Colossians 1

¹Miyo Paulo, murummwa a Yesu Kristu votthuna wa Muluku, ni munna Timotiyo,

²ninnolepelani nyuwo ooreera murima ni axinna oororomeleya mwa Kristu munkhala OKolose, mahala ni murettele onikhuma wa Muluku Tiith'ihu okhale wa nyuwo.

³Okathi wothene ninnimuxukhuru Muluku, Tiithi awe Pwiy'ahu Yesu Kristu, noovekelelakani nyuwo.

⁴Nihiiwa ohimmwaka omwaamini wanyu Yesu Kristu ni waaphenta wanyu axinna othene aKristu

⁵mwaha wororomela musukeriw'anyu wirimu weiwo mwiiwaly'anyu khalayi ni masu a ekeekhayi a Ehapari Yooreera,

⁶yeeyo ephiyale wa nyuwo siisaale tho siphiyaly'aya mulaponi mothene mwa vathi, enniimiha muhokorokho ni enninnuwa ntoko siniir'aya mwa nyuwo, okhuma nihiku niiwaly'anyu ni musuwenly'anyu oratta-ene mahala a Muluku n'ekeekhayi.

⁷Ntoko siixuttihiw'anyu ni Epafara murumeyi mukhw'ihu yoowo wa nyuwo okhanle murumeyi oororomeleya a Kristu,

⁸yoowo-tho oonisuweliha ophenta wanyu wa muroohoni.

⁹Tivo hiyo, okhuma nihiku niiwaly'ahu ophenta wanyu nno, khannihiya woovekelelani nyuwo. Ninninvekela Muluku wira oosuweliheni oratta-ene otthuna wawe, ni wira oovaheni miruku sothene ni osuwela wa muroohoni.

¹⁰Wira mweetteke ntoko simphwanel'aya mw'Apwiya mwasivelihaka yaawo, nvaraka miteko sothene sooreera ni munnuwaka mmusuwelaka Muluku voomalela.

¹¹Kinninvekela Muluku wira oolipiheni vohihiyererya owerya wawe wuulupale, wira nweryeke ovilela sothene mpixaka murima ni otteeliwa murima.

¹²Mmuxukhuru Muluku Tiithi, oophwanyin'heni makhalelo owira mpantta wa mukela mpa wahiyeriwe atthu ooreera murima moomweneni.

¹³Owo onoopola moomweneni mwa epiphi, khunirowiha moomweneni mwa Mwan'awe omphentely'awe.

¹⁴Mwa yoowo tinnoopola ni tinnilevelela itampi.

¹⁵Owo elatarato ya Muluku ohinooneya, oopacerya mwa itthu sothene sipattuxiwe. Yoowo t'opacerya mwa sopattuxiwa sothene:

¹⁶Mwa yoowo Muluku oopattuxa itthu sothene wirimu ni vathi, itthu sinooneya n'iye sihinooneya, eyo p'iyo: Omwene n'uwerya n'utokweene ni malamulo. Muluku oopattuxa sothene mwa Kristu: Sothene sipattuxeriwe yoowo.

¹⁷Owo ookhala itthu sothene sihinatthi opattuxiwa. Sothene sinnikhala mwa yoowo.

¹⁸Owo turi muru wa erutthu ekhanle Ekerexa. Owo tokhanle ephattuwelo, ni oopacerya. Ohihimuwa mwaalipa ookhwa, ti vo okhanle awe oopacerya mwa mw'alipa-ookhwa. Tivo okhanle awe oopacerya mwa sothene.

¹⁹Okhala wira Muluku otthunne okhala voomalela mwa Kristu,

²⁰nave yoowo ookhaliha murettele muhina w'ephome awe vamwiikimanyo, mwa yoowo onnaataaniha itthu sothene, iye sa vathi va, n'iye sa wirimu.

²¹Nave ni nyuuwo-tho khalayi mwaari amalapo ni awanani mwa sowuupuwela mwaha wa sootakhala siir'anyu.

²²Nto vano Muluku ohaataana-tho ni nyuwo mwaha w'okhwa wa Yesu Kristu, wira ookhaliheni atthu ooreera murima ni oohittheka ni oohuulumeleya va maithoni va'we.

²³Vakhala-ru wira mookhalela nthiti waamini mwiithipelaka ni olipiherya, muhihiyaka nroromelo na Ehapari Yooreera yeeyo yiiwaly'anyu ni yeeyo elaleeriwe atthu othene vathi va, yeeyo-tho miyo Paulo kiry'aka murumeyi.

²⁴Vano, kinnitteeliwa murima mwaha wo woohaawelani nyuwo, ni kinnimaleliha ohaawa ohanle wa Kristu mweerutthuni mwaka mwaha w'erutthu awe eri Ekerexa.

²⁵Y'eyo miyo kikhalihiw'aka murumeyi aya, ntoko sivahiw'aka ni Muluku, wira koovareleni nyuwo, wira koolaleeryeni voomalela Masu a Muluku.

²⁶Tthiri mwiiriirya waavithiwe iyaakha ni maloko avinre, nto vano oowuupululela atthu awe, ooreera murima.

²⁷Yaawo Muluku otthunne awe wasuweliha muhakhu xeeni wa nttittimiho na mwiiriiry'ola eriyari y'amalapo, eyo p'iyo Kristu mwa nyuwo, nroromelo nanttittimiho.

²⁸Kristu yoowo t'ule onimulaleery'ahu, onimulakihery'aka khula mutthu, onimwiixuttih'aka ni miruku sothene, wira khula mutthu nimukhalihe mutthu oomalela mwa Kristu.

²⁹Ti yeeyo envarel'aka muteko, kiwanaka n'uwerya wa Kristu, weiwo onvara muteko mwa miyo.