Philippians 1

¹Miyo Paulo ni Timotiyo, arumeyi a Kristu Yesu, ninnalepela atthu ooreera murima othene mwa Kristu Yesu anikhala oFilipi vamosa ni mapisipu ni anrumeela mukerexa.

²Mahala ni murettele onirwa wa Muluku Tiith'ihu ni onirwa w'Apwiya Kristu Yesu akhale wa nyuwo.

³Kinnimuxukhuru Muluku aka okathi wothene kiniwuupuwelelakani,

⁴Imaara sothene sinoovekelelaakani nyuwo othene, kinoovekelelani n'utteeliwa murima.

⁵Mwaha wookikhaliherya wanyu muteko woolaleya Ehapari Yooreera okhuma nihiku noopacerya mpakha olelo.

⁶Kinnikupali tthiri wira Muluku, opacenrye mwa nyuwo mutek'ola wooreera onivar'aka nlelo mpakha omaleliha, nihiku ninrw'awe Yesu Kristu.

⁷Okathi wothene miyo kinniwuupuwelani nyuwo, nave miyo kihaana exariya yowuupuwelaka siiso siniwuupuwelaakani nyuwo, okhala wira nyuwo munniira mpantta ni miyo mahal'ala Muluku okivahaly'awe. Ti'tthu nyuwo eniir'anyu vano vatthukweliw'aka, nave ti yeeyo yiiraly'anyu okathi wahaakhanly'aya etthu yookikhoottiha olaleya n'ulipiherya Ehapari Yooreera.

⁸Muluku t'uri namoon'aka wira, miyo kinnoophentani nyuwo othene, ntoko Yesu Kristu onoophentaaweni.

⁹Miyo kinninvekela Muluku wira ophenta wanyu otepeke wunnuwa nlelo n'usuwela n'ankhili othene.

¹⁰Wira musuweleke othanla etthu yooreera siiso munookhalana mweettelo wooreera ni woohaakanyereya mpakha nihiku ninrw'awe Kristu,

¹¹mweettelo anyu onoosareya miteko sa xariya seiyo Yesu Kristu sinivar'awe mwa nyuwo wira attittimihiwe ni attottopeliwe Muluku.

¹²Axinn'aka kintthuna wira musuwele wira itthu sikikhumelenle sookhweiherya okeleliha ohoolo Ehapari Yooreera.

¹³Tthiri makwaarta othene eetthoko ya kuvernatoro ni mapuro makina othene vannisuweliwa wira kitthukweliwe mwaha wookhala murummwa a Kristu,

¹⁴Siiso-tho axinn'aka anci-ene aalipihiwa murima n'Apwiya mwaha w'otthukweliwa waka, khutepa olaleya masu a Muluku n'ikuru, ehoovaka etthu.

¹⁵Ekhweeli wira akina animulaleya Kristu mwaha w'okikhalela nrima ni okinlela ehace, nto akina anilaleya ni murima wooreera,

¹⁶Ala aniira siiso voophenta okhala wira annisuwela wira Muluku ookivaha muteko w'owakiha Ehapari Yooreera.

¹⁷Akina khanimulaleya Kristu n'ikeekhayi nto animulaleya ephavelaka mureerelo aya. Awo anuupuwela wira yiiraka siiso animuncererya ohaawa waka va vatthukweliw'aka.

¹⁸Nto eyo khenikiriipiha murima, etthu enikitteeliha murima ti wira Kristu onnilaleiwa, vakhale ni myuupuwelo soonanara wala sooreera. Tivo kinnitteeliwa murima nave nlelo kinaamutteeliwa murima.

¹⁹Okhala wira koosuwela wira sothene iya sinokiruuhela woopowa muhina wa mavekelo anyu n'ukhaliheriwa onikhuma mwa Munepa wa Yesu Kristu.

²⁰Etthu emphavelax'aka n'uroromela ti wira kihuuliwe muru ni muteko aka, nto wira okathi wothene kilaleyeke kihoovaka etthu. Nave kikupaliki wira ntoko siireiy'aya okathi wothene siiso-tho okathi ula Kristu onoovuwihiwa mwa miyo, hata kikhalaka mukumi wala kikhw'aka.

²¹Tthiri wa miyo okumi aka ti Kristu nave okhwa oreeriwa w'aka.

²²Tthiri, vakhala wira okhala mwerutthuni onnikivaha mihokorokho sa muteko aka, vano nkinsuwela, etthu ekhanly'aka yothanla.

²³Nave wa ipantte soopiili kinniphunyereriwa, nto kintthunexa wira kihiye ekum'ila kakhaleke ni Kristu, okhala wira t'etthu yooreeraxa.

²⁴Nto kinoona okhala etthu yooreerelaxa, okhala nlelo mukumi mwaha wo woophentani.

²⁵Tthiri miyo kinnikupali eyo, koosuwela wira kinookhala ni nyuwo othene wira kookhaliheryeni othene anyu okelela ohoolo n'utteeliwa murima wo waamini.

²⁶Siiso vanrw'aka-tho wa nyuwo nlelo munimwiittottopa vanci-ene mwaha wa miyo, ni mwaha wa mweettelo orin'anyu mwaataann'anyu ni Kristu Yesu.

²⁷Vano, eri yuulupalexa ti wira nyuwo mweetteke ntoko simphwanel'aya Ehapari Yooreera ya Kristu. Siiso, miyo kawerya orowa okumana ni nyuwo hata miyo kihiweryaka orowa, kinimwiiwa wira nlelo munikhala oolipa ni murima mmosa. Nave-tho kinimwiiwa wira munniwanela vamosa waamini onikhuma wa Ehapari Yooreera.

²⁸Muhiwoove awanan'inyu okathi wothene mukhaleke oolipa murima ohoova nno onimwathoonyerya yaawo opweteya waya, ni onimothoonyeryani nyuwo woopowa wanyu, okhala wira Muluku tonoovahani oxintta.

²⁹Okhala wira nyuwo moovahiwa mahala mwaha wa Kristu, kahiyo mmwaaminiki yoowo paahi nave-tho muhaawaka mwaha wa yoowo.

³⁰Vano nwaneke ekhotto emosa-ru y'eyo ekoonann'anyu miyo, y'eyo vano eniiw'anyu nlelo kiwanaka.