Philippians 4

¹Tivo, nto axinn'aka oophentiwa, mwiilipiheryeke siiso mw'Apwiya, miyo kihinkheliwa vanci-ene ni nyuwo. Nyuwo mwa otteeliwa waka murima ni wiittottopa waka, miyo kinnoophentani vanci-ene.

²Kinnoovekelani nyuwo Evotiya, ni nyuwo Santikhe kinnoovekelani wira mwiiwananeke ntoko axinna mw'Apwiya.

³Nave-tho kinnoovekelani nyuwo mwapar'aka a ekeekhayi, wira mwaakhaliheryeke athiyan'awo avanre muteko wolaleya Ehapari Yooreera vamosa ni miyo, ni Klementi ni akina yaavaran'aka muteko, yaawo masin'aya ari mulivuruni mw'ekumi.

⁴Mutteeliweke murima mw'Apwiya okathi wothene. Kinnoohimeeryani-tho wira, mutteeliweke murima.

⁵Opixa wanyu murima nwooniheryeke atthu othene maana Apwiya ari vakhiviiru.

⁶Muhuukhuwe mwaha w'etthu, p'itthu, nto sothene nyuwo mumphavel'anyu munvekeleke Muluku nave okathi wothene munvekeleke ni murima w'oxukhuru.

⁷Nave murettele wa Muluku, onivikana iye sinwery'ahu osuwela, onoosuka mirima sanyu ni muupuwelo anyu mwa Kristu Yesu.

⁸Numala axinn'aka muupuweleke paahi itthu sikhanle s'ekeekhayi ni soottittimiheya, sothene sikhanle sa xariya ni sooloka, sothene sikhanle soophenteya ni soophwanelela, sothene sikhanle sa nlema ni soottottopeleya.

⁹Mwetteleke sothene sixuttaly'anyu sa miyo n'iye sikiiwaly'anyu ni sikiwehaly'anyu miyo kiiraka, nave Muluku a murettele onookhala ni nyuwo.

¹⁰Kootteeliwa murima vanci-ene mw'Apwiya okhala wira nyuwo mookithoonyerya-tho wuupuwela wanyu wa niphento. Kahiyo wira nyuwo mwaarokiliyala, masi khamwaakhalanne okathi w'owiisooherya.

¹¹Miyo kahiyo kinihimya siiso mwaha w'othoiwa, okhala wira kihiixutta okhala ootteeliwa murima mwa sothene ni wa khula mukhalelo.

¹²Kinnisuwela okhala oothoiwa nave-tho kinnisuwela okhala ooruwerya-xa. Kihiixutta esiir'iyo, okhala wira miyo kinnitteeliwa murima okathi wothene, ni mapuro othene ni mukhalelo wothene naari kily'aka hata kivoliwaka etala, kihiixutta okhala ooruwerya-xa nnakhala okhalana vakhaani.

¹³Kinniwerya itthu sothene w'ule onikivaha ikuru.

¹⁴Tivo, nyuwo muhiira saana vatthunn'anyu ohaawa vamosa ni miyo.

¹⁵Nave-tho nyuwo aFilipi munnisuwela oratta-ene wira woopaceryani w'Ehapari, okathi vaakhumaly'aka kirowaka oMasetoniya, khiivo Ekerexa yaakikhalihenrye, Ekerex'anyu paahi tiyaakawanne ni miyo soovaha ni soowakhela.

¹⁶Maana kahiyo ekwaha emosa paahi, nyuwo mukiveleeliheryaka oTesalonika mukhaliheryo waaphiyerya wa itthu saakihaleeliha.

¹⁷Kahiyo wira kimphavela ovahiwa paahi, masi kimphavela wira muhokorokho anyu okhale woowacereriwa.

¹⁸Okathi ula miyo nkithoiwe, hata kookhalana voowaatta Epafarotito ookiruuhela soovaha sanyu, ni vano sookisareya. Soovaha sanyu seiyo siri ntoko yoovaha eninkhela ni ntoko mukuttho Muluku onaakhel'awe n'usiveliwa.

¹⁹Muluku aka onimoovahani voowaatta sothene simphavel'anyu, ottharihelaka othaaciri wawe ni nttittimiho n'awe mwa Kristu Yesu.

²⁰Attittimihiwe Muluku Tiith'ihu, wa mahiku othene. Amen!

²¹Kinnaakhomasa atthu ooreera murima othene ari mwa Kristu Yesu nave-tho axinna ari vamosa ni miyo annookhomasani.

²²Atthu othene ooreera murima annookhomasani, nto vanci-enexa ale eetthoko ya mwene Kesar.

²³Mahala a Pwiya Yesu Kristu akhale ni nyuwo othene anyu. Amen!