Colossians 2

¹Vano kintthuna wira musuweleke owana wuulupale orin'aka, kowanelakani nyuwo n'atthu a oLawotiseya n'akina anci-ene yahaatonko woona ekhove aka.

²Miyo kinniwana wira mirima saya silipihiwe ni wira yaawo yataanihiweke moophentani, esariheliwe ankhili oomalela wira esuwele oratta-ene mwiiriirya wa Muluku, ori Kristu.

³Mwa Kristu yoowo sinnipithihiwa mihakhu sothene sa miruku ni s'ankhili.

⁴Kinoohimeeryani itthu iya wira muhimuhiye mutthu awootothakani ni moolumo oweepesa.

⁵Ekhweeli wira miyo kinikhala ottaiwene mwerutthuni, nto murima aka onikhala vamosa ni nyuwo, kinnitteliwa murima voosuwela wira nyuwo munniiwanana munnilipiherya omwaamini wanyu Kristu.

⁶Vano, okhala wira momwakhelela Pwiya Yesu Kristu, nanso mweetteke mwa yoowo,

⁷Mukhalane mitathaari mwa yoowo, mulipihiwaka ni mulipiheryaka waamini ntoko siixuttihiw'anyu munnuwaka voomuxukhuru Muluku.

⁸Mwipasoopeke, wira ahikhale onoowokani ni miruku soowootha, ntoko ilimalela s'atthu, attharihelaka ikhalelo s'elapo ya vathi, ohiya omutthariha Kristu;

⁹Okhala wira oMuluku wothene woomalela onikhala mw'erutthuni mwa Kristu.

¹⁰Nave-tho nyuwo muri oomalela mwa Yoowo, nave Owo muru a owerya wothene n'olamulela.

¹¹Tthiri, vapatisiw'anyu, moovithiwa vamosa ni Kristu nave moohihimuwa-tho vamosa ni yoowo, okhala wira muhaamini owerya wa Muluku, omuhihimunxe Yesu mw'alipa ookhwa.

¹²Tthiri, vapatisiwanyu, movithiwa vamosa ni Kristu, mohihimuxiwa-tho vamosa ni yoowo, okhala wira muhaamini owerya wa Muluku, omuhihimunxe Yesu mw'alipa-ookhwa.

¹³Khalayi nyuwo mwaari ookhwa-ene mwaha wa itampi s'anyu ni mwaha woohilyihiwa masoma mwerutthuni mwanyu, nto vano, Muluku ohoovahani ekumi vamosa ni Kristu, oolevelakani itampi sanyu sothene.

¹⁴Akheraka epaphelo ya sokopha sahu, yanvirikanya mwaha wa ikano. Muluku oomaliha epaphelo eyo, akhomelaka vamwiikimanyo,

¹⁵Nave, ohaarula okhulupale ni olamulela variyari v'atthu khuwooniherya yaawo vanlakani, aaxinttaka vamwiikimanyo.

¹⁶Siiso, ahikhale mutthu oniira oolamuleni mwaha wa itthu sinly'anyu ni siniwur'anyu wala mwaha wa nihiku na niira, hata mwaha wa nihiku nowooneya mweery, nnakhala mwaha wa esaapatu.

¹⁷Itthu iya ti eruku ya itthu sarowa okhumelela: Nto etthu y'ekhweli ti Kristu.

¹⁸Muhihiye mwakhiwaka woopowa wanyu n'atthu ansiveliwa n'ikano sowiyeviha wala waattittimiha ankelo. Awo annilemeliha itthu sinupuwel'aya wira ahoona, aasareya wiisoona mwaha w'osuwela waya wa vathi-va.

¹⁹Atthu siisa aavalaana ni Kristu, ori muru. Ti Kristu onlyiha erutthu ela, onikhaliha emosaru munikhomanyiwa makhuva ni misiphe, siiso, erutthu enninnuwa ntoko sintthun'awe Muluku. Okhwa ni okhala ni Kristu.

²⁰Nyuwo muhookhwa vamosa ni Kristu, muhaakiheriwa ikuru sa vathi-va: Vano munihiyerya-ni mwettihiwaka ntoko atthu a vathi-va? Awo aniira:

²¹?Muhivare etthu ntoko ela, muhilye etthu ntoko ela, muhikwannye etthu ntoko ela.?

²²Ikano iya sothene sinihimya itthu simpwetexa naanaano-ru: Iya ikano ni miixuttiho s'atthu.

²³Itthu sene seiya sinikhala ntoko itthu sa miruku, inamuna soowittittimiha mmansinyu wothererya wiiyeviha ni wiivahererya weettela etiini, vano itthu iya khasirina ikuru sooxintta makhalelo ootakhala a mutthu.