuwela Muluku.

⁶Ahikhale mutthu onimuhaaxa wala omototha munn'awe mwa itthu sikina, okhala wira Apwiya tanihukhumu itthu iya sothene, nave-tho ntoko siis'ale sipacenry'ahu woohimeeryani ni woosuwelihani.

⁷Okhala wira Muluku khaniihanenle makhalelo oonanara, nto oniihanenle wira nikhaleke ooreera murima.

⁸Tivo ole onkhootta ikano iya, khanimukhootta mutthu, onimukhootta Muluku, yoowo nave-tho, onivannhe Erooho awe Yooreera.

⁹Mwaha w'ophentana w'axinna, khamumphavela wolepelani, okhala wira nyuwo mwaxineene muhiixuttihiwa ni Muluku ophentana mukina ni mukhw'awe,

¹⁰Nave-tho ti siiso nyuwo muniwiirel'anyu axinna othene ooMasetonia wothene. Nto ninnootumereryani wira mutepeke okelela ohoolo.

¹¹Mphaveleke okhala ni murettele ni wetelela myaha sanyu, nuvara muteko ni matat'anyu, ntoko noorummyaahuni,

¹²wira mweetteke ni mukhalelo wooreera eriyari y'atthu oohaamini nave ehikhale etthu ekina emphavel'anyu. Mwaha Woohihimuwa

¹³Axinn'aka, nkintthuna wira mutikhine mwaha walipa ookhwa, wira muhiriipiweke murima, ntoko sinriipiw'aya atthu akina ahikhalanne nroromelo.

¹⁴Okhala wira hiyo naakupalikiru wira Yesu ohookhwa khuhihimuwa, siiso-tho atthu akhwiiye emwaaminiki Yesu, Muluku onimwaahihimuxa vamosa ni yoowo.

¹⁵Ninnohimeeryani itthu iya nittharihaka mwiixuttiho w'Apwiya wira: Hiyo ninrowa ohala nryeene akumi, nihiku ninrw'aya Apwiya khaninrowa wahoolela alipa-ookhwa.

¹⁶Okhala wira Apwiya yaawo anookhuruwa wirimu, n'elulu, n'insu na munkelo Arikanxo, nuruma wa nlope na Muluku, nto ale akhwiiya mwa Kristu tanrowa opacerya ohihimuwa.

¹⁷Numala, hiyo ninrowa ohala nryeene akumi, ninrowa okuxiwa vamosa n'awo nathukumanyiwe mmeekuni, nrowaka okumana n'Apwiya osulu, vano, siiso ninrowa okhalaka n'Apwiya mahiku othene.

¹⁸Tivo muhakalalihaneke mukina ni mukhw'awe ni masu ala.