Ephesians 2

¹Khalayi nyuwo mwahikhwa muroohoni mwaha woohiiwelela w'anyu, ni mwaha wa itampi s'anyu,

²okathi mweettela anyu makhalelo ootakhala a vathi-va, nyuwo mwamwiiwelela mukhulupale a ikuru sootakhala siri osulu, erooho y'eyo vano oniweettiha ale ahinimwiiwelela Muluku;

³Nave-tho, khalayi othene ahu: Hiyo n'atthu awo oohiiwelela, naatthara soosivela s'erutthu ahu, nittharaka saatthun'aya ni suupuwel'aya erutthu ahu. Ntoko atthu akina, hiyo naaniphwanela oviruweliwa ni Muluku.

⁴Nto, Muluku onimorela wawe ikharari ti woowatta, mwaha wooniphenta wawe wuuluupale.

⁵Owo oonivaha ekumi vamosa ni Kristu, nlelo hiyo nrye-ene ookhwa mwaha woowiiwelela wahu, nave nyuwo moopoliwe mwa mahala a Muluku.

⁶Mwa Yesu Kristu, Muluku oonihihimuxa vamosa ni yoowo, khunikelaathiha vamosa wirimu,

⁷wira mahiku anrwa ooniherye mahala oowattexa, onoonihenry'awe mwa oreera wawe murima mwa Kristu Yesu.

⁸Tivo, nyuwo moopoliwe mwa mahala a Muluku, mwaha wo wamini wanyu, nave woopoliwa iyo khunrwa mwa nyuwo, onrwa mwa yoovaha ya Muluku,

⁹ni khunrwa mwa miteko s'anyu, wira ahikhale mutthu oniittottopa.

¹⁰Okhala wira hiyo nuupiwe ni Muluku mwa Kristu Yesu, wira nivareke miteko sooreera, seiyo owo onilikanyihenry'awe khalayi wira neetteleke.

¹¹Tivo, nyuwo muupuweleke wira khalayi mwari amalapo muyariwakaru, nave mwiireliwa atthu oohilya masoma n'ale alyihiwe masoma, anlyihiwa n'atthu mulaponi,

¹²Okathi owo, nyuwo mwari atthu oovalaana ni Kristu; mwari amalapo ni khimwari a nloko na Isarayeli; nave nyuwo khimwiira mpantta ni mwataano, yoowo Muluku aaroromelinh'awe atthu awe, nave-tho nyuwo mwakhala mulaponi mu muhirina nroromelo ni muhimusuwelaka Muluku.

¹³Nto vano, mwa Kristu Yesu, nyuwo mwari oorekamelana ni Muluku khalayi, vano muhaattamelihiwa ni yoowo mwaha w'ephome ya Kristu.

¹⁴Tthiri Kristu ti murettele ahu, yoowo ootakanxale maloko manli: Ayuta n'amalapo khupaka nloko nimosa; ni omoroxale exiri yaamwalaniha, yeeyo yaari ti yaanyokhaniha.

¹⁵Yoowo omalihale ikano s'ayuta, ni malamulo aya ni sooruma saya, wira maloko awo manli khupaka nloko nimosa nsya vamosa ni yoowo, wira siiso aruuhe murettele.

¹⁶Mwa okhwa wawe vamwikimanyo, oomaliha owanawana, ootakanxa maloko manli khupaka nloko nimosa na Muluku.

¹⁷Siso Kristu ohoorwa wolaleeryani Ehapari Yooreera ya murettele, okhuma nyuwo amalapo mwari ottaiwene ni Muluku, n'aYuta yaari vakhiviiru ni yoowo.

¹⁸Tivo mwaha wa Kristu, hiyo othene: Amalapo n'ayuta nihaana owerya wookhala ohoolo w'aTiithi ni erooho emosa.

¹⁹Siiso nyuwo khamuhiyo-tho anamurwa nnakhala aletto, nyuwo mwamusi a atthu ooreera murima, atthu a nloko na Muluku;

²⁰mutekiwe mulipiheriwaka n'arummwa ni maprofeta, ni Yesu Kristu ori nipotto ninlipiha empa yothene;

²¹Mwa yoowo, empa yothene enlipihiwaya ni eneemexiwaya wira ekhale empa yooreera y'Apwiya.

²²Nave mwa yoowo nyuwo-tho munlipihiw'anyu othene vamosa, wira mukhale empa ya Muluku onikhalaaya-mo Munep'awe.