1 Thessalonians 1

¹Miyo Paulo, ni Silvano, ni Timotiyo, ninnilepela ekerexa eri oTesalonika, mwa Muluku Tiithi, ni mw'Apwiy'ahu Yesu Kristu, mukhalane mahala ni murettele a Muluku, Tiith'ihu, ni w'Apwiy'ahu Yesu Kristu!

²Mahiku othene ninnimuxukhuru Muluku mwaha wa nyuwo othene, ninniwuupuwelani nyuwo mmavekeloni mwahu;

³Ninnuupuwela, voohihiyererya, muteko wo waamini wanyu, muteko wa ophenta ni wa ovilela n'uroromela mw'Apwiy'ahu Yesu Kristu, ohoolo wa Muluku Tiith'ihu.

⁴Axinn'aka oophentiwa, ninnisuwela wira othanliwa wanyu ti wa Muluku;

⁵okhala wira Ehapari ahu Yooreera khephiyale wa nyuwo ni moolumo paahi, nave nto, yoolipihiwa mwa Erooho Yooreera, nave ntoko sinsuwel'anyu n'ekeekhayi yothene, mweettelo ahu eriyari anyu, mwaha w'owoophentani nyuwo.

⁶Nave nyuwo mookhalihiwa atthu antthara mweettelo ahu ni mweettelo w'Apwiya, mwaakhelaka masu a Apwiya moohaawani wuulupale, n'upuha wa Erooho Yooreera.

⁷Wa enamuna saarin'anyu mweettelo W'oreera eriyari y'atthu othene oororomeleya a oMasetonia ni w'Akhaya,

⁸okhala wira mwa nyuwo masu a Apwiya aavuwa, kahiyo oMasetoniyaru paahi ni w'Akhaya, nave-tho aavuwa mapuro othene, omwaamini wanyu Muluku woophiya mapuro othene.

⁹Okhala wira awo annihimya sawihu, wa enamuna saaphiyaly'ahu eriyari anyu n'enamuna saahiyaly'anyu amuluku a ethiru, khurukunuwela wa Muluku, wira mmurumeeleke Muluku mukina ni a ekeekhayi,

¹⁰ni munwehereryaka mwan'awe, yoowo omuhihimuxaly'awe mookhwaani, Yesu yoowo onnaakiherya oviruwa wa Muluku weiwo onoorwa.