Ephesians 5

¹Nyuwo aana oophentiwa a Muluku, tivo mutthareke makhalelo awe,

²ni mphentaneke mukina ni mukhwawe ntoko Kristu oniphental'awe khwiivahererya mmansawe mwaha wa hiyo ntoko yoovaha ya mukuttho wowunkhela ohoolo wa Muluku.

³Variyari vanyu sihikhale itthu s'onamuttompe nnakhala itthu soonanara wala sa nrima. Itthu iya sothene khasinreerela okhala mw'atthu ooreera murima.

⁴Khivanreerela nyuwo olavula moolumo ahaaya nnakhala a elolo, hata moolumo oonanara, nto mulavuleke moolumo oomuxukhuru Muluku paahi.

⁵Tthiri nyuwo musuweleke wira: Khaavo namuttompe, hata oniira sootakhala, wala nanrima nnakhala ole onaakhokhorela amuluku, onrowa wakhela soohiyeryiwa sa omwene wa Kristu ni wa Muluku.

⁶Ohikhale ontthuna woowokani ni moolumo a ololo, nto mwaha wa itthu iya Muluku onnaaviruwela ale anikhala ehimwiiwelelaka.

⁷Tivo, muhikhaleke ni yaawo aniira itthu iyo.

⁸Khalayi nyuwo mwari mweepiphini, nto vano nyuwo mwa muthuko mw'Apwiya, mukhaleke ntoko aana a muthuko,

⁹okhala wira muhokorokho wa muthuko ori mwa sothene sa ooreera murima, n'exariya n'ekeekhayi;

¹⁰siiso, mwiixutteke othanla etthu enaasivela Apwiya.

¹¹Muhaataaneke n'atthu anvara miteko sa mweepiphini, sihinkumiha etthu, nto mwamwaleeleke ni muthuko anyu.

¹²Okhala wira itthu siniir'aya awo ti sa mweepiphini ni sinnuuliha muru oromola.

¹³Nto, itthu sothene saamwaleeliwaka ni muthuko, makhalelo aya annooneya oratta-ene.

¹⁴Tivo vanihimmw'aya wira: Nvenye, nyuwo munrupa. Venyani mwalipa ookhwa Kristu onimoomwaleelani.

¹⁵Mwiikasoopeke ni makhalelo anyu; muhikhaleke ntoko alolo, mukhaleke ntoko atthu a ankhili,

¹⁶mwakuveleke ophwanya mureerelo naanaano vaava, okhala wira mahiku a vano t'otakhala.

¹⁷Tivo, muhikhaleke alolo, nto mphaveleke osuwela otthuna w'Apwiya.

¹⁸Muhihapaliweke n'eviinyu, yeeyo enoopwetexani, nto musareyeke Erooho Yooreera;

¹⁹mwiipihaneke masaalimu, n'isipo sa mwiipelo a muroohoni, mwiipelaka ni mwattottopelaka Apwiya ni murim'anyu wothene,

²⁰mmuxukhurelaka Muluku Tiithi okathi wothene mwa itthu sothene, mwa nsina n'Apwiy'ahu Yesu Kristu.

²¹Muttittimihaneke mukina ni mukhw'awe, mwaha woomuttittimiha w'anyu Kristu;

²²nyuwo athiyana, mwiiweleleke aiy'anyu, ntoko Apwiya,

²³okhala wira mulopwana t'ori mukhulupale a muthiyana, siiso Kristu siry'awe mukhulupale a ekerexa, yeeyo eri erutthu awe, owo or'awe Moopoli.

²⁴Siiso ekerexa enimwiiwelel'aya Kristu, nave athiyana ahaana ewiiwelelaka asiiy'aya mwa sothene.

²⁵Nyuwo alopwana, mwaphenteke asaarinyu, ntoko Kristu ophentaly'awe ekerexa avahereryaka mwaneene mwa yeeyo,

²⁶wira akhalihe yooreera arapihaka ni maasi a opatiso ni masu awe.

²⁷Ni wira aisoonyiherye mmans'awe, ntoko ekerexa yoottittimiheya, ehirina mlepa nnakhala ninnyaari wala etthu enlikana n'itthu iya, nto ekhale yooreera ni yoohittheka.

²⁸Siiso-tho, khula mulopwana ohaana amphentaka mwar'awe, ntoko siniphent'awe erutthu awe. Ole onimphenta mwar'awe, oniiphenta mmans'awe.

²⁹Ohiya vo, khaavo mutthu otonko onyokha erutthu awe, nto onnilyiha ni onnikhapelela, ntoko Kristu oniirih'awe ekerexa,

³⁰v'ekeekhayi hiyo na mpantte w'erutthu awe.

³¹Tivo, mulopwana onimwahiya atiithy'awe n'ame awe, onarowa ophitaana ni mwar'awe, nto oowanli aya enakhala erutthu emosa pahi.

³²Mwiiriirya owo ti muulupalexa; yoowo onimooniherya Kristu n'ekerexa.

³³Tivo, khula mmosa a nyuwo nave amphenteke mwar'awe ntoko siniiphent'awe, siiso-tho muthiyana amwiiweleleke iy'awe ni nttittimiho.