2 John 1

¹Kinoolepelani ti miyo, humw'anyu, koolepelakani nyuwo muthiyana ootthanliwa, n'anamwan'inyu anaphentaka mw'ekeekhayi. Nave kahiyo miyo paahi kinoophentani; nave-tho-atthu othene ansuwela ekeekhayi anoophentani.

²Okhala wira ekekhayi eri mwa hiyo, ni enookhala ni hiyo wa mahiku othene.

³Mahala, ikharari, ni murettele onrwa wa Muluku Tiithi ni wa Yesu Kristu, Mwaana a Tiithi, okhale ni nyuwo mw'ekeekhayi ni moophentani!

⁴Kootteeliwa murima vanci-ene mwaha wo waaphwanya an'inyu akina yeettelaka ekeekhayi, ntoko saakhenly'ahu yooruma enikhuma w'atiithi.

⁵Nto vano nyuwo muthiyana, kinoovekelani kahiyo wira kinoolepelani mwiixuttiho wa naanaano, mwiixuttiho yoole orinaanyu okhuma woopaceryani, wira: ?Niphentaneke mukina ni mukhw'awe.?

⁶Nto ophenta ti nno: ?Nikhaleke niiwelelaka masu awe, masu yaawo yiiwaly'ahu okhuma woopaceryani, wira mweetteke moophentani.?

⁷Okhala wira anawoothe anci-ene aamwareela mulaponi. Awo annikhootta waamini wira Yesu Kristu ohiipaka erutthu. Ole onkhootta, mulipa oowoka nave-tho nwanani a Kristu.

⁸Tivo, mwiipasoopeke, wira nihipwetexe ele yiiraly'ahu ni wiilipiha nto niphwanye otthuveliwa woomalela.

⁹Ole onihiya mwiixuttiho wa Kristu ni ohiniira mpantta wa mwiixuttiho yoowo kharina Muluku, ole oniira mpantta wa mwiixuttiho yoowo, owo t'orina Tiithi ni Mwaana.

¹⁰Akhala mutthu onrwa okumana ni nyuwo, ahikhalanne mwiixuttih'ola, muhimwaakhele vate vanyu, nnakhala vakhaani omukoha murettele.

¹¹Maana ole onimukoha murettele, onniiwanana ni miteko sawe sootakhala.

¹²Nto kaahikhalana itthu sinci-ene soowoolepelani, nto nkitthunne woolepelani mpapheloni n'etinta, okhala wira kinniroromela orwa wa nyuwo nto ninrowa ovaanela niwehanaka niitho nniitho wira oteeliwa wahu murima okhale woomalela.

¹³Aana a munn'inyu oothanliwa anookhomasani. Amen!