Philippians 3

¹Vano axinn'aka mutteeliweke murima mw'Apwiya. Miyo khivankinyoonya wohimeeryani-tho itthu seiyo s'olepenlyaakani, maana tinoolipihani nyuwo.

²Mwiipasoope n'ale aniira sootakhala, naalapwa y'awo anikhanyererya olyihiwa masoma.

³Okhala wira ale alyiiye masoma a ekeekhayi ti hiyo, kahiyo awo. Maana ninnimukokhorela Muluku neettihiwaka ni Erooho awe, nave ninniitteeliwa murima ni makhalelo arin'ahu naataane ni Kristu Yesu. Nave khaninroromela mukhalelo wa meera oolyihiwa masoma.

⁴Ekeekhayi wira miyo kaanwerya ororomela itthu seiyo, akhala-ru mutthu onuupuwela wira onoowerya ororomela meera yaawo oolyihiwa masoma miyo nlelo kookhalana-tho exariya yoowuupuwela siiso.

⁵Miyo kinnuwihiwe mahiku yaaphiyerih'aka mathanu na mararu. Ki mwIsarayeli eyareliw'aka, nihimo na Peniyamini, miyo kiyariwe n'aHeperi. Wakhala mwaha woottharihela ikano, miyo kaari nfarisi.

⁶Wakhala mwaha wookhala mulipa oothokorerya ikano, miyo kaanilupattha ekerexa. Wakhala mwaha w'okhala mulipa a exariya mwaha woowiiwelela sooruma sa ikano, khaavo aawerya okihimyana etthu.

⁷Nto iye wa miyo koon'aka okhala oreeriwa, vano kookhaliha ethiru mwaha wa Kristu.

⁸Ni vekeekhayi, nave-tho sothene kinoona okhala ethiru mwaha w'oreera omusuwela Kristu Yesu Pwiy'aka, mwaha wa Yoowo koopweteiwa itthu iya sothene nave kookhaliha ntoko itthu soowuntta, wira kiwerye ophwanya mwa Kristu.

⁹Wira kiphwanyiwe mwa Yoowo, woohikhala exariy'aka, yeeyo enikhuma mwa ikano sa Monse, masi w'ile enirwa muhina womwaani Kristu, exariya enikhuma wa Muluku mwaha wo waamini,

¹⁰Sothene miyo sintthun'aka, omusuwela Kristu n'usuwela ikuru s'ohihimuwa w'awe. Nave-tho kintthuna wira mpantta moohaawani mw'awe n'ukhala ntoko yoowo mookhwaani mw'awe

¹²Miyo nkinihimya wira vano kooxintta wala wira miyo kirookhala ooreera voomalela, nto nlelo kinnitthimaka wira kivare muteko yoowo Kristu Yesu ookivarenly'awe.

¹³Axin'aka, miyo kinoona wira nlelo nkiphwannye yeeyo, nto kinniira etthu emosa: Kinniliyala sihanle ottuli kitthimakelaka ele eri ohoolo.

¹⁴Siiso, kinnitthimakela omukanoni wira kiphwanye otthuveliwa weiwo Muluku onroromelinh'awe onivaha wirimu muhina mwa Yesu Kristu.

¹⁵Hiyo othene nniisoona okhala aKristu ookhoomala, nihaana otthokolela siiso. Nto, yakhala antthokolela moota mukina, mwa y'eyo-tho Muluku onimoomwaleelani.

¹⁶Nave nroweke ohoolo neettelaka ephiro emosa y'eyo y'ettenly'ahu mpakha vano.

¹⁷Axinn'aka mutthareke mwettelo aka neve-tho nweheke mweettelo aya ale aneettela mweettelo wooreera yoowo hiyo niwoonihenryaahuni.

¹⁸Kihoohimeeryani imaara sinci-ene nto vano kinoohimeeryani-tho kinlaka: Akhala atthu anci-ene anikhala awanani a mwiikimanyo wa Kristu.

¹⁹Emalelo aya yaawo orimeela, muluku aya t'irukulu aya, awo anniivuwiha n'itthu saya soowuuliha muru, anthokorerya itthu sa vathi-va paahi.

²⁰Nave hiyo n'atthu a wirimu nave niinninwehererya Moopoli ahu Pwiya Yesu Kristu orwa wirimu weiwo.

²¹Owo onoorukunuxa erutthu ahu enikhwa, okhalihaka siisaale erutthu awe yoottittimiheya nto wira iire siiso owo onrowa orumeela owerya wawe weiwo onweryan'awe oruma itthu sothene.