Galatians 6

¹Axinn'aka, mwamphwanya mutthu iiraka etthu yootakhala, nyuwo muneettihiwa ni Erooho ya Muluku mmukhaliherye otthikela ephiro yooreera, mwiiraka n'upixa murima, mwiipasoope wira ni nyuwo-tho muhikhwattuliwe.

²Mutthulaneke miritti mukina ni mukhw'awe, siiso munoomaliherya ikano sa Kristu.

³Akhala mutthu oniisoona okhala etthu ariki ahikhanle etthu, owo oniimwiisoototha.

⁴Khula mutthu athokorereyeke meettelo awe, oona vale wira onniwerya wiittottopa Aittottopeke mekh'awe, nto ahiilikanyiheke n'atthu akina.

⁵Tthiri khula mutthu onookohiwa mwaha wa meettelo awe.

⁶Ole onlaleeriwa masu a Muluku amukawele ole onimulaleerya wa sooreera s'awe sothene.

⁷Muhootothiwe Muluku khaniveehiwa. Maana ele mutthu enaal'awe yeeyo tin'hep'awe.

⁸Nave ole onimisa mmakhaleloni mw'awe mootakhala onoohepha sa makhalelo yaawo eyuutte. Vano ole onimisa muroohoni onoohepha muroohoni ekumi ehinimala.

⁹Nihikhulumuwele wira sooreera, maana naahooceyeru nnoohepha waphiyerya okathi aya.

¹⁰Tivo, okathi woothene ninwery'ahu niwiireleke sooreera atthu othene otepexa wene amus'ihu ari oowaaamini.

¹¹Mooneke malepa maalupale kilempy'aka nintata n'aka nla!

¹²Ale amphavela wookhanyererihani olyihiwa masoma, t'ale aniphavela wiisooneiha oreera w'aya murima va maithoni v'atthu. Ephavelaka paahi wira esyake olupatthiwa mwaha wa mwiikimanyo wa Kristu.

¹³Atthu awo hata elyihiwe-ene masoma khaneettela ikano, awo amphavela wira nyuwo mulyihiwe masoma nto yiittottopeke mwaha w'erutthu anyu.

¹⁴Nto miyo nkintthuna wiivuwiha ohikhanle mwaha wa mwiikimanyo wa Pwiy'ahu Yesu Kristu, yoowo olumwenku okhomeliw'aya mwaha wa miyo, nave miyo kikhomeliw'aka mwaha wa olumwenku.

¹⁵Maana mwa Kristu Yesu, olyihiwa masoma hata ohilyihiwa masoma khiveetthu-vo; etthu yooreera okhala mutthu musya.

¹⁶Vano, w'atthu othene aneettela ntoko sinrum'awe mweettelo ola murettele ni omoreliwa ikharari okhale mw'awo ni okhale mwa Isarayeli a Muluku.

¹⁷Okhuma olelo mpakha onikelel'ahu ahikhale ontthuna okivela-veliha okhala wira kootthittiwa mweerutthuni mw'aka mirala sinooniherya wira keepottha ya Yesu Kristu.

¹⁸Mahala a Apwiy'ahu Yesu Kristu akhale ni nyuwo, axinna ni Erooho anyu! Amen!