Galatians 4

¹Kinnohimeeryani wira: Okathi mwaana oohiyeriwa mihakhu nlelo ari mwaamukhaani, onoolikana n'ipottha mwa itthu sothene hata akhalalaka mwaneene wa sothene.

²Ohaana okhalaka n'atthu animusuka ni weettiherya muhakhu awe, mpakha okathi waalaiheriw'awe n'atiith'awe.

³Siiso-tho hiyo. Okathi waary'ahu anamwane, neettelaka ikano sa vathi-va.

⁴Nto vano ophiyenry'aya okathi waalipeleliwa, Muluku khumuruma mwan'awe aayariwe ni muthiyana eettihiwaka n'ikano s'aYuta.

⁵Wira aataphule ale yeettihiwa n'ikano wira hiyo nikhalihiwe aana a Muluku.

⁶Voowira musuweliwe wira nyuwo mwa aana, a Muluku aahirumiha Erooho ya Mwan'awe mmirimani mw'ahu. Nave Erooho eyo enikhuwelela wira ?Abba? enihimya wira Atiithi aka.

⁷Vano, nyuwo khamuhiyo-tho epottha, nto nyuwo mwa mwaana. Nave, mwaha wookhala mwaana, nave-tho mwa mulipa oohiyeriwa a Muluku.

⁸Khalayi, nyuwo khimwaamusuwenle Muluku nave mwaari ipottha s'amuluku oohikhala a ekeekhayi.

⁹Nto vano mmusuwenly'anyu Muluku, hata, niireke vano musuweliw'anyu ni Muluku, vanikhala sayi otthikela-tho wiikhaliha ipottha sa itthu sihirina efaita ni sihintekeliwa etthu?

¹⁰Munakhala iyaakha, mahiku ni miyeeri n'ukathi nweettelaka yawo.

¹¹Kinnoova wira muteko woovarenly'akani oroohikumiha etthu.

¹²Kinnoovekelani, axinn'aka, wira mukhale ntoko miyo, siisaale miyo siikhalihaly'aka ntoko nyuwo. Kahiyo wira murookiiriha yoonanara.

¹³Muupuwele wira ekwaha kaapacenry'aka woolaleeryani Ehapari Yooreera kiira kiwereiwaka.

¹⁴Ni hata erutthu aka ewereiwaka wa nyuwo wari ottehattehiwa, nave khimwaakithannye, wala khimwaakikhoontte. Ohiya-tho vo, mwaahikaakhela ntoko namitthaka a Muluku ntoko mwaneene-ene Yesu Kristu.

¹⁵Otteeliwa w'anyu murima nto vano ori vaavi? Miyo kinniwerya omwiirela namoona wira yaari etthu eniweryaneya, nnakhala maitho anyu mwaamusyoola mukivahe.

¹⁶Vano koorukunuwa-tho khukhala nwanani anyu mwaha woowoohimeeryani ekeekhayi?

¹⁷Inamuna sinoocalayani atthu awo anoonihery'aya wira khanoophavelelani sooreera. Awo aniphavela onivalaanyiha miyo ni nyuwo, wira mweetteleke murim'aya.

¹⁸Ti yooreera othokoreriwa n'atthu akina ni murima wooreera masi okathi wothene kahiyo okathi kinikhal'aka ni nyuwo paahi.

¹⁹An'aka, vasya-tho miyo kinnihaawa mwaha wa nyuwo kinnoona owerya woolikana ni muthiyana aayaraka mpakha Kristu wuupeya mwa nyuwo.

²⁰Vamukisivela okhala ni nyuwo okathi ola wira kiwerye olavula ni nyuwo wa enamuna ekina maana nkireere wooxankelani vanci-ene.

²¹Nyuwo muntthuna weettela ikano nkakihimeeryeni mwaasuwenle etthu enihimy'aya ikano.

²²Tthiri ntoko silempw'aya wira Aparahaamu aahikhalana aana anli, mmosa aayariwe ni muthiyana aari epottha mukina aayariwe ni mutthiyana ootaphuwa.

²³Mwaan'ole a epottha aayariwe ntoko anamwane akina, vano mwaan'ole aayariwe ni muthiyana ole ootaphuwa aayariwe vathi-va muhina mwa natiri a Muluku.

²⁴Eyo etthu erina nthoonyeryo nuulupalexa athiyan'awo anli anthoonyiherya maataanelo manli a Muluku. Mamosa t'ale a omwaako Sinayi athonyiheriwe ni Hakari onaayara aana wira ekhalihiwe ipottha.

²⁵Vano, Hakari onthoonyiherya mwaako Sinayi w'Arapia nave onlikana ni muttetthe wa vano w'oYerusalemu, okhalihiwe epottha n'atthu aya.

²⁶Nto Yerusalemu a wirimu tootaphuwa nave owo ti maam'ahu.

²⁷V'ekeekhayi Soolempwa Soowarya soohimya wira: Mutthapeke nyuwo muthiyana oohiyara muhinamuyare mwaana, mukhuwele n'utthapa nyuwo muhinoone owereya w'oyara, maana muthiyana ohiiwe n'iy'awe onookhalano aana anci-ene onvikana ole nlelo onkhala n'iy'awe.

²⁸Axinn'aka, muyareliwe mwaha wa natiri a Muluku, ntoko Isakhi.

²⁹Khalayi, mwaana aayariwe moolumwenkuni-mu ntoko mwa Erooho ya Muluku. Siiso vanniiraneya-tho mahiku ala.

³⁰Nto Soolempwa Soowaarya sinihimya-ni? Moomole epottha ni mwan'aya, okhala wira mwaana a epottha kahiyo t'onrowa ohalana mihakhu s'atithi awe vamosa ni mwaana a muthiyana ahikhanle a epottha.

³¹Tivo, axinn'aka hiyo khanihiyo anamwane a epottha, n'anamwane a muthiyana ootaphuwa.