1 Thessalonians 3

¹Nto kihiweryaka olipelela vanci-ene, ni muupuwelo ahu wooreera naahitthuna omuhiya mekh'awe w'Athena,

²nto naahimuruma Timotiyo, munn'ihu ni murummwa a Muluku ni mukhw'ihu onvaran'aka muteko wolaleya Ehapari Yooreera ya Kristu, wira oolipiheni ni wotumereryeni mwaha wo waamini w'anyu,

³wira ahikhale mutthu a nyuwo onrowa woceya mwaha woohaawa nno, maana nyuwo munnisuwela wira Muluku ontthuna wira hiyo nihaaweke siiso,

⁴Tthiri okathi waary'ahu eriyari anyu naahohimeeryani wira nihaana ohaaxiwa siiso siiraneiy'aya ntoko nyuwo sinsuwel'anyu.

⁵Tivo miyo vahaawenry'aka olipelela vanci-ene, kimuruma Timotiyo wira asuwelihiwe waamini wanyu, miyokaanoova wira Satana aarowa owehereryani, nto siiso muteko ahu okhala ethiru.

⁶Nto vano Timotiyo oophiya nno akhumaka wa nyuwo, khukiruhela ihaali sootteeliha murima mwaha wo waamini wanyu ni woophenta wanyu, n'inamuna sinnupuwel'anyu mahiku othene mutthunaka oniweha hiyo, ni hiyo woowehani.

⁷Siiso axinn'aka moovelavelani ni moohaawani mwahu mothene nookhala oohakalalihiwa mwaha wo waamini wanyu.

⁸Okhala wira, vano mwaakhalakaru nlelo oolipa mw'Apwiya, hiyo ninnikhala.

⁹Tthiri ninwerya sayi omuxukhuru Muluku voomalela mwaha wa nyuwo, n'upuha wothene weiwo hiyo onnitteeliha murima mwaha wa nyuwo ohoolo wa Muluku ahu,

¹⁰Ninninvekela Muluku othana n'uhiyu vohihiyererya, wira niwerye oweha owiitho wanyu ni wira nimaliherye sinihaleela mmwaaminini mw'anyu.

¹¹Muluku yoowo, ori Tiith'ihu ni Pwiy'ahu Yesu Kristu anihoolele ekwah'ahu yoorowa wa nyuwo.

¹²Nave Apwiya ewuncereryeni, ni yincererye ophenta wanyu eriyari ya mukina ni mukhw'awe ni w'atthu othene nave-tho ntoko sininuwihaahu woophentani nyuwo.

¹³Wira mulipihe mirima sanyu, wira mukhale oohittheka mwa orereera murima, ohoolo wa Muluku ahu ni Tiith'ihu, okathi ontthun'awe orwa Pwiy'ahu Yesu Kristu vamosa n'atthu othene ooreera murima.