3 John 1

¹Kinoolepelani ti miyo, humw'anyu, koolepelakanii nyuwo Kaio kinoophenta akani mw'ekeekhayi.

²Anoophentakani, kintthuna wira itthu sanyu sothene seetteke oratta-ene ni wira mwetteke okumi, siiso-tho erooho anyu ekhaleke saana;

³kootteeliwa murima vanci-ene okhala wira nuurwa axinna annihimya ekeekhayi anyu ni weettela wanyu ekeekhayi.

⁴Khiivo etthu ekina enkitteeliha murima, ntoko ela: Wiiwa ehimiwaka wira an'aka anneettela ekeekhayi.

⁵Oophentiwa, mwiireke vooreera-vo sothene iye siniiranyu, nwiirelaka axinna, hata nwirelaka amalapo.

⁶Awo eriyari ya Ekerexa anooniherya mphento anyu mmuthukumanoni mwa aKristu. Nto kinnovekelani-tho wira mwihihiye waakhaliherya weetela sooreera mpakha wumaleloni wira amusivelihe Muluku.

⁷Tthiri awo anivira elaleyaka nsina na Kristu, ehitthunaka olinvwa n'amalapo.

⁸Tivo hiyo nihaana owaakhelela atthu yaawo, wira nikhale atthu ookhaliherya mw'ekekhayi.

⁹Koolepela epaphelo ela ekerexa; Tiotrofe omphavela okhala nipuro noopacerya, awo khannakhela.

¹⁰Tivo, okathi onrw'aka weiwo, kinoohimya sootakhala sothene siniir'awe n'itthu sinnootheryawe ni moolumo ootakhala. Ni khalayi yeeyo paahi, owo onnitepa-tho, khaniwaakhula axinna ankhuma ottaiwene, hata onnaakhoottiherya akina antthuna owaakhela, nave-tho onniwoomola mukerexa.

¹¹Oophentiwa, muhitthareke yootakhala, mutthareke yooreera, ole oniwiirela sootakhala akhw'awe khaamoonne Muluku, ole oniwiirela sooreera akhw'awe, onrwa wa Muluku.

¹²Tthiri atthu othene annimuttottopela Temetrio, wa sooreera siniir'awe sinnimukhalela onamoona wooreera. Ni hiyo-tho ninnimukhalela onamoona vane nyuwo munnisuwela wira onamoon'ahu ti w'ekekhayi.

¹³Kookhalana itthu sinci-ene sowoolepelani, nto nkintthuna woohimeeryani mpapheloni-mu.

¹⁴Kinniroromela, tthiri owoonani naanaano, nto nnoolavula noonanaka nittho nnittho.

¹⁵Murettele okhale ni nyuwo. Apatthan'inyu annookhomasani. Siiso-tho mwakhomase apatthan'ihu mmosa-mmosa.