Galatians 3

¹Nyuwo oKalasiya muhirina ankhili! Ti pani owootontheni? Miyo kaahiwoohiheryani Yesu Kristu akhomeliwe va mwikimanyo.

²Vano kimphavela osuwela wira nyuwo mwaakhenle Erooho mwaha wa miteko sa ikano wala mwaakhenle mwaha woolaleeriwa waamini?

³Munikhala sayi muhikhalanaka ankhili. Mpacenrye ni Erooho ya Muluku vano muniphavela omaleliha n'erutthu?

⁴Nyuwo muhaawale mahala wa itthu sinci-ene siiraly'anyu vakhala wira itthu iyo saari sa ethiru.

⁵Muluku onoovahani Erooho yoowo oniira mitikiniho eriyari anyu owo oniira mwaha woowiiwelela sooruma sa ikano wala mwaha woowiiwelela waamini?

⁶Soolempwa sowaarya soohimya mwaha w'Aparahaamu wira: Owo aahimukupali Muluku nto, khukhalihiwa naxariya.

⁷Tivo, muhaana osuwela saana wira atthu oowaamini takhanle osuulu wa Aparahaamu.

⁸Soolempwa saahoona vahinatthi wira Muluku aarowa wakhaliha anaxariya ale ahikhanle aYuta muhina woowaamini. Siiso Muluku aapacenrye omuhimeerya Aparahaamu ehapari Yooreera.

⁹Nto Aparahaamu aahaamini khureerihiwa; vano nto othene ale anaamini anooreerihiwa vamosa ni yoowo.

¹⁰Othene aneettela ikano sa Monse anootakhaliwa, maana voolempwa wira: Ootakhaliwa t'ale ahiniiwelela sothene silempwe mulivuruni mwa ikano sa Monse!

¹¹V'ekeekhayi, mwaha woowiiwelela ikano khaavo oniwerya okhalihiwa naxariya, tthiri soolempwa soohimya wira: Naxariya onookhala mwhaha woowamini.

¹²Vano ikano khasipacenrye ni waamini, nto ole onttharihela sinrumaya onokhala mwaha wa seiyo.

¹³Kristu oonoopola mootakhaliwani mw'ahu owo khwiikhaliha mulipa ootakhaliwa mwaha wa hiyo. Vekeekhayi Soolempwa soohimya wira: Ootakhaliwa ti yoole onrowa othomeiwa va mwiikimanyo.

¹⁴Viiranen'ye siiso wira oreerihiwa waalaiheriwe Aparahaamu waaphwanye ale ahikhanle aYuta mwaha wa Yesu Kristu ni wira muhina woowaamini naakhelele Erooho Muluku yaanlaihenry'awe.

¹⁵Axinn'aka kinlavula nuulipiherya wira hata okhalaka waataana onipakiwa ni mutthu nto wamalihiwa-ru khaavo onikhoottiha wala onaacererya etthu ekina.

¹⁶Vano nto, Muluku aahaalaiherya Aparahaamu n'osuulu aya. Soolempwa khasinromola osuulu aya, okhalaka ntoko anihimmwa atthu anci-ene, nto ariwe ?osuulu anyu? ahimwaka mutthu mmosa paahi okhanle Yesu Kristu.

¹⁷Etthu enihimyaka t'ila: Waataana waahipakiwa khalayi ni Muluku, Ikano sirwiye nuvira iyaakha imiya xexe n'iyaakha miloko miraru, khasimwerya omuttipiha wala onvaanyiha natiri aaroromelihiwe.

¹⁸Nto vakhala wira yoohiyeriwa enikhuma wa ikano, siiso nroromeliho khaninrowa ohoolo; nto waari mwaha wa nroromeliho nenlo Muluku naanvahaly'awe Aparahaamu wa mahala.

¹⁹Weso ikano sikhalenleni? Ikano iyo saacereriwe mwaha wa soottheka inakhala mpakha okathi woorwa osuulu yoowo aaroromelihiwe, nave aahilaleiwa n'ankelo n'uwerya wa mulapeli.

²⁰Vano mulapeli kahiyo a mutthu mmosa paahi nto Muluku ori mmosa paahi.

²¹Eyo enihimya wira ikano inivirikanya nroromeliho na Muluku? Hata vakhaani. Maana saakumiheriwe ikano saawerya waavaha atthu ekumi, veekeekhayi exariya yaarowa orwaaka mwaha wa ikano.

²²Nto soolempwa soomahiherya sothene mwaha wa etampi, wira mwaha woomwaani Yesu Kristu, natiri uwo yaarowa ovahiwa othene ale anaamini.

²³Nto ikano iyo sihinatthi orwa, hiyo naahivariwa n'ikano seiyo, ni naari ootthukweliwa ni seiyo wira niphwanye waamini ohoolo weiwo waarowa wooniheriwa.

²⁴Wa inamuna seiyo, ikano ti saanilakiherya, mpakha orwa w'awe Kristu, wira naataanyihiwe ni Muluku mwaha wo waamini.

²⁵Nto vano ophiyaly'aya okathi wo waamini, khanniweriwa-tho ni ikano.

²⁶V'ekeekhayi nyuwo othene mwa anamwane a Muluku, muhina moowaamini, mwa Kristu Yesu.

²⁷V'ekeekhayi nyuwo moopatisiwa mu nsina na Kristu.

²⁸Ahikhale mu Yuta hata mmalapo, ni monwara Kristu epottha wala ootaphuwa, mulopwana wala muthiyana nyuwo mukhalihiwe erutthu emosa mwa Kristu Yesu.

²⁹Nto mwaari atthu a Kristu, nyuwo mwa osuulu w'Aparahaamu ni mw'atthu oohiyeriwa ntoko saaroromelinhawe.