Revelation 4

¹Numala itthu iya, yaahikikhumelela etthu ekina: Kaahoona mukhora ohuleiyeene wirimu, kaahiiwa-tho nsu naalikana ni nlope, nenlo napacenrye okilavuliha, khukiirela wira: Nwele va, kiwooniheryeni sinrowa wiraneya numala itthu iya.

²Naanaanoru, Erooho ya Muluku yaahikikuxa. Wirimu weiwo kaahoona ehice. Veehiceni vo aahikilaathi mutthu.

³Ole aakilanthe-vo aari oowerya ntoko maluku oorikexa ni oowaryexa. Ehic'eyo yaahirukureriwe n'ikhweyi, saarya ntoko nluku noowaaryexa.

⁴Mukherekhere mw'ehice mwaahikhala ihice sikina miloko miili ni xexe, sakilatheliwe ni mahumu miloko miili n'axexe, ewanre-ene ikuwo sootteela n'ikhara sa eweero mmuruni.

⁵Veehiceni vaavo wanikhuma overunya, masu n'itari. Ohoolo w'ehice waahikhala mithuko mithanu na miili soopattihiwa, saari minepa mithanu na miili sa Muluku.

⁶Ohoolo w'ehice yaahikhala ntoko ephareya y'evituru, yoowaarya vanci-ene eriyari y'ehice ni mukherekhere mwaya yaahikhala akumi axexe, esareiye-ene maitho owitho n'uttuli.

⁷Ekumi yoopacerya yaalikana ni kharamu, ekumi ya neenli yaalikana n'ikhove ni mwaanyompe, ekumi ya nexexe ekhove aya yaalikana n'ikhove ya mutthu nava ekumi ya neexexe yaalikana ni murumaasi aavavaka.

⁸Akumi awo ooxeexe, khula mmosa aarina mapupha mathanu na manli, oosareya maitho muhina n'uta waya. Vano khiyaahiyererya wiipa othana n'uhiyu, yiraka: ?Ooreera, Ooreera, Ooreera murima Pwiya Muluku oowerya sothene, yoowo akhala, onkhala ni ontthuna orwa.?

⁹Okathi wothene akumi awo yaamwipelaya ovuwa ni nttittimiho n'omuxukhuru ole aakilanthe veehiceni, yoowo onkhala mahiku othene,

¹⁰mahumu miloko miili n'axexe yaahimorela vamettoni v'awe ni yaanimukokhorela, ole onikhala mahiku othene, awo yaanirihela ikhara saya ohoolo w'ehice yiipaka wira:

¹¹Pwiy'ahu ni Muluku ahu! Nyuwo moophwanela waakhela ovuwa ni nttittimiho n'uwerya. Tthiri ti nyuwo mpattunxe itthu sothene: Mwaha w'otthuna wanyu seiyo sinnikhala, ni sothene soopattuxiwa.