Matthew 5

¹Yesu voonaly'awe muttitthi w'atthu, aahiwela vamwaako, khukilaathi vaavo, ni awiixutti awe yaahirowa omwaattamela vaary'awe.

²Owo aahipacerya owiixuttiha ahimyaka wira:

³Ooreeriwa t'ale aniiyeviha muroohoni mwaya, okhala wira omwene wa wirimu ti wawaya.

⁴Ooreeriwa t'ale aninla, okhala wira annokurunuyiwa murima.

⁵Ooreeriwa t'ale oowimaaliha, okhala wira animwakhela elapo yohiyeriwa.

⁶Ooreeriwa t'ale anvoliwa etala, ni ntthona mwaha wa exariya okhala wira anoovona.

⁷Ooreeriwa t'ale oomoriwa ikharari, okhala wira awo anoophwanya omoreliwa ikharari.

⁸Ooreeriwa t'ale arina murima wooreera, okhala wira anoomoona Muluku.

⁹Ooreeriwa t'ale amphavela wiwanana ni murettele, okhala wira animwiihaniwa aana a Muluku.

¹⁰Ooreeriwa t'ale anlupatthiwa mwaha wa xariya, okhala wira omwene wa wirimu ti waw'aya.

¹¹Ooreeriwa ti nyuwo munruwaniwa ni munlupatthiwa ni mootheriwaka mulavuleliwaka itthu sootakhala mwaha wa miyo.

¹²Mutthapeke, ni mutteeliweke murima, okhala wira otthuveliwa wanyu wuulupale wirimu. Tthiri ti siiso saalupatthiw'aya maprofeta a khalayi muhinatthi okhala.

¹³?Nyuwo mwa maakha a mulaponi. Nto maakha yahiya osiva antthuna olukiwa-tho nxeeni? Kharina-tho muteko, vahikhanle oriheliwa ota kiyanyakeliwa n'atthu.?

¹⁴?Nyuwo mwa muthuko wa mulaponi. Muttetthe wootekiwa vamwaako khuniipithiheya.

¹⁵Siiso-tho wapattihiwa muthuko, khunikhuneeliwa ni mwaapu: Onithomeiwa vasulu onaamwaleela atthu othene ari va tthokoni.

¹⁶Siiso, waarya w'anyu wamwaleeleke atthu, wira yooneke miteko s'anyu sooreera, wira yaattittimiheke Atiith'inyu ari wirimu.?

¹⁷?Muhaanyiherye wira kirweenle omaliha ikano sa Monse wala sa maprofeta! Nkirwenle onyaanya: Kirwenle omaliherya

¹⁸V'ekeekhayi kinohimeeryani wira hata erimu n'ilapo ya vathi emalaka, khenrimeela etthu yaamukhaani elempwe wala nlepa namukhaanixa mukanoni khaninvukuliwa, sothene sihinatthi omaliheriwa.?

¹⁹Tthiri akhala mutthu ohiniiwelela hata ekano yamukhaanixa nave siiso onawiixuttiha atthu, onookhala ooyevihiwa Moomweneni wa Wirimu, nto ole oniiwelela ni onixuttiha onimwiihaniwa muulupale Moomweneni wa Wirimu.

²⁰Miyo kinooleelani wira: ?Exariy'anyu yaahivikane ele y'awiixuttihi a ikano ni y'amaFarisi, khamunkela Moomweneni wa Wirimu.

²¹?Muhiiwa iye saahimeeriw'aya atthu a khalayi wira: ?Muhiive.? Ole onimwiiva mutthu onoolamuliwa.?

²²Nto miyo kinooleelani-tho wira: Ole oninviruwela mukhw'awe onoolamuliwa, ni ole onimuruwana mukhw'awe amwirelaka ?Mulolo? onoolamuliwa ohoolo w'atthu, ni ole onimwiirela mukhw'awe ?Mutakhali?, owo onniphwanela oriheliwa omooroni ohinimala.

²³Tivo, mwarowa ovelela yovah'anyu mpaani mwa Muluku, w'altaari, weiwo muupuweela wira moomutthekela mukhw'anyu,

²⁴muhiye yovah'anyu ohoolo w'altaari murowe toko mwaataane ni munn'iny'uwo. Numala muroweke ovelela yoovah'anyu.

²⁵Mwaakuvele wiwanana ni nwanan'inyu murowaka oowanli anyu omilattuni wira nwanan'inyu ohoovahereryeni wa mphuki nave mphuki owo ohoovahereryeni wa mukhulupale eekhatteya ootthukweleni.

²⁶V'ekeekhayi kinoohimeeryani wira: Khamunkhuma-mo muhilinve mpakha enoota yookiserya.

²⁷Muhiiwa ele ehimmwe wira: ?Muhiraruwe.?

²⁸Nto miyo kinooleelani-tho wira: ?Ole oninweha muthiyana anwereihaka murima ooraruwana muthiyan'owo mmurimani mwawe.?

²⁹Niitho n'anyu nootthekihani musyoole murihele ottai-wene, tthiri fataari opahuwa etthu emosa y'erutthu anyu, ohikhanle oriheliwa omooroni ohinimala erutthu anyu yoothene.

³⁰Siiso-tho ntata n'anyu noolopwana nootthekihani, mwiikitthe, murihe, maana fataari opahuwa etthu emosa y'erutthu anyu, ohikhanle oriheliwa omooroni ohinimala erutthu anyu yoothene.

³¹Vaahihimmwa-tho wira: ?Ole onimuhiya mwar'awe anvahe etalaka y'omwalana.?

³²Nto miyo kinooleelani-tho wira ole onimuhiya mwar'awe, ohikhanle mwaha wa mararuwo, onnimuruma wira owo oraruweke. Ni ole onimuthela muthiyana oomwalaniwa n'iy'awe, owo-tho onooraruwa.

³³Ninlelo muhiiwa saahimeeriw'aya atthu a khalayi wira: ?Muhilapheke moothaka, nto muhaana omutthukula natiri aamanenly'anyu Apwiya.?

³⁴Nto miyo kinooleelani wira: Muhilapheke muromolaka erimu maana erimu ehice ya Muluku.

³⁵Muhilapheke muromolaka elapo ya vathi, maana elapo ehice ya inawu sa Muluku. Muhilaphele muromolaka oYerusalemu, maana oYerusalemu muttetthe wa Mwene muulupale.

³⁶Nnakhala nuhilaphele muromolaka muru anyu maana khamunwerya otatuxa ikharari s'anyu nnakhala emosa wira ekhale yoottela wala yooriipa.

³⁷Olavula w'anyu okhaleke ?Ayo? wakhala ?Ayo? wala ?Nnaari? wakhala nnaari. Maana moolumo anincerery'anyu khuvikan'ala, ankhuma mwa mutakhali.

³⁸Muhiiwa ele ehimmwe wira: ?Niitho nliviwe nniitho, niino nliviwe nniino.

³⁹Nto miyo kinooleelani-tho wira muhiwunlele ikuhu ale aniwirelani sootakhala. Akhala onoomanani nlaku noolopwana, mmutheterye-tho nlaku nikina.

⁴⁰Akhala omphavela wokumiheryani mulattu n'uwakhani malay'anyu, mmuhiyerye-tho mukhumi anyu.

⁴¹Akhala onookhanyererihani omuhoola ekwaha emosa, mmuhoole ikhwaha piili.

⁴²Mwavahe ale anovekelani, ni muharerye ettuli ale amphavela wokophelani.?

⁴³Muhiiwa ele ehimmwe wira: ?Mwaaphenteke atthu anloko n'anyu, ni mwaanyokheke awanan'inyu.?

⁴⁴Nto miyo kinooleelani wira: ?Mwaaphenteke awanan'inyu, mwaavekeleleke ale aniiwirelani sootakhala, nwiireleke sooreera ale anoonyokhani, ni mwaaveleleke ale anoohaaxani ni anoolupatthani.?

⁴⁵Siiso munookhala aana Atiith'inyu ari wirimu. Maana awo annakumiherya nsuwa atthu ootakhala murima vamosa n'ale ooreera murima: Annarupihela epula anaxariya vamosa n'alipa-ootakhala murima.

⁴⁶Nyuwo mwaaphentaka yaaleru anoophentani paahi muntthuna otthuveliwa sayi ni Muluku? Kahiyo siiso-tho siniir'aya alipa-ootakhala murima?

⁴⁷Mwaakhomasaka amus'inyu-ru paahi munoona wira etthu yootepa oreera? Hata amalapo khaniira-tho siiso?

⁴⁸Tivo, mukhale ooreeraxa murima, vomalela, ntoko Atiith'inyu ari wirimu siry'aya ooreeraxa murima voomalela.