Colossians 4

¹Nyuwo mapwiya, mwiireleke sooreera ni sa xariya ipottha sanyu. Muupuwele wira ni nyuwo-tho mookhalana Apwiy'anyu wirimu.

²Mukhaleleke nthiti ovekela, mulipeleleke, muvekelaka ni mmuxukhuruku Muluku,

³Okathi omosa-ru yoowo, munivekeleleke hiyo-tho, wira Muluku anitthukulele mukhora woolaleya masu wira nilaleye mwiriira wa Kristu, yoowo miyo otthukweliw'aka,

⁴Wira miyo kooniherye yoowo ntoko simphwanel'aya.

⁵Mweetteke ni miruku ohoolo w'ale ahikhanle aKristu: Muhihiye wira okathi wooreera ovire siyo.

⁶Okathi p'ukathi moolumo anyu akhaleke oreera ni ootthuneya, musuwelaka omwakhula khula mutthu ntoko vanreerelaya.

⁷Tikiko munna oophentiwa ni namuteko oororomeleya, onvaran'aka muteko w'Apwiya onimooleelani ihaali saka sothene.

⁸Miyo komuruma orwa wa nyuwo mwaha w'etthu-ene yeeyo, wira ooleeleni ihaali sahu, alipihe mirima sanyu.

⁹Owo oniholiwa ni Oneesimu, munn'ihu onimphent'ahu ni oororomeleya, ori awinyu. Awo animoohimeeryani sothene sa wenno.

¹⁰Aristarko, mpatthani aka otthukwelaniw'aka, onnoveleelihani isalamu, vamosa ni Marku, munn'awe Parnapa. Mwaha wa Marku moleeliwa: Arwa woxekuryani, mmwaakhele oratta-ene.

¹¹Yesu oniihaniwa-tho Yustu, onnookhomasani-tho. Axinn'ala paahi t'akhanle aYuta oowaamini anvaranaka muteko, evarelaka omwene wa Muluku. Awo aakihakalaliha vanci-ene.

¹²Epafara onnokhomasani, yoowo ori awinyu, ni murumeyi a Kristu Yesu, owo onnilipiherya vanci-ene ahihiyereryaka woovekelelani nyuwo wira mukhale ooreera murima voomalela ni mukhale oosareya otthuna wothene wa Muluku.

¹³Mwaha w'Epafara yoowo, kinnimukhalela onamoona wira onnohawelani vanci-ene nyuwo n'ale ari oLawotiseya ni oHiyerapoli.

¹⁴Onnokhomasani Luka, mukulukhana onimphentexaka, ni Tema.

¹⁵Mwaakhomase axinna aoLawotiseya. Mmukhomase Ninfa vamosa n'iKerexa enthukumana vate vawe.

¹⁶Mwamaliha osoma epaphelo ela, mwiire wira esommwe-tho n'ikerexa yoLawotiseya: Ni nyuwo musomeke epaphelo enkhuma oLawotiseya.

¹⁷Mmuhimeerye Arikipu wira aphaveleke omaliherya oratta-ene muteko ovahiw'awe n'Apwiya.

¹⁸Kinlepa makhomaso ala ni ntata naka, miyo Paulo. Muhiliyale wira kootthukiwa. Mahala a Muluku akhale ni nyuwo othene.