Ephesians 6

¹Nyuwo aana, mwiiweleleke axitiith'inyu mw'Apwiya, okhala wira eyo exariya.

²Nlamulo noopacerya noororomeliha nnihimya wira: Mwattittimihe atiith'nyu n'amey'anyu,

³wira mweetteke oratta-ene ni ekumi anyu yaacereryiweke mahiku othene vathi va.

⁴Nyuwo axitiithi, muhaanyoonyiheke an'inyu; nto mwaleleke muttharihaka mwiixuttiho ni miruku s'Apwiya.

⁵Nyuwo ipottha, nwiiweleleke mapwiy'anyu a vathi va mwattittimihaka ni nwoovaka, ni murima w'ekeekhayi, ntoko Kristu.

⁶Nwiiweleleke yaawo muhiphavelaka wasiveliha paahi eri vaavo. Nto, nwiiweleleke ntoko ipottha sa Kristu, nvaraka muteko ni murim'anyu wothene votthuna wa Muluku.

⁷Mwarumeeleke mapwiy'anyu ni murima wooreera, ntoko munaarumeela Apwiya, voohikhala atthu,

⁸okhala wira nyuwo munnisuwela wira Apwiya anoomutthuvela khula mmosa mwaha wa sooreera siniir'awe, hata okhale epottha, wala okhale ootaphuwa.

⁹Nave nyuwo, mapwiya, mweettiheke oratta-ene ipottha s'anyu ntoko iyo sinoorumeelaayani. Muhoopopiheke, maana nyuwo moosuwela wira Apwiy'aya ipottha iyo t'Apwiy'anyu-tho nyuwo, yaawo ari wirimu, ahinimuthanla mutthu.

¹⁰Tivo, mulipihaneke makhuva mw'Apwiya n'owerya w'aya wuulupale.

¹¹Nwareke ikaruma sa Muluku, wira nweryeke wiilipiha mwawanaka n'olavelavi wa Satana.

¹²Siiso, ekhotto ahu khaninwana n'atthu, ninwana n'ikuru ni makhulupale, n'alipa anlamulela olumwenku wa mweepiphini, n'owerya wa minepa sootakhala siri osulu.

¹³Tivo, nware ikaruma sothene sa Muluku, wira nwerye ovilela naphiya nihiku nootakhala ni mukhale oohittikinyeya, nuumala wira itthu sothene.

¹⁴Tivo, mukhaleke oolikaneene. Mwitthukelele muyuununi esinto y'ekhotto eri ekeekhayi, ni nware vatthirimani nikula n'ekhotto eri exariya.

¹⁵Nave nware ixapattho sanyu, ori wiilikhanyiha olaleya ehapari ya murettele.

¹⁶Ohiya-tho vo, nware nikula nowiisaakihano, ori wamini, nenlo nyuwo mukhanl'anyu oowerya ottipiha mavaka othene a mooro wa mutakhali.

¹⁷Nware mmuruni ekapaseeti y'eyuuma ya woopola, ni xoowa a Erooho, yaawo ari masu a Muluku.

¹⁸Nvekeleke murohoni mw'anyu okathi wothene ni mavekelo othene oovarela metto; muheleke mmuruni mavekelo awo, nwiriyanaka oratteene ni muhihiyaka wavekelela atthu othene ooreera murima.

¹⁹Nave-tho, mukivekeleleke wira Muluku akivahe masu ooreerela, wira okathi onlavulaka, kelavuleke kihoovaka etthu ni osuweliweke oratta-ene mwiiriirya w'Ehapari Yooreera,

²⁰yeeyo miyo kiryaaka murummwa ootthukeliwa mukhatteya ni mikhoyi. Nvekeleke wira kelaleyeke ni wiilihiha ntoko sinreerelaya.

²¹Tikiku, munna oophentiwa ni epottha yoororomeleya y'Apwiya, enimoohimeeryani sothene, wira ni nyuwo-tho musuweleke mukhalelo aka ni kinvaraka.

²²Tivo, miyo kimurummy'aka yoowo orwa wa nyuwo wira musuwele ihaali saka ni wira alipihe mirima sanyu.

²³Muluku Tiithi ni Pwiy'ahu Yesu Kristu yoovaheni murettele nyuwo axinna othene mwaha w'ophenta ni wo wamini.

²⁴Mahala ekhale ni nyuwo othene munimphenta Pwiy'ahu Yesu Kristu nniphento n'ekeekhayi.