Ephesians 3

¹Tivo, miyo Paulo mulipa ootthukeliwa a Kristu Yesu mwaha wo woophentani nyuwo amalapo.

²V'ekeekhayi, muhiiwa ohimmwaka mwaha wa muteko ovahiwaaka, wo woovarelani nyuwo mwa mahala a Muluku,

³eyo p'iyo, mwiiriirya wooniheriw'aka, ntoko soolepely'akani ni moolumo vakhaani.

⁴Vano mwasoma epaphelo ela, munoosuwela enamuna ensuwelaka mwiiriirya wa mwaha wa Kristu,

⁵yoowo khalayi wahaasuwelihiwe atthu a maloko makina, ntoko vano wooniheriw'aya arummwa ni maprofeta ooreera murima mwa Erooho.

⁶Mwiiriirya owo, mwaha w'Ehapari Yooreera, yeeyo amalapo amphwany'aya soohiyeriwa vamosa n'atthu a Isarayeli, atthu anloko nimosa, ni aniira mpantte munroromelihoni mwa Kristu Yesu.

⁷Mwa Ehapari ela, miyo kookhalihiwa epottha mwaha wa yoovaha ya mahala a Muluku muhina mwa muteko wo werya wawe.

⁸Kinaamwi kiri mwamukhaanixa mw'atthu othene ooreera murima, koovahiwa mahala ala oowalaleyerya amalapo muhakhu wo watta wa Kristu,

⁹ni wasuweliha atthu othene muteko onvar'aya mwiiriirya ola waipithihiwe okhuma khalayi wa Muluku, yoowo opattunxe itthu sothene.

¹⁰Siiso, Muluku aatthunne wira makhulupale ni owerya woolamulela w'osulu, asuwelihiwe miruku sinci-ene sa Muluku muhina mwa Ekerexa.

¹¹Ntoko otthuna wawe ohinimala weiwo omalihenry'awe mwa Kristu Yesu, Pwiy'ahu,

¹²mwa yoowo nrin'ahu nroromelo noomwattamela Muluku nihoovaka etthu mwaha woomwamini yoowo.

¹³Tivo, kinoovekelakani wira muhooceye mwaha woohaawa waka, koowawelakani nyuwo; ohaawa waka nttittimiho n'anyu.

¹⁴Siiso, miyo kinnikokhora ohoolo w'atiithi,

¹⁵Yaawo ari ephattu ya maloko othene a wirimu ni vathi.

¹⁶Kinninvekela Muluku mwaneene nttittimiho wira ovaheeni ikuru mwa Munepa awe wira mulipihiwe mmurimani mwanyu.

¹⁷Ni kinninvekela-tho wira Kristu okhale mmurimani mw'anyu mwaha wo waamini; ni wira, mukhale oothipeliwa ni oolipihiwa muhina moophenta,

¹⁸wira nyuwo vamosa n'atthu othene ooreera murima mukhalane owerya woosuwela, munnuwelo ni mwiixereryo ni erakamelo ni ettukhuwelo ya ophenta wa Kristu,

¹⁹wira nyuwo musuwele ophenta wa Kristu onvikana osuwela wothene, wira nyuwo musareye makhalelo omalela a Muluku.

²⁰Mwa yoowo oniira sothene mwa hiyo n'uwerya wawe, onniwerya onipakela itthu suulupalexa, sintepa ovikana iye sininvekel'ahu ni sintthokelel'ahu.

²¹Tivo, mwa yoowo attittimihiwe ni maloko othene, mukerexa ni mwa Kristu Yesu, mahiku othene! Amen!