Jude 1

¹Miyo, Yuta, epottha ya Yesu Kristu ni munn'awe Yakopo, kinnoolepelani nyuwo mwiihaneliwe okhala moophentani wa Muluku Tiithi, munkhapeleliwa ni Yesu Kristu.

²Muluku awooneleni othunku, oovaheni murettele n'uphenta vowaatta.

³Anoophentaakani, kaatthunexa woolepelani n'usuwela waka woothene, mwaha wo woopowa wahu hiyo othene. Miyo kaanithunexa woolepelani epaphelo ela wira kotumereryeni ekhotto yoowanela waamini wanyu, yeeyo yaavahiwaya atthu ooreera murima khalayi.

⁴Nto akhala atthu ootakhala murima yiikelihale variyari vanyu, okhuma khalayi nave y'awo annooniheriwa wa nlamulo nenla. Atthu y'ala ootakhala murima anrukunuxa mahala a Muluku n'itthu soonanara, amukhoottaka Muluku, nave-tho amukhoottaka Yesu Kristu okhanle mmosaru oowerya ni Pwiy'ahu.

⁵Vano miyo kintthuna owuupuxeryani nyuwo musuwenle etthu ila vamosa paahi mpakha mahiku othene wira Apwiya okhuma okathi waakumin'h'aya atthu a wIsarayeli elapo ya w'Exitu awo yaahaapwetexa atthu awo oohaamini.

⁶Muupuweleke ankelo ale yahaakhapelenle eyuulupale aya, khuhiya nipuro naya: Muluku aahaasuka yaawo mweepiphini mowixa, etthukiwe-ene ni mikhoyi sihintaphuliwa-tho, aasukeryaka nihiku nuulupale ninrowaya olamuliwa.

⁷Siiso-tho enookhumela ntoko atthu a oSotoma ni ooKhomora ni a mittetthe sowaattamela. Atthu awo yaahittheka ntoko ankelo satthenky'aya. Awo yaahiivahererya onamuttompe, khutthara itthu sonanara sinvirikanya makhalelo a mutthu; awo aaheliwa ntoko ntthonyeryo, ahaawaka omooroni ohinimala.

⁸Nave-tho anamaloha ala anniveeha nttittimiho n'erutthu aya, annaavirikanya makhulupale, ni annaaveha ankelo a wirimu.

⁹Hata munkelo muulupale Mikhayeli okathi waavaanyihan'awe ni Satana ewanelaka murutthu wa Monse, khaatthunne omulamula Satana owo ni moolumo ooruwana; nto aahimuhimeerya wira: ?Muluku oohukhumuni.?

¹⁰Vano atthu ala aniveeha itthu sihinsuwelaya, nave annipwetexiwa n'itthu sinsuwelaya, maana annisuwela itthu seiyo yihuupuwelaka ntoko inama sihirina ankhili.

¹¹Awo aatakhaliwa! Okhala wira awo aatthara ephiro ya kayini, ni ephavelaka muhakhu, awo aamorela ni woototthiwa mmatatani mwa Pahaali, khupwetexiwa mwaha woowiiwelela wa Kore.

¹²Atthu awo maluku anikhumelela muniirani mwanyu noophentana. Awo annoolya vamosa ni nyuwo vonanara-vo. Awo makampusi aniikhapelela mmansiaya. Awo meeku ahirina maasi, anikuxiwa ni epheyo; awo miri s'elimwe sihirina mihokorokho, miri sookhwa vanli, ni sihirina mitathaari.

¹³Awo mawimpi oowali amphareya, ankumiha nipheru wa sonanara siniiraya so wuuliha muru; itheneeri sirimeliwe ephiro aya, wa yaawo aniwehererya oriheliwa mweepiphini yuulupale ehinimala.

¹⁴Hata Henokhi profeta mmosa wa neethanu n'enli okhuma Atamu, aahilavula wira: Mwiiwe, Apwiya animoorwa vamosa ni muttitthi munci-ene w'ankelo aya,

¹⁵wira yaalamule ni yaakupalihe atthu othene ootakhala murima mwaha wa itthu sootakhala sothene siiraly'aya ni mwaha wa moolumo othene ooruwana anatampi yaamulavulenly'aya anveehaka yoowo.

¹⁶Atthu ala alipa oowuulumasa ni oowaapa; antthara soosivela s'erutthu aya; alavulaka moolumo oowiisoona; anniwepesa atthu wira ephwanye sooreera.

¹⁷Nto anoophentakani, nyuwo muupuweleke soolaleeryaayani arummwa a pwiy'ahu Yesu Kristu.

¹⁸Arummwa awo yaanihimeerya wira: ?Mahiku ookiserya, anookhumelela atthu oowanyohola akhw'aya, yeettelaka soosivela s'erutthu aya.?

¹⁹Awo tankumiha ohiiwanana, ni annettihiwa n'irutthu aya, ehikhalanne Erooho ya Muluku.

²⁰Nto nyuwo anoophentaakani, mwiisunnuheke mowaaminini mwanyu mooreerexa, nvekelaka n'uwerya wa Erooho Yooreera.

²¹Mukhaleke moophentani mwa Muluku, muroromelaka wira pwiy'ahu Yesu Kristu n'ureera wawe murima onimoovahani ekumi ehinimala.

²²Mwaroromeliheke atthu ale akina anihoverya waamini waya.

²³Nwoopoleke akina, nwakiheryaka mooro. Muwooneleke-tho othunku akina, nave-tho nwooveke yaawo; mwipasoopeke hata n'ikuwo saya sinanarihiwe ni sootakhala saya.

²⁴Siiso Muluku onwerya owaakihani sottheka sothene ni ohooruuhani mpakha vary'awe munttittimihoni mwawe, muhirina etampi, musareiye-ene otteeliwa murima.

²⁵Muluku mmosaru, Moopoli ahu mwa Yesu Kristu, Pwiy'ahu, avahiwe nttittimiho ni okhulupaly'awe, n'uwerya, n'ulamula, okhuma woopaceryani ni vano ni wa mahiku othene. Amen!