Galatians 5

¹Kristu oonoopola, wira v'ekeekhayi nikhale owoopowa. Tivo, mulipiheryeke otaphuwa iwo nave muhitthikele-tho okhala ipottha.

²Miyo, Paulo, kinoohimeeryani nyuwo wira: Mwatthuna olyihiwa masoma Kristu khanoovarelani muteko.

³Kinnitthikela-tho ohimya etthu ila kiiraka: Mutthu ti mutthu ontthuna olyihiwa masoma onnivareliwa wiiwelela ikano.

⁴Nyuwo, muniphavela waataana ni Muluku mwaha woowiiwelela ikano, muhiimwalaniha ni Kristu muhiirekamihela waataana ni Muluku.

⁵Okhala wira hiyo, mwa Erooho ninlipelela nroromelo na xariya nenlo ninrwa mwaha woowaamini.

⁶Nakhala mwa kristu Yesu, khanincala okhala oolyihiwa masoma wala oohilyihiwa masoma. Emphavelawe waamini ni ophenta.

⁷Nyuwo mwaahipacerya weetta oratta-ene. T'ani oohapunxeni wira muhiiweleleke-tho ekeekhayi?

⁸Kahiyo Muluku oothoonyenrye-ni itthu iyo, v'ekeekhayi Muluku onniwiihana-ni.

⁹Miropo vakhaani sinniipiha otthu wothene!

¹⁰Nto, miyo, kinniroromela mw'Apwiya, wira nyuwo khamunrowa orukunuxa muupuwelo anyu. Tthiri Muluku, onoomuhukhumu ole onrowa woohuluxani maaru hata akhale pani.

¹¹Wa mpantt'aka, axinn'aka, muupuwelaka wira miyo nlelo kinnilaleerya olyihiwa masoma, nto kinlupattheriwa-ni? Kaari wira miyo kinlaleerya olyihiwa masoma, waaso muhupi wa okhwa wa Kristu va mwiikimanyo khiwaarowa okwattuliha.

¹²Ale animakela woohuluxani maaru ni olyihiwa masoma, fataari yaahuliwe.

¹³Vano nyuwo, axinn'aka, mwaihaneliwe otaphuwa. Nto otaphuwo iwo ohikhale ti ntthyawelo nene n'ottharihela meettelo a minkhela s'anyu. Ohiya-tho vo, kini ophenta wookhaliheryeni orumeelana mukina ni mukhw'awe.

¹⁴V'ekeekhayi ikano sa Muluku sithukumanyiwe va noolumo nimosa paahi: Mumphenteke mukhw'inyu ntoko siniiphent'anyu.

¹⁵Nto, mwiipasoope! Mwaalumanaka, ni okhuurana khunamiryana mukina ni mukhw'awe nto nweheke wira muhipwetexane.

¹⁶Tthiri, kinnoohimeeryani wira: Mweettihiweke ni Erooho nave muhitthareke sintthuna erutthu anyu.

¹⁷Maana erutthu ennivaanyihana ni Erooho, nave Erooho ennivanyihana-tho ni erutthu. Nto iya sinnivirikana ekina n'ikhw'aya. Siiso muhiireke iye sintthun'anyu.

¹⁸Vano, mwatthuna weettihiwa ni Erooho, khamunlamuliwa-tho n'ikano.

¹⁹Maana miteko s'erutthu sinnisuwanyeya ntoko iya: Oraruwa, wira itthu soohiirya, itthu soowuuliha muru,

²⁰waakokhorela amuluku a ethiru, okhwiri, onyokhana, onyakulihana, ehace, oviruwa ophavela orumeeliwa paahi, okawanyeya mwaha woohiiwanana,

²¹ohapaliwa, milili ni sikina ntoko seiya kinoohimeery'akani wira ale aniira itthu iya khanaakhela omwene wa Muluku.

²²Nto Erooho eniphwanyih'aya t'ila: Ophentana, opuha, murettele, ovilela, othunku, oreera murima, waamini, wiisuumaaliha, ohiviruwa pure.

²³Mwiiraka siiso khiivo ekano envirikanya makhalelo ala.

²⁴Atthu akhanle a Kristu aakhomela erutthu aya ni makhalelo aya n'usiveliwa w'aya n'itthu soonanara.

²⁵Naakhalaka mwa Erooho neetteke mwa Erooho y'eyo tho.

²⁶Nihiittottopeke, ni nrima, oviruxana mukina ni mukhw'awe, oronyiheryana mukina ni mukhw'awe.