Matthew 6

¹Mwiipasoope: Muhivareke miteko sooreera s'etiini anyu vamaithoni v'atthu, mwiirelaka wira mooniwe ni yaawo. Mwiirakaru siiso, Atiith'inyu ari wirimu khanootthuvelani.

²Tivo, mwaavahaka etthu oohaawa muhoopeke nlope ntoko siniir'aya alipa-oowoototha mpaani mothukumana ni mphironi, wira attithimihiweke n'atthu. Kinoohimeeryani ekhweeli wira ahaakhela otthuveliwa w'aya.

³Nto nyuwo mwaavahaka etthu alipa-oohawa, muhimuleeleke mutthu nnakhala mpathan'inyu onimphentex'anyu:

⁴Wira yovah'anyu ekhale yoohisuweliwa, nave atiith'inyu anoona sa mwiitiho animootthuvelani.

⁵Mwaalavulaka ni Muluku, muhiireke ntoko siniir'aya alipa-oowoka; awo waasivela olavula yeemenle-ene, mpaani moothukumana ni vanikumana iphiro, wira yooniweke n'atthu. Kinooleelani ekhweeli wira: Wooniwa iwo t'otthuveliwa w'aya.

⁶Nto nyuwo, mwaphavelaka olavula ni Muluku, mukeleke mpaani mw'inyu, mwiiwaleleke memmo mwaavekeleke Atiith'inyu ahinooneya. Nave Atiith'inyu anoona siniir'anyu ni mwiitiho, animootthuvelani.

⁷Mwaalavulaka ni Muluku, muhaattiheke moolumo anyu ntoko siniir'aya amalapo. Awo anuupuwela wira yaalavulaka vanci-ene animwiiwiwa.

⁸Nyuwo muhikhaleke ntoko yaawo, okhala wira Atiith'inyu annisuwela simphavel'anyu, nyuwo muhinatthi waavekela.

⁹Vano, nvekeleke so: ?Tiith'ihu muri wirimu, Nsina n'anyu nttittimihiwe.

¹⁰Omwene anyu orwe otthuna w'anyu wiireye vathi va ntoko wirimu

¹¹Munivahe olelo yoly'ahu ya khula nihiku.

¹²Munlevelele soottheka sahu, ntoko hiyo saalevelenly'ahu yaanitthekenle.

¹³Muhinihiye omora, nehereriwaka Nto munaakiherye mutakhali.? Tthiri omwene anyu n'uwerya ninttittimiho ti wa makiku othene. Amen!

¹⁴V'ekeekhayi, mwalevelelaka akhw'inyu soottheka s'aya, nave Atiith'inyu ari wirimu animoolevelelani.

¹⁵Nto nyuwo mwaahaaleveleleke akhw'inyu, soottheka s'aya nave Atiith'inyu khanoolevelelani soottheka s'anyu.

¹⁶Mwatthukwa vale, muhivololeke ntoko siniiraya alipa-oowoka: Awo annivolola wira ewoniherye atthu othene otthukwa w'aya. Kinohimeeryani ekweeli wira: Wooniwa iwo t'otthuveliwa w'aya.

¹⁷Nto nyuwo mwaatthukwaka, mukuseke, ni nvaseke ikharari s'anyu.

¹⁸Wira atthu ehoosuwelekeni wira mootthukwa. Esuweleke Atiith'inyu paahi, yaawo anoona ni mwiitiho. Vano Atiith'inyu awo, anoona ni mwiitiho, animootthuvelani.

¹⁹?Muhiithukumanyerye mihakhu vathi-va; vaava oweexe ni mukwitha onihonon'aya sothene, vaava anawiiye vanipwexaya mukhora, enakuxa muhakh'uwo.

²⁰Muthukumanyeryeke muhakhu wirimu; weiwo nnakhala oweexe wala mukwitha ohinihonon'aya, ni weiwo ohikhanle-wo anawiiye ankuxa muhakh'uwo.

²¹Tthiri, vaavo vari muhakhu anyu, vaavo-tho t'ori murima'anyu.?

²²?Maitho muthuko a erutthu. Tivo maitho anyu yakhala ooreera, erutthu anyu yothene eneetta vookokola.

²³Nto maitho anyu yakhala oonanara, erutthu anyu yothene eneetta mweepiphini. Nto muthuko anyu wakhala epiphi, epiph'iyo enotepa oriipa!?

²⁴Khaavo onwerya warumeela mamwene manli: Maana onomunyokha mmosa, amphenteke mukina paahi; wala onoomurumeela mmosa, mukina amuthanyeke. Khavaniweryaneya omurumeela Muluku ni orumeela muhakhu.

²⁵?Tivo, miyo kinoohimeeryani wira: Mwihivelavele mutthokelelaka makhalelo anyu w'etthu enrow'anyu olya wala owurya nnakhala ennrowanyu owara mwirutthuni mw'anyu. V'ekeekhayi ekumi kahiyo yuulupale ovikana yoolya? Nave erutthu kahiyo yuulupale ovikana soowara?

²⁶Nkaaweheeni axinuni anvava musulu: Awo khanaala, nnakhala khanihepha, hata kharina ntatha n'osuka soolya. Nave Atiith'inyu ari wirimu annaavaha soolya iyo! Khi nyuwo, khamuhiyo aalupalexa waavikana axinuni?

²⁷T'ani a nyuwo, ni weteteya w'awe, onwerya orakamiha hata vakhaani wunnuwa w'erutthu awe??

²⁸?Nave mwaha wa soowara, munripeliwani murima, nkawehani iithutu sa mutakhwani, enamuna sininnuw'aya, khasinvara muteko hata khasintthava ikuwo.

²⁹Nto miyo kinoohimeeryani wira: Hata mwene Salomoni ni eyulupale awe yoothene, khanaware sooreera ntoko emosa ya ithutu seiyo.

³⁰Vano Muluku yoowo oniwariha siiso malaxi a mmathalani, ankhala olelo, melo khupahiwa, khanrowa otepa wowarihani nyuwo, atthu oowamini vakhaani??

³¹Tivo, muhikhale mweteteiyaka mwiiraka: ?Nlye exeeni? Niwurye exeeni? Niware exeeni?

³²Ahinaamini t'anetta ephavelaka itthu iya sothene. Nto nyuwo Atiith'inyu ari wirimu annisuwela wira sothene iya munniphavela.?

³³?Mpaceryeke ophavela omwene wa Muluku ni exariy'awe; nto sikina sothene Muluku onimoovahani.

³⁴Tivo, muhuukhuwe nnihiku na meelo; maana nihiku na meelo nnokhalana wukhuwa waya. Khula nihiku ninkhalana ohaawa waya.?