1 Thessalonians 2

¹Tthiri nyuwo axinn'aka moosuwela oratta-ene wira kinaaruiye mahala wa nyuwo;

²Nto munnisuwela wira wopaceryani naahihaaxiwa, vanci-ene-xa oFilipu, nto Muluku aahinivaha ikuru wira nilaleye Ehapari Yooreera ya Muluku, nnamwe naawana vanci-ene.

³Maana otumererya wahu khunkhuma moowotha, hata ni muupuwelo wotakhala hata khinaaphavela omoototha mutthu.

⁴Nto okhala wira niwehiwe ni Muluku wira nivahereriwe Ehapari Yooreera nto siiso noolavula ntoko sintthun'awe Muluku, nihitthunaka wasiveliha atthu masi nimmusiveliha Muluku yoowo onisuwela mirima sahu.

⁵Ntoko nyuwo munsuwel'anyu wira khantonko olavula masu oowepesa, hata khaniphavenle wothererya milili; Muluku turi namoona.

⁶Nave khinimphavela nttittimiho na mutthu, nnakhala nawinyu hata n'atthu akina, hata nlelo naawerya mwaha wokhala arummwa a Kristu, n'amoolemelihani;

⁷vanamwi naari arummwa a Kristu, nittunaka wiira ntoko suupuwel'ahu, hiyo nihiikhaliha oomala ntoko muthiyana onaakhapelela an'awe.

⁸Siiso, hiyo nihoophentani vanci-ene vootthuna wahu naaphavela woolaleeryani nyuwo kahiyo Ehapari Yooreera paahi, naanitthuna wookawelani irooho sahu, okhala wira ninnoophentani vanci-ene.

⁹Axinn'aka, tthiri nyuwo munnuupuwela oratta-ene, muteko ahu ni okukhumuwa wahu, maana naanivara muteko ohiyu n'uthana, wira ahikhale mutthu a nyuwo onrow'ahu omukukhumula, noolaleeryakani Ehapari Yooreera ya Muluku.

¹⁰Nyuwo vamosa ni Muluku mw'anamoona mwaha wa mweettelo ahu okhala wotepaxa oreera, ni wa xariya variyari vanyu.

¹¹Nyuwo munnisuwela wa inamuna saamutumerery'ahu ni omuhakalaliha khula mmosa a nyuwo, ntoko tiithi oniwiirel'awe an'awe.

¹²Wira kiwettihekeni ni makhalelo oophwanelela ohoolo wa Muluku, yoowo oniwihanelani okela mumweneni mw'awe ninttittimiho.

¹³Siiso-tho ninnimuxukhuru Muluku vohihiyererya, tthiri, vaakhenly'anyu wa hiyo Ehapari Yooreera ya Muluku, nto muhaakhelela wohiya ntoko nsu n'atthu nto (muttharihelaka ele eri y'ekeekhayi) muhaakhelela ntoko masu a Muluku, yawo-tho anvara muteko mmurimani mwaya ale anaamini.

¹⁴Okhala wira nyuwo, axinn'aka moolikalihiwa n'aKristu a ikerexa sa Muluku seiyo oYuteya sinimutthara Yesu Kristu; nyuwo-tho moolupatthiwa n'atthu eelapo anyu ntoko awo saalupatthiw'aya n'aYuta,

¹⁵Ayuta'awo aamwiiva Pwiya Yesu ni maprofet'aya yaawo nave anninlupattha ni khanimusiveliha Muluku, ni annaavirikanya atthu othene;

¹⁶Vano anninikhoottiherya walaleerya masu oowoopola ale ahikhanle aYuta, ephavelaka wasarihela itampi siniir'aya mahiku othene, nto oviruwa wa Muluku ohaamorela yaawo mpakha wemaleloni.

¹⁷Vano hiyo, axinn'aka nromwalanaru ni nyuwo okathi vakhaani nihoonanaka, nto khanimwalanne ni murima, ninnitthuna niphavelaxaka vanci-ene oweha owitho wanyu.

¹⁸T vo, naantthuna ohokolowela wa nyuwo ekwaha emosa, otepaxa wene miyo Paulo, nto Satana ookooceeliha orwa.

¹⁹Maana nyuwo kahiyo mukhanle ororomela wahu wala opuha wala ehice yanttittimiho? Tthiri v'ekeekhayi khamuhiyo nyuwo, nave-tho ohoolo w'Apwiya Yesu Kristu nihiku ninrw'aya?

²⁰V'ekeekhayi nyuwo mukhanle nttittimiho nahu ni opuha wahu.