Matthew 3

¹Mahiku awo, Yohani aahikhumelela moothakoni m'oYuteya, khupacerya walaleerya atthu,

²iiraka: ?Murukunuxe mirima s'anyu, okhala wira omwene wa wirimu woophiya.?

³Yohani t'ule ohimmwe ni profeta Yesaya wira: ?Ookhala onikhuwela woothakoni iiraka: Mwaalokiherye ephiro Apwiya; mookolole mittaala saya! Sinrow'aya ovira.?

⁴Yohani aawara ikuwo sa manri sa ekamelo aaitthukela ni musako w'esapala. Yoly'awe yaari isoope ni oravo.

⁵Nto yaanirowa wa yoowo atthu oYerusalemu ni elapo yothene y'oYuteya ni mittetthe soowaattamela muro Yortani.

⁶Awo y'anihimya itampi saya, nave Yohani aanaapatisa mmuro Yortani.

⁷Okathi Yohani v'awoonaly'awe aFarisi ni aSatukhi anci-ene emurweelaka wira aapatise, aahahimeerya wira: Nyuwo nloko na ivili! Muleeliwe n'ani wira mutthyaweke onanariwa wa Muluku onrwa?

⁸Nvareke miteko sooreera, sinooniherya orukunuxa wanyu murima.

⁹Nyuwo muhiisoototheke muhimyaka wira: Hiyo nookhalana tiith'ihu Aparahaamu! Maana miyo kinoohimeryani wira Muluku hata maluku ala onniwerya otatuxa, ekhale an'awe a Aparahaamu.

¹⁰Epaso yoolikana wira yiikitthe mitathaari sa miri, miri sothene sihiniima mihokorokho sooreera sinimwii kittiwa, siriheliwe vaikho.

¹¹Miyo kinoopatisani ni maasi, wira murukunuxe murima. Vano ole onrwa ottuli w'aka ookhalana owerya wuulupale wokivikana miyo: Maana miyo nkiniphwanela otaphula mikhoyi sa isantaalya sawe! Owo onimoopatisani mwa Erooho Yooreera ni mooro.

¹²Owo ookuxa mmatatani mw'awe ethokwa wira aveerele epyo yooreera ni akhupele mmuruttuni mw'awe. Mivelo sene apahe ni mooro ohinttipha-tho.

¹³Vano Yesu aahikhuma oKalileya arowaka omuro Yortani omphwanya Yohani wira apatisiwe ni yoowo.

¹⁴Nto Yohani aanikhootta iiraka: ?Ti miyo kiphwanenle opatisiwa ni nyuwo, vano nyuwo munkirweela miyo??

¹⁵Nto Yesu aahimwaakhula wira: ?Muhikhootte, muhiye siiso maana ti siiso sinrerel'aya weettela sothene sintthun'awe Muluku, Yohani aahitthuna.?

¹⁶Numala opatisiwa, Yesu aahikhuma mmaasini. Okathi ene yoowo, wirimu waahitthukuwa nto Yesu aahoona Erooho Yooreera okhuruwaka ntoko epompa emurweelaka yoowo.

¹⁷Nave nsu n'akhuma wirimu n'ahihimya wira: ?Ola mwan'aka onimphent'aka yoowo onikisiveliha.?