Ephesians 1

¹Miyo Paulo murummwa a Kristu Yesu, vootthuna wa Muluku, kinnaalepela atthu ooreera murima ni oororomeleya mwa Kristu Yesu anikhala w'Efeso.

²Muluku Tiith'ihu, ni Pwiy'ahu Yesu Kristu yoovaheeni mahala ni murettele.

³Attottopeliwe Muluku ni Tiith'awe Yesu Kristu, Pwiy'ahu, Yoowo onireerinhe ni mareeriho othene a muroohoni ari osulu wirimu mwa Kristu.

⁴Okhala wira Muluku oonithanla mwa yoowo olumwenku ohinatthi ophattuxiwa wira nikhale atthu ooreera murima ni oohitheka vamaithoni vawe, moophentani mwawe.

⁵Owo oonithanla okhuma khalayi wira nikhale an'awe mwa Yesu Kristu ntoko suupuwenly'awe n'otthuna wawe,

⁶wira ettittimihiwe mahal'awe, yaawo anivahaly'awe, mwa Mwan'awe omphentaly'awe;

⁷mwa Yoowo nookhalana woopowa mwaha w'ephome awe, oleveleliwa wa itampi ntoko mwattelo wa mahala a Muluku,

⁸yaawo Muluku anivahaly'awe voowaatta n'ankhili awe ni miruku sawe sothene;

⁹ni oonisuweliha mwiiriirya w'otthuna w'awe ntoko owo suupuwenl'awe opaka khalayi mwa Kristu.

¹⁰Waphiya okathy'aya itthu sothene siri wirimu n'iye siri vathi va sinrowa othukumanyiwa mwa Kristu ori muru w'ekerexa.

¹¹Mwa Kristu yoowo, hiyo noothanleliwa khalayi okaweliwa sooreera sa Muluku. Onithanlale ti Muluku, yoowo ommaliherya sothene sinuupuwel'awe ni sintthun'awe.

¹²Siiso, hiyo nipacenrye omuroromela Kristu, nikhale alipa oovuwiha nttittimiho n'awe.

¹³Nave-tho nyuwo mookhalihiwa atthu a Muluku okathi mwiiwaly'anyu moolumo a ekeekhayi, Ehapari Yooreera yeeyo yooruuhenleni woopowa mwa Kristu. Nave yowoopoliwa w'anyu; nave, nuumwamini wanyu yoowo, mootthittiwa ni Erooho Yooreera yoowo Mululu anlaihenry'awe;

¹⁴yoowo okhanle neemexeryo na soohiyeriwa sahu, mpakha woopoliwa ale ari a Muluku.

¹⁵Tivo, miyo-tho, vaiwaly'aka waamini w'anyu, mwa Yesu, ni waaphenta w'anyu atthu othene ooreera murima,

¹⁶nkinihiyererya omuxukhuru Muluku mwaha wa nyuwo, kiwuupuwelakani mmavekeloni mw'aka,

¹⁷wira Muluku a Apwiy'ahu Yesu Kristu, Tiithi a nttittimiho, oovaheeni owerya woosuwela, ni wo wooniherya osuwela wawe woomalela.

¹⁸Nave kinninvekela Muluku wira mirima sanyu simwaleeliwe, wira musuwele nroromelo nenlo owo niwiihanenlyaweni, muhakhu muulupale wa nttittimiho wahiyenryawe atthu ooreera murima,

¹⁹nave munnuwelo xeeni orin'awe ikuru soowerya onniirel'awe, hiyo nnimwamini, ntoko soowiira sinikumihery'awe n'ikuru s'owerya w'awe,

²⁰Soonihenry'awe mwa Kristu, okathi omuhihimuxaly'awe mookhwani, khumukhaliha moono awe woolopwana mapuro a wirimu;

²¹Vasulu va sothene omwene ni owerya, ni ikuru, ni olamulela ni wa masina othene anromoliwa, voohikhala paahi mahiku-ru a olelo, nave ni mahiku-tho, a muhoolo;

²²nave Muluku onvaha itthu sothene Kristu wira ahooleleke, ni oomuthanla yoowo okhala mukhulupale a itthu sothene s'ekerexa,

²³yeeyo eri nloko n'aKristu, nimmalelihiwa mwa Kristu, yoowo onsariha voomalela itthu sothene, mapuro othene.