Revelation 2

¹Vano mmulepele munkelo a ekerexa ya w'Efeso wira: Moolumo awe yoole onvarelela itheneeri thanu na piili ni ntata nawe noolopwana, yoowo oneetta eriyari ya mithuko mithanu na miili sa eweero, t'ila:

²Miyo koosuwela miteko sanyu n'uhaawa wanyu ninthiti nanyu n'enamuna sihinaavilel'anyu atthu ootakhala murima, nave nyuwo mwaahiweehererya ale yaaipaka okhala arummwa, nto ehikhanle arummwa nyuwo muhaaweha okhala anawoothe.

³Koosuwela wira moolipiherya waamini wanyu ni wira mohaawa vanci-ene mwaha wa nsina naka, khuhooceya.

⁴Nto yookhala etthu enoovanyihaakani: Mwaha woohiya ophenta wanyu woopacerya.

⁵Tivo, muupuwele nipuro nimonry'anyu! Muttharuwe, mutthikele mweettelo anyu wa khalaayi. Mwaahire siiso, mwaahittharuweru, miyo kinimoorwa, kinookumiha muthuko anyu nipuro naya.

⁶Vano, mookhalana etthu yooreera. T'ila: Nyuwo mookhootta miteko s'aNikolawo, ntoko miyo-tho sinkhoottaka.

⁷Arina maaru oowiiwa animwiiwa etthu Erooho ya Muluku enhimeery'aya ikerexa! Ole onrowa oxintta, miyo kinonvaha olya mihokorokho sa mwiri w'ekumi, oninnuwa mmatta mwa Muluku.

⁸Vano, mmulepele munkelo a ekerexa y'oSmirna wira: ?Moolumo awe yoole ori oopacerya ni ookiserya, yoole aakhwiiye, khutthikela-tho okhala mukumi, t'ala:

⁹Miyo koosuwela ohaawa wanyu n'uthoiwa wanyu: Nto veekeekhayi nyuwo mwa thaaciri! Koosuwela wira munootheriwa n'ale aniihimya okhala aYuta, nto ehikhanle aYuta: Awo muthukumano wa Satana!

¹⁰Muhooveke ohaawa onrowaanyu ophwanya. Nwiriyane: Satana onrowa waatthukela akina a nyuwo mukhatteya, wira musuweliwe mwaalimpe murima. Nyuwo munoolupatthiwa mpakha mahiku muloko. Mukhaleke oowaamini mpakha okhwa: Miyo kinimoothuvelani, koovahakani ekumi.?

¹¹Arina maaru oowiiwa animwiiwa etthu Erooho ya Muluku enihimeery'aya ikerexa! ?Ole onrowa oxintta okhwa wa neenli khunrowa omphwanya.?

¹²Vano, mmulepele munkelo a ekerexa y'oPerkamu wira: Moolumo awe yoole orina xoowa, t'ala:

¹³Miyo koosuwela nipuro ninkhal'anyu: Ti weiwo oryaya-wo ehice ya Satana. Nto nyuwo munkhalela nthiti okitthara, khuhikhootta okaamini, hata mahiku iiviw'awe Antipa, namoon'aka oororomeleya, iiviwe mulaponi mwanyu, nipuro ninkhal'awe Satana.

¹⁴Nto sookhala itthu vakhaani sinoovaanyihaakani yokhala etthu enookhupanyakani: Eriyari anyu akhala antthara mwiixuttiho wa Palamu, yoowo amwiixuttin'he Palaki enamuna yo watthekiha atthu a Isarayeli, aahimeryaka wira elyeeke yoolya yaavahiwa amuluku a ethiru, ni wira onamuttompe.

¹⁵Siiso-tho, akhala atthu akina a nyuwo aneettela-tho mwiixuttiho w'atthu a Nikolawo.

¹⁶Tivo, murukunuxe murima, mwaahiire-ru siiso, miyo kinimoorwa wa nyuwo naanaano, kinoowana n'atthu y'awo ni xoowa onkhuma mwaano mw'aka.

¹⁷Ole orina maaru oowiiwa, onimwiiwa etthu Erooho ya Muluku enihimeery'aya ikerexa. Ole onrowa oxintta, miyo kinoonvaha emana evithiwe. Vano, khula mutthu a y'awo kinoonvaha nluku nimosa nootteela nilempwe-vo nsina nsya, nihisuweliwe ni mutthu, ahikhanle yoowo onaakhelela.

¹⁸Vano, mmulepele munkelo a ekerexa y'oTiyatira wira: Moolumo a Mwaana a Muluku, Yoole orina maitho anlikana ni malumi a mooro n'inawu soolikana n'iporonsi yooreerihiwa, t'ala:

¹⁹Miyo koosuwela miteko sanyu, koosuwela ophenta wanyu ni waamini wanyu ni waarumela wanyu akhw'inyu ni nthiti nanyu. Koosuwela-tho wira munnitepa ovara miteko sooreera ovikana khalayi.

²⁰Nto yookhala etthu enookhupany'akani: Nyuwo munninvilela Yesapeli, muthiyana yoole oniipaka okhala profeta. Owo onnathweleliha arumeyi aka, awiixuttihaka omuhiya Muluku aya n'ukhuura enama evahiwe amuluku a ethiru.

²¹Miyo konvaha muthiyan'owo okathi w'ottharuwa, nto owo khantthuna ohiya onamuttompe awe

²²Mwiiwe, kinoonvaha iretta n'uhaawa wuulupale, owo n'ale othene anraruwan'awe, awo yaahittharuwe-ru mweettelo aya.

²³Ohiya vo, kinoowiiva an'awe: Siiso ikerexa sothene sinrowa osuwela wira miyo t'ule ontokosa muupuwelo ni mirima s'atthu. Miyo kinoomuliva khula mutthu a nyuwo kittharihelaka miteko sawe.

²⁴Vano nyuwo, aKristu akina a oTiyatira, nyuwo othene muhitthanre mwiixuttiho ene yoowo wootakhala, nyuwo muhiixuntte itthu siniireliwa mitikiniho soowixa sa Satana, nkinooreyani muritti mukina.

²⁵Nto musukeke oratta-ene ele erinaanyu mpakha vanrw'aka.

²⁶Ole onrowa oxintta n'uthipelela weettela miteko saka mpakha woomalelani, kinoonvaha owerya wo weettiherya ilapo;

²⁷onooweettiherya n'ekopo awe ya yuuma, ntoko mutthu onipwexakasa mwaapu w'oloko, siiso-tho, ntoko miyo kivahiw'aka owerya n'atiithi

²⁸Kinrowa onvaha-tho nivoroxa na vaasiisu.

²⁹Orina maaru oowiiwa onimwiiwa, etthu Erooho ya Muluku enihimeery'aya ikerexa.