Revelation 3

¹Vano, mmulepele munkelo a ekerexa yoSarti wira: Moolumo awe yole orina minepa mithanu na miili sa Muluku n'itheneeri thanu na piili, t'ala: Miyo koosuwela miteko sanyu, nyuwo mookhalana nsina no wira mwa mukumi, khuniira muri ookhwa-ene.

²Mulipeleleke! Mulipihe seiyo sirinaanyu nlelo, ni sihanle okhwa: Maana kihoona wira miteko sanyu khasihiyo sooreera vomalela vamaithoni va Muluku aka.

³Tivo, muupuwele ele yiixuttihiw'anyu ni yiiwaly'anyu, mweetteleke y'awo ni murukunuxe murima. Mwaahilipelele-ru, miyo kinimoorwelani ntoko nawiiye, muhisuwelaka okathi onoorwelaakani.

⁴Vano-nto oSarti iwo, akhala akina vakhaani a nyuwo ahinanarinhe nlelo makhalelo aya. Awo anrowa weettaka ni miyo, ewanre-ene ikuwo sootteela: Okhala wira anniphwanela siiso.

⁵Ole onrowa oxintta, onoowara siiso ikuwo sootteela: Vano miyo nkinrowa ottipiha nsina nawe vamaithoni v'atiithi mulivuruni mwa ekumi. Miyo kinrowa ohimya vohiipithiha, vamaithoni v'atthu aka ni ankelo wira owo t'awaka.

⁶Orina maaru oowiiwa, onimwiiwa etthu Erooho ya Muluku enihimeeryaya ikerexa.

⁷Vano mmunlepele munkelo a ekerexa y'oFilatelfia, wira: Masu awe ole ooreera murima ni a ekeekhayi moolumo awe t'ala:

⁸Miyo koosuwela miteko sanyu: Mwiiwe miyo kihootthukulelani mukhora ohoolo wanyu, yoowo ohinwerya owaliwa ni mutthu mukina, koosuwela wira murina ikuru vakhaani, nto siiso muheettela moolumo ala ni khamukhoottale nsina naka.

⁹Mwiiwe etthu enrowaka owiriha atthu akina a muthukumano wa Satana, anawootothe awo, annihimya wira aYuuta, nto ehikhanle aYuuta: Miyo kinimwakhanyererya orwa okokhora ohoolo wanyu, wira esuwele wira miyo kinnophentani.

¹⁰Okhala wira nyuwo muhiiwelela moolumo aka, munatthara ni nthiti, ni miyo-tho kinoowakihani okathi w'otakhaliwa ontthuna warwela atthu a mulaponi mothene, vanrowaka owehererya atthu a vathi-va.

¹¹Miyo kinrwa naanaano. Musukeke oratta-ene sirin'anyu, wira ahikhale ontthuna owaakhani otthuveliwa wanyu.

¹²Ole onrowa oxintta, miyo kinoomukhaliha ntoko nripu na mpaani mwa Muluku aka: Vano owo khanrowa-tho okhuma-mo. Miyo kinoolepa mwa yoowo nsina na Muluku aka ni nsina na muttetthe wa Muluku aka, eyo p'iyo, nsina n'oYerusalemu wa naanaano, weiwo onkhuruwa wirimu, okhumaka wa Muluku aka. Kinoolepa-tho mwa yoowo nsina naka na naanaano.

¹³Orina maaru oowiiwa, onimwiiwa etthu Erooho ya Muluku enihimeery'aya ikerexa.

¹⁴Vano mmulepele munkelo a ekerexa y'oLawotiseya wira: Moolumo awe yole oniiriwa ?Amen?, yoowo ori namoona oororomeleya ni a ekeekhayi, yole ori ephattu ya itthu sothene Muluku sipattunx'awe onihimy'awe, t'ila:

¹⁵Miyo koosuwela miteko sanyu: Nyuwo khamuhiyo ooriirya nnakhala ooviha! Wamureera nyuwo mwaakhanle ooriirya wala ooviha!

¹⁶Nto okhala wira nyuwo mookhuttihiwa, muhikhalaka ooriirya wala ooviha, miyo kinimoorapheyani mwaano mwaka!

¹⁷Nyuwo munihimya wira: Miyo kithaaciri, nave kookhalana mihakhu sinci-ene, khiivo tho enkithowa, nave khamunsuwela wira mwa mutthu ootakhaliwa, ni oothoiwa, masikhini, oohoona ni oohiwar'etthu.

¹⁸Tivo, kinoovahaakani miruku iya: Muthume wa miyo eweero ererihiwe ni mooro, wira mukhale athaaciri a ekeekhayi. Muthume-tho ikuwo sootteela, wira nwareke, mmalamalihe othaaleliwa wanyu wowuuliha muru. Onooneya Muthume-tho murette w'ottonyerya mmaithoni mwanyu, wira nweryeke woona.

¹⁹Miyo kinnaapwapwela othene ale anaaphent'aka, ni kinnaattaruxa, vano mukhaleke oothokorerya ni murukunuxa murima.

²⁰Mwiiweke: Miyo kiri vamukhora, khiyamana nsele. Akhala mutthu onrowa wiiwa nsu naka, khukihulela, miyo kinookela mpaani mwawe, kinimoolya ni yoowo, n'uwo onimoolya ni miyo.

²¹Ole onrowa oxintta, miyo kinonvaha okilaathi ni miyo veehiceni vaka, okhala wira ni miyo-tho kooxintta, khukilaathi n'Atiithi aka veehiceni vaya.

²²Orina maaru oowiiwa onimwiiwa etthu Erooho ya Muluku enaahimery'aya aKristu!