Ephesians 4

¹Tivo miyo, kitthukweliwe mwaha w'Apwiya, kinnotumereryani wira mweetteleke makhalelo ooreera, yaawo yihaneliwanyu.

²Mukhaleke oowiiyeviha, ni owiisumaaliha, ni oovilela; nvilelanaka mukina ni mukhw'awe nniphento.

³Mwiilipiheke vanci-ene mphavelaka wiiwanana onvahiw'anyu ni Erooho Yooreera muhina mwa murettele yoowo onookhalihani vamosa.

⁴Eri erutthu emosa ni erooho emosa paahi, ntoko siiso olipelela nyuwo wiitthaneliw'anyu, oryaya omosa-ru paahi.

⁵Ori Pwiya mmosa paahi, waamini omosa, ni opatiso omosa paahi;

⁶Ori Muluku mmosa paahi. Tiithi a atthu othene, yoowo oniweettiha atthu othene, onivara muteko mw'atthu othene, ni ori mwa sothene.

⁷Nave khula mmosa a hiyo oovahiwa mahala, ntoko Kristu sitthunny'awe ovaha.

⁸Tivo vanihimmw'aya wira: ?Okathi owo wawenlyawe wirimu, aahaakuxa atthu anci-ene ootthukeliwa, ni aahaakawela atthu soovaha s'awe.?

⁹Vano, ?owo oowela wirimu? enihimya exeeni, ohikhanle ohimya wira owo aapacenrye okhuruwela mmapuroni ootepexa wiixerya a elapo ela ya vathi?

¹⁰Ole aakhuruwenle vathi va tiyoowo-tho owenle osulu, wirimurimu, wira asaryihe olumwenku wothene.

¹¹Nave yoowo tthiri, ohaavaha atthu akina okhala arummwa, aavaha-tho akina, okhala maprofeta, nave akina, okhala alipa oolaleya Ehapari Yooreera, akina ohaavaha okhala mukukhula, nave akina, okhala awiixuttihi,

¹²aphavelaka wira aalikanyiherye atthu a Muluku wira eweryeke ovara muteko awe, woopaka nloko na Kristu,

¹³mpakha hiyo othene ahu okhalana mwiiwanano mmosa wo waamini ni woomusuwela Mwaana a Muluku, nikhalaka atthu ookhomaala nisareyaka ni niphiyeryaka mukhalelo woomalela wa Kristu.

¹⁴Wira hiyo nihikhale-tho anamwane ooveya-veya murima, anikuxiwa n'epheyo ya khula mwiixuttiho w'atthu aniwoototha akina n'olavilavi, yaahapuxaka ephiro aya yaakelihaka moonanara.

¹⁵Ohiya vo, nittharaka ekeekhayi n'uphenta, nihaana wuunnuwa mwa inamuna sothene mpakha olikana ni Kristu, ori mukhulupale.

¹⁶Mwa Yoowo itthu sothene s'erutthu sikhomanyiwaya ni silipihiw'aya oratta-ene, khuthukumanyiwa n'itthu sothene sinrumeela yeeyo. Siso, khul'etthu y'erutthu yaavaraka oratta-ene miteko saya, erutthu yothene enninnuwa mmansaya mwa ophenta.

¹⁷Siiso nto, miyo kinnootumereryani vanci-ene mw'Apwiya, wira muheetteke ntoko sineett'aya atthu ahinaamini, yaawo antthara miruku saya soonanara.

¹⁸Awo khansuwela eniir'aya, muupuwelo aya ori mwiipiphini okhala wira awo aarekamelana n'ekumi Muluku onivah'awe, mwaha woolipa waya murima.

¹⁹Awo ohaarimeela mukhalelo wothene wooreera, khuhinoona ehaaya. Awo ahiivahererya mmansaya mwa sootakhala, khuniira itthu sothene soonanara ni soowuuliha muru.

²⁰Nto, khahiyo siiso nyuwo mwiixuttihiw'anyu ni Kristu.

²¹Tthiri, nyuwo muhiiwa sihimmwaka sa Yoowo, nave mwa Yoowo nyuwo muhiixuttihiwa meettelo, ntoko sinihimy'aya ekeekhayi eri mwa Yesu.

²²Nave mwaha wa makhalelo anyu a khalayi, nyuwo mooxuttihiwa wira mmurule mutthu a khalayi, eyo p'iyo, murule makhalelo anyu a khalayi a atthu oohirukunuxa murima, yaawo annanariha erutthu anyu ni mwaha wa soophavela s'anyu sinoowokani.

²³Murima anyu ni muupuwelo anyu ohaana okhala nsya, voomalela,

²⁴ni munware mutthu musya, eyo p'iyo, mukhalane makhalelo masya, opattuxiwe wira alikaneke ni Muluku mwa exariya ni mwa oreera murima onikhuwa mwa ekeekhayi.

²⁵Tivo, wa khula mutthu wa nyuwo, ohaana ohiyaka wootha, amuhimeeryeke ekeekhayi mukhw'awe, okhala wira othene ahu ninniira mpantte w'erutthu emosa ya Kristu.

²⁶Mwananariwa vale mwiipasoope wira muhittheke. Onanariwa w'anyu omaleke vahinatthi wiela.

²⁷Muhinvahe opuro Satana.

²⁸Ole aiya, attharuwe wiiya. Nto apacerye ovara muteko ni matat'awe, wira akhalaneke etthu yoowavaha alipa oothoiwa.

²⁹Mwaano mw'anyu muhikhume moolumo oonanara, nto akhumeke moolumo ooreera anaalipiha atthu ntoko sinreerelaya, wira ale aniwiiwani ephwanyeke oreeriwa.

³⁰Nave muhiriipihe murima Erooho Yooreera ya Muluku y'ewo otthittiw'anyu ekanyeryo ya nihiku nowoopoliwa.

³¹Murihele ottaiwene wa nyuwo makhalelo othene oowaawa, oonanariwa, oowali, ooviruwa ni ooruwana, vamosa ni sootakhala sothene.

³²Mureerelaneke murima n'umorelana ikharari mukina ni mukhw'awe, mulevelelanaka ntoko Muluku oolevelenly'aweni mwa Kristu.