Matthew 2

¹N'uyariwa Yesu oPeteleheemu, muttetthe w'oYuteya, mahiku a mwene Heroti, asuweli akina y'ahivenya elapo y'onikhuma nsuwa, khuphiya oYerusalemu.

²Weiwo yaahikoha wira: Ori vai mwaana oyariwe naanaano, mwene a aYuta? Nrimoona etheneeri awe onikhuma nsuwa, nrweenle omukokhorela.

³Mwene Heroti vaaiwaly'awe aahuukhuwa, nave-tho atthu othene a oYerusalemu yaahuukhuwa;

⁴Heroti aahaathukumanya makhulupale othene a anamukuttho n'awiixuttihi a ikano, khwaakoha wira: ?Mesiya onrowa oyariwa elapo xeeni??

⁵Awo yaahimwaakhula wira: ?Opeteleheemu, w'oYuteya. Ti siiso silempwaya ni profeta wira:

⁶Nyuwo Peteleheemu, elapo y'oYuteya, khumuyenve nnakhala vakhaani eriyari sa mittetthe suulupale s'oYuteya, Tthiri mwa nyuwo onookhuma mukhulupale onrowa ohoolela nloko naka, Isarayeli.?

⁷Nto Heroti ahiwiihana asuweli ale wiphiini khuyakohakoha okathi xeeni wonaly'aya etheneeri.

⁸Numala waakoha aahaaruma oPeteleheemu, awiirelaka: ?Murowe, mwakohakohe oratta-ene mwaha wa mwaan'owo. Mwamphwanya vale murwe, mukihimeerye, wira ni miyo-tho kirowe kamukokhorele.?

⁹Vaaleeliw'aya siisaale ni mwene Heroti, asuweli ale y'ahikhuma. Naanaanoru yahoona-tho etheneeri yoonaly'aya onikhuma nsuwa, khutteeliwa murima vanci-ene.

¹⁰Nto etheneer'ile yahaahoola mpakha ophiya nipuro naary'awe mwaana.

¹¹Asuweli vaakenly'aya mpaani mme, yaahimoona mwaana ni Maria, ame awe, khukokhora emuttittimihaka mwaan'owo. Numala yaahitaphula mirupa saya, khunvaha eweero, erupani ni emiira.

¹²Nave Muluku aahahimeerya moolohani wira ehivire-tho wa Heroti. Nto awo yaahikuxa ephiro ekina khuhokolowela elapo aya.

¹³Nurowa asuweli ale, munkelo a Apwiya aahimukhumelela Yosefe moolohani, khumuhimeerya wira: ?Nvenye, mmukuxe mwaana n'ame awe, mutthyawele w'Exitu. Mwakhale weiwo mpakha miyo woohimeeryani, maana Heroti onrowa omphavela Mwaana, wira amwiive.?

¹⁴Yosefe aahivenya ohiyu, aahimukuxa Mwaana n'ame awe, khurowa w'Exitu.

¹⁵Khukhala weiwo mpakha Heroti okhwa siiso saahiiraneya itthu Apwiya s'ahimmyaya ni moolumo a profeta Hoseya wira: ?Komwihana Mwan'aka w'Exitu.?

¹⁶Okathi Heroti voonaly'awe wira asuweli khiyamwiwelenle, aahinanariwa vanci-ene, khwaaruma atthu awe orowa oPeteleheemu n'ilapo sothene soowaattamela owivakasa anamwane aaxilopwana othene yaarina iyaakha piili orowa vathi attharihelaka okathi waakohakohaly'awe asuweli ale.

¹⁷Siiso saahiiraneya itthu saahimyaly'awe profeta Yeremiya, wira:

¹⁸Nihiiwanyeya ekuttho oRama: Ekuttho eyo yaari, Ya Rakeli awunlela an'awe; Owo khaatthuna omaalihiwa, maana othene yaahiivakasiwa.

¹⁹Nuukhwa Heroti, munkelo a Apwiya aahimukhumelela Yosefe moolohani w'Exitu.

²⁰Khumuhimeerya wira: ?Nvenye, mmukuxe Mwaana n'ame awe, muhokolowele elapo ya Isarayeli, okhala wira mutthu aaphavela omwiiva mwaana ohookhwa.?

²¹Yosefe aahivenya, kumukuxa Mwaana n'ame awe khuhokolowela elapo ya Isarayeli.

²²Vano aahisuwelihiwa wira Arikilawu taari mwene aamuranttenle Heroti, tiithi awe. Tivo ahoova orowa elapo eyo. Nto aahaakhelela wa Muluku miixuttiho sikina moolohani khurowa elapo y'okalileya,

²³Khurowa okhala mmuttettheni mwiihaniwa Nasareti. Siiso saahiraneya itthu saahimmwe ni maprofeta wira: ?Owo onimwihaniwa muNasareti.?