Philippians 2

¹Siiso vakhala wira Kristu onniruuha wiilipiha, vakhala wira ophenta w'awe onniruuha okurunuxa murima, vakhala wira Erooho awe enniruuha waataana ni mwaasuwelaka ophentana mukina ni mukhw'awe,

²nto mmalelihe otteeliwa w'aka murima, wira mukhalaneke wiiwanana omosaru, mukhalanaka ophenta omosaru, wiilipiha omosaru, ni mukhalelo oowuupuwela etthu emosaru.

³Ehikhal'etthu eniir'anyu mphavelaka mureerelo anyu wala ni wisoona nto mwiiyeviheke, khula mutthu awooneleke vatthu akhw'awe voowivikana mmans'awe.

⁴Ahikhale mutthu onwehexexa itthu simmureerela yoowo paahi, masi aphaveleke sinaareerela akhw'awe.

⁵Mukhalaneke muupuwelo mmosaru y'owo-tho waari mwa Kristu Yesu;

⁶Yoowo ephattuwelo awe aari Muluku, khaatthunne ovarexexa makhalelo awe yaawo wokhala alikanaka ni Muluku,

⁷Nto, vootthuna wawe owo aahihiya oMuluku awe, khwiikhaliha murumeyi, khwiilikanyiha n'atthu ni khukuxa makhalelo a atthu.

⁸Owo aahiiyeviha ni aahiiwelela mpakha okhwa, okhwa vamwiikimanyo.

⁹Tivo, Muluku oomuttittimiha vanci-ene khunvaha nsina nenlo nri noovikana masina othene;

¹⁰wira mwa nsina na Yesu akhaleke ookokhoreliwa n'itthu sothene sipattuxiwe iye siri wirimu, n'iye siri elapo ya vathi n'iye siri vathi va tthaya;

¹¹ni wira atthu othene alaleye wira Yesu Kristu ti Pwiya wira attittimihiwe Muluku Tiithi.

¹²Vano, axinn'aka oophentiwa, nyuwo mookiiwelela okathi wothene miyo vaary'aka ni nyuwo nto vano vahikhanly'aka ni nyuwo nlelo mutepeke okiiwelela. Siiso-tho mulipiheryeke woopowa w'anyu ni wiiyeviha ni woova,

¹³okhala wira Muluku t'univaha owerya mwa nyuwo hata wootthuna nnakhala wo wira muttharihelaka otthuna w'awe wooreera.

¹⁴Mwiireke sothene muhaapananaka hata onyakulihana,

¹⁵wira mukhale oohittheka ni ooreera murima, aana a Muluku, oohimulattu eriyari ya nloko nootakhala murima ni noohononeya, eriyari y'atthu awo nyuwo mwaaryeke ntoko itheneeri wirimu.

¹⁶Mwaavaheke yaawo moolumo a ekumi, siiso miyo kinimwiittottopa mwaha wa nyuwo nihiku ninrw'awe Kristu okhala wira eyo enimooniherya wira wiilipiha waka wothene ni muteko aka wothene kahiyo waari wa mahala.

¹⁷Nto, hata ephome aka yaaheliwa mukuttho woomaliherya mukuttho wo waamini wanyu, miyo kinnitteeliwa murima n'utthapa vamosa ni nyuwo othene.

¹⁸Nave ni nyuwo-tho mutteeliweke murima, mutthapeke vamosa ni miyo.

¹⁹Kinniroromela mw'Apwiya Yesu, wira kinoowerya wooveleelihani naanaano Timotiyo, wira ni miyo-tho kihakalalihiwe n'ihaali sanyu.

²⁰Okhala wira yoowo paahi toniweha vamosa ni miyo itthu sinooxankihani seiyo veekeekhayi sintthuniwa ni makhalelo anyu ooreera.

²¹Okhala wira atthu akina othene anuukhuwela sawaya nto ohiya wuukhuwela iye sa Yesu Kristu.

²²Nave Timothey'ola nyuwo moomusuwela enamuna s'onihery'awe masuwelelo awe n'enamuna sivanry'awe muteko w'Ehapari Yooreera ni miyo, ntoko mwaana ni tiithi awe.

²³Tivo Kinniroromela wira kinimoorumihelani yoowo kisuwelakaru vanrowaya omalela mulattu aka.

²⁴Ni miyo-tho kinniroromela mw'Apwiya wira kinimoorwa naanaano.

²⁵Nave-tho kihoona wira ti yoophaveleya worumihelani Epafarotito, munn'ihu onvaran'aka muteko ni onwana vamosa ni miyo mukhottoni yoowo nyuwo okirumihenly'anyu wira akikhaliherye mmihaleelihoni mw'aka.

²⁶Owo onnitthuna vanci-ene woowehani nyuwo othene, nave ohuukhuwa vanci-ene okhala wira nyuwo moosuwela wira owo aahiwereiwa.

²⁷V'ekeekhayi aahiwereiwa, nave aahanle vakhaani okhwa. Nto Muluku aahimoonela othunku yoowo, nave kahiyo y'owo-ru paahi aahikoonela-tho othunku miyo wira nlelo kihitepe oriipiwa murima.

²⁸Tivo, kinnitthuna vanci-ene woorumihelani Epafarotito wa nyuwo, wira nyuwo mmoone yoowo ni mukhale-tho ootteeliwa murima. Siiso oriipiwa waka murima onoomala.

²⁹Nto mmwaakhelele Epafarotito n'utteeliwa murima wothene, ntoko munn'ihu mw'Apwiya. Atthu ntoko yoowo mwaattittimiheke.

³⁰Okhala wira owo aahileva ekumi awe ni aahanle vakhaani okhwa mwaha wa muteko wa Kristu. Owo aahiira siiso aphavelaka okikhaliherya weiwo nyuwo mwahaarow'anyu owerya.