Matthew 4

¹Ohoolo w'aya, Erooho Yooreera wahimurowana Yesu w'othakoni wira eehereriwe ni Satana.

²V'avinry'aya mahiku miloko mixexe, othana n'uhiyu ahily'aka etthu aahivoliwa etala.

³Vano mulipa-ooweehererya aahimwaattamela, khumwiirela: ?Nyuwo mwaari Mwaana a Muluku, murume maluku ala wira ethatuwe mukatthe.?

⁴Nto Yesu aahimwaakhula wira: Voolempwa wira: ?Kahiyo eyoolyaru paahi enimukhaliha ekumi mutthu masi nave-tho khula nuulumo ninkhuma wa Muluku.?

⁵Nave Mulipa-oweehererya ahimurowana Yesu oYerusalemu, muttetthe wooreera, khunweliha nipuro noorekamexa vate v'empa ya Muluku,

⁶nto khumwiirela wira: ?Nyuwo, mwaari Mwaana a Muluku, mutuphele vathi vale. Maana voolempwa wira: Muluku onimooruhelani ankelo awe wira yookhapeleleni. Awo animukaphulani mmatatani mw'aya, wira inawu sanyu sihivulale mmalukuni.?

⁷Yesu aahimwaakhula wira: ?Volempwa-tho wira: ?Muhattehattehe Apwiya Muluku anyu.?

⁸Nto Satana aahimukuxa Yesu khumurowana vasulu va mwaako vorakama, khumooniherya omwene wothene wa mulaponi ni muttitthimiho waya,

⁹khumwirela: ?Kinimoovahani itthu iye sothene, mwakikokhorelaru.?

¹⁰Nto Yesu aahimwirela: ?Khuma va, Satana! Voolempwa wira: Mwakokhorele Apwiya Muluku anyu, ni mwaarumeele yaawo paahi.?

¹¹Nto Satana aahimuhiya; naanaanoru ankelo a Muluku yaahirwa vaavale khupacerya omurumeela Yesu.

¹²Yesu v'aiwaly'awe wira Yohani otthukweliwa mukhatteya, aahirowa oKalileya.

¹³Nto ahithaama oNasareti khurowa okhala oKafarnawu, muttetthe wattamenle nratta n'oKalileya mulaponi mwa Sapuloni ni Nefetali.

¹⁴Saahiraneya siiso wira emalelihiwe moolumo a profeta Yesaya anihimya wira:

¹⁵?Elapo yooSapuloni ni yooNafitali, yookerekhere wa nratta, epantte y'elapo yookhopela ya muro Yortani, elapo y'oKalileya, weiwo onkhalaya amalapo!?

¹⁶?Maloko yaari mwiipiphini ahoona mutthuko muulupale mutthuko owo ohaakhumelela atthu yaakhala elapo ya epiphi yaalipa-ookhwa.?

¹⁷Okhuma okathi yoowo, Yesu aahipacerya olaleya iiraka: ?Murukunuxe mirima s'anyu, maana omwene wa wirimu ori woophiya!?

¹⁸Yesu eettaka oxerexere wa nratta n'oKalileya aahiwoona atothi anli a ihopa: Aari Simoni, iihaniwa-tho Petru, ni Antere munn'awe Simoni. Okathi yoowo yiira erihelaka ntthavi n'aya mmaasini.

¹⁹Yesu aahiwirela wira: ?Mukitthare, miyo kinimookhalihani atothi a atthu.?

²⁰Awo yaahihiya naanaanoru matthavi aya, khumutthara Yesu.

²¹Avikanakaru vakhaani, Yesu aahimoona Yakopo onari ni mun'awe Yohani, aana a Sepeteyo, awo anari n'atiithi aya mukalawani, elokihasaka matthavi aya. Yesu aahiwihana:

²²Nto awo yahihiya naanaanoru ekalaw'aya ni atiith'aya, khumutthara Yesu.

²³Yesu aaneetteetta elapo yothene y'oKalileya, awiixuttihaka atthu mpaani mw'aya moothukumana, mwiihaniwa sinakoka, alaleyaka Ehapari Yooreera y'omwene ni aavonihaka atthu iretta s'aya sothene n'uhaawa w'aya wothene.

²⁴Ovuwa w'awe waahimwareela mulaponi mothene m'oSiriya. Nto aahiruuheliwa atthu othene yaahaawa, ehaaxiwaka n'iretta sootakhala sa khula enamuna, n'ale-tho yaavariwe ni minepa sootakhala, n'atthu yaawereiwa ecile n'alipa-oorakala. Nto Yesu khaavoniha othene.

²⁵Muttitthi muulupale w'atthu wanimutthara, waakhuma oKalileya ni elapo yo tekapoli ni oYerusalemu, ni elapo y'okhopela wo Yortani.