Colossians 3

¹Tivo, okhala wira moohihimuxiwa mookhwaani vamosa ni Kristu, mphaveleke itthu sa wirimu, weiwo Kristu oriy'awe nipuro na nttittimiho moono woolopwana wa Muluku.

²Muthokoreryeke itthu sa wirimu, ohiya itthu sa vathi-va.

³V'ekeekhayi, nyuwo muhookhwa: Ekumi anyu yosukiwa vamosa ni Kristu wa Muluku.

⁴Kristu t'ekumi anyu, nto okathi owo onrw'awe ni nyuwo-tho munimooniwa vamosa ni yoowo mu nttittimihoni mw'awe.

⁵Vano, muhiye mweettelo wa vathi-va: Enamuttompe, oraruwa, osiveliwa n'itthu soonanara n'uphavela seiyo, wunlela muhakhu, weiwo okhanle waakokhorela amuluku a ethiru.

⁶Mwaha wa itthu iya, t'unrw'aya onanariwa wa Muluku waamorela anamwane oohiiwelela.

⁷Vano nyuwo-tho khalayi mwaaneettela itthu seiya okathi yoowo mwaakhalel'anyu seiyo.

⁸Nto vano, mukhotteke itthu iya sothene: Esara, onanariwa, otakhala murima, waveeha akhw'inyu, moolumo ootakhala a mwaano mw'anyu.

⁹Muhotheryaneke, maana moomurula mutthu a khalayi ni miteko sawe,

¹⁰Vano nyuwo moonwara mutthu a naanaano, yoowo onirehereya wira okhalane osuwelexa ntoko mwa nlikanyiho mwa yoowo ompattunxe.

¹¹Siiso, khaavo-tho muYuta wala mmalapo, khaavo oolyihiwa masoma nnakhala oohilyihiwa masoma, khaavo khatooro nnari mulipa-oowali, khiivo epottha nnakhala ootaphuwa: Ori-vo ti Kristu. Owo t'uri sothene mwa itthu sothene.

¹²Nyuwo mw'atthu a Muluku, okhala wira Owo onnoophentani ni ohothanlani, tivo mukuxe murima wothunku, murima wooreera, woowiyeviha, woomaala ni woovilela.

¹³Nvilelaneke, mulevelelaneke imaara sothene muntthekelan'anyu. Ntoko Muluku oolevelenl'yaweni, siiso-tho nyuwo mwaleveleleke akhw'inyu.

¹⁴Wovikana sothene iya, mukuxe murima w'ophenta, weiwo ommaleliha oreera murima.

¹⁵Murettele wa Kristu wettihe mirima sanyu: Murettele owo muhihaneliwa, wira mpakane erutthu emosa paahi. Mukhale atthu ooxukhuru.

¹⁶Masu a Kristu akhaleke mwa nyuwo ni murerelo aya wothene. Mwixuttihaneke, mulakiheryaneke n'ankhili othene. Mmutthapeleke Muluku, mmwiipeleke ni murim'anyu wothene mwa Munepa, isipo ni masalimu ootthapa.

¹⁷Sothene siniir'anyu, hata ni moolumo wala ni miteko, mwiireke mu nsina n'Apwiya Yesu mmuxukhuruku Muluku Tiithi mwa yoowo.

¹⁸Nyuwo athiyana: Mukhaleke oowiiwelela aiy'anyu ntoko simphwanel'aya mw'Apwiya.

¹⁹Nyuwo alopwana: Mwaphenteke amwaar'inyu, muhahaaxeke.

²⁰Nyuwo anamwane: Nwiiweleleke atiith'inyu n'amam'inyu mwa sothene, okhala wira ela t'inasivela Apwiya.

²¹Nyuwo alipa-ooyara: Muhaanyonyiheke an'inyu, wira ehooceye.

²²Nyuwo ipottha, nwiiweleleke mapwiy'anyu a vathi-va mwa sothene, kahiyo okathi oniwoonaayani paahi, wira mwaasiveliheke atthu, Nto mwaarumeleke ni murima wowookololowa, mwaha woomova Muluku.

²³Sothene siniir'anyu, mwiireke ni murima wothene nwiireleke Apwiya, muhimwiirelaka mutthu.

²⁴Musuwelaka wira otthuveliwa onrwa wa Apwiya, ankela woovahani mpantta wookhala mukela-mpa aya. Nyuwo mmurumeeleke Kristu okhanle Pwiya a ekeekhayi.

²⁵Nto ole oniira sootakhala onimwakhela enimphwanela, okhala wira Muluku khanimuthanya mutthu.