Revelation 1

¹Wiisuupulula wa Yesu Kristu, yoowo Muluku onvahaly'awe wira aasuwelihe arumeyi awe itthu sinrowa wiiraneya voohilekela. Nave Yesu Kristu aahimuruma munkelo awe wira amusuwelihe itthu iya murumeyi awe Yohani.

²Yohani uwo ahikhalela onamoona sothene soonaly'awe: Eyo p'iyo Ehapari ya Muluku n'ikeekhayi yuupululiwe ni Yesu Kristu.

³Ooreeriwa t'ale onsoma moolumo ala oosuwelihiwa, ni ooreeriwa t'ale aniiwa n'ale aneettela itthu silempwe muliivuruni-mu, okhala wira okathi aya woophiya.

⁴Miyo, Yohani, kinnalepela aKristu a Ikerexa thanu na piili, siri elapo ya w'Asia. Nvahiwe mahala ni murettele onrwa w'Ole onkhala, akhala ni ontthuna orwa ni onrwa wa irooho ithanu na piili, seiyo siri ohoolo w'ehice awe;

⁵ni onrwa wa Yesu Kristu, namoona oororomeleya, yoowo opacenrye ohihimuwa mw'alipa ookhwa, ni yoowo-tho ori mwene a mamwene a elapo ya vathi. Yoowo onniphenta, ni onooponle itampi s'ahu n'iphome awe,

⁶khunikhaliha atthu a omwene awe, anamukuttho a Muluku ni Tiithi awe, yoowo akhalane nttittimiho n'uwerya wa mahiku othene. Amen!

⁷Mmoone! Owo onrwa mmeekuni. Atthu othene anrowa omoona: Hata yale yamuhomme anoomoona. Maloko othene, enoonaka Yoowo, anrowa wiikhupanyerya. Ti siiso. Amen!

⁸Miyo ki Ephattu ni ki Okiserya: Pwiya Muluku t'onihimya, Yoowo onkhala, Yoowo akhala, Yoowo onikhala voohimala-tho, Apwiya oowerya sothene.

⁹Miyo Yohani, munn'inyu yoowo onihaawa vamosa ni nyuwo mwa Yesu n'umwene n'uvilela, yoowo akhala esisiro y'oPatimu mwaha wa Masu a Mukulu n'umulaleya Yesu.

¹⁰Weiwo nihiku n'Apwiya, kahikuxiwa ni Erooho ya Muluku: Kaahiiwa ottuli waka nsu naarunya ntoko oruma wa nlope,

¹¹nihimyaka wira: Mulepe muliivuruni itthu sinoon'anyu, muroihele ikerexa thanu na piili siri mittetthe sa w'Efeso n'oSmirna, n'oPeerkamu, n'oTiyatira, n'oSardi, n'oFilatelifia, n'oLawotiseya.

¹²Nto miyo kaahirukunuwa wira kinwehe ole aakilavuliha: Varukunuwaly'aka, kahoona mithuko mithanu na miili, sa eweero.

¹³Eriyari ya mittuko iyo, kaahimoona mutthu aalikana ni Mwaana a Mutthu, awanreene nlaya naaphiya mwinawuuni, ni musako wa eweero waarukurenrye etthirim'awe.

¹⁴Muru awe n'ikharari sawe saari sotteela ntoko nxotte, wala ntoko nipheru; maitho awe yaalikana ni malumi a mooro;

¹⁵inawu s'awe saalikana n'iporonse yoowooxiwa khureerihiwa, nave nsu n'awe naalikana n'uruma wa maasi manci-ene,

¹⁶ni ntata nawe noolopwana, owo aahivarelela itheneeri thanu na piili; mwaano mwawe mwaanikhuma mwaalo woononiwa, oniitha ipantte soopiili. Owiitho wawe waanaarya ntoko sintuthaaya nsuwa othana eriyari.

¹⁷Vaamoonalyaka, kaahimorela vamettoni vawe, kinakhala ntoko kaarimookhwa. Vano owo aahikixaatherya ntata nawe noolopwana, khukihimeerya wira: Muhoove. Miyo ki oopacerya ni ki ookiserya.

¹⁸Miyo k'ephattu y'ekumi, kaahikhwa nto vano kinikhala voohimala-tho. Miyo kihaana mihulelo sinikivaha owerya wootthukula n'utthukwa nipuro niry'aya alipa ookhwa ni wo waahihimuxa y'awo.

¹⁹Tivo, mulepe soonaly'anyu n'iye sinoon'anyu, n'iye-tho sinrow'anyu woona ohoolo.

²⁰Itthu sinthonyeryaya itheneeri iye thanu na piili nyuwo soonaly'anyu muntatani mwaka noolopwana, ni mithuko iye: Itheneeri thanu na piili sinthonyerya ankelo a ikerexa thanu na piili, vano mithuko sa eweero mithanu na miili sinthonyerya-tho ikerexa iye thanu na piili.