Matthew 7

¹Muhaalamuleke akhw'inyu wira muhilamuliwe.

²Tthiri nlamulo ninrow'anyu waalamula akhw'inyu, ni nyuwo-tho munoolamuliwa siiso, nave mweeryo onrow'anyu waphimela akhw'inyu, ni nyuwo-tho munoophimeliwa yoowo.

³Munwehexexa sayi ikokhola siri mmaithoni mwa mukhw'inyu muhinacala muritta ori mmaithoni mw'anyu?

⁴Wala muntthuna omwiirela sayi munn'inyu wira: Nkani kookumiheni ekokhola eri mmaithoni mwanyu: ?Eriki nyuwo murina muritta mmaithoni mwanyu?

⁵Nawootothe! Mpacerye okumiha muritta ori mmaithoni mw'anyu, vano'nto muhale mukumihaka ekokhola eri mmaithoni mwa munn'inyu.?

⁶?Muhaavaheke alapwa itthu sooreera hata muhirihele ikuluwe maluku anyu oowarya wira sihinyakele numala soorukunuweleni soolumeeni.

⁷?Nveke, munoovahiwa. Mphavele, munoophwanya. Mmane mukhora, munoohuleliwa.

⁸Maana Ole onvekela, onnivahiwa; omphavela, onniphwanya; ommana mukhora onnihuleliwa.

⁹Ti pani a nyuwo, oniira ari tiithi, mwan'awe anvekela eyoolya khiyanvaha nluku?

¹⁰Wala anvekelaka ehopa, ananvaha enowa?

¹¹Munaamwi muri nyuwo ootakhala murima munnisuwela wavaha sooreera an'inyu, nto Atiith'inyu ari wirimu, awo khantepa waavaha sooreera ale anaavekela??

¹²Sothene sinoosivelani wiireliwa n'atthu akina, ni nyuwo-tho nwiireleke seiyo akhw'inyu. Okhala wira ikano sa Monse ni maprofeta sinruma siiso.

¹³Nvireke mukhora woophunyeya, okhala wira mukhora muulupale ni woowunnuwa ephiro enroiha woorimeelani, nave atthu anci-ene annivira yoowo.

¹⁴Okhala wira mukhora wophunyeya, ephiro yoorika enroiha w'ekumini, nave anvira ephiyo eyo, ari atthu vakhaani.

¹⁵?Mwipasoope ni maprofeta oowootha. Awo annoorweelani yiikhalihaka ntoko epwittipwitthi; nave murim'aya ori wootakhala ntoko miici.

¹⁶Munimwaasuwela ni soowiira saya, iwuuva sinnirukuliwa mmiiwani, wala ipheera sinnirukuliwa mukhuuwani?

¹⁷V'ekeekhayi, mwiri wooreera oniimma mihokorokho sooreera; nave mwiri woonanara oniima mihokorokho soonanara.

¹⁸Mwiri wooreera khoniima mihokorokho soonanara, nnakhala mwiri woonanara khoniima mihokorokho sooreera.

¹⁹Nto khula mwiri ohiniima mihokorokho sooreera onimwiikitthiwa, oriheliwe vamooroni

²⁰Nave-tho maprofeta oowootha awo munimwaasuwela wa mwaha wa soowira saya.?

²¹Kahiyo ole onikiirela ?Apwiya! Apwiya!? Onrowa okela Moomweneni wa Wirimu, nto onrowa okela t'ule oniira sintthun'aya Atiithi ari wirimu.

²²Naphiya nihiku nlo, atthu anci-ene anokiirela: ?Apwiya! Apwiya! Khanilaleiye hiyo mwa nsina nanyu? Ni-tho mwa nsina nanyu nenlo khinoomonle minepa sootakhala? Nave mwa nsina nanyu nenlo-tho khiniinre sootikiniha sinci-ene??

²³Vano miyo kinoowakhula wira: ?Miyo nkinoosuwelani! Mukhume va, nyuwo muniira sootakhala!?

²⁴Ole oniiwa moolumo ak'ala, oneettela, onlikana ni mutthu a miruku aatenke emp'awe vamwala.

²⁵Yaahirupa epula yinci-ene, miro khusareya mpakha ota, khwoopa epheyo yuulupale khusareya khuphwanya emp'eyo: Nto emp'eyo khiyaamonre, okhala wira eyo yaatekiwe va mwala.

²⁶Nave ole oniiwa masu ak'ala ohineettela, onlikana ni mutthu ohirina miruku, aatenke emp'awe vamihaava-ni.

²⁷Yaahirupa epula yinci-ene miro khusarya mpakha ota ni yahoopa epheyo yuulupale, khuphwanya emp'eyo, khumora ni khuhihala etthu yeemenle.

²⁸Nto Yesu vaamanly'awe olavula moolumo ale, atthu othene yaahitikinihiwa ni mwiixuttiho awe.

²⁹Okhala wira owo aaniwiixuttiha ntoko mwanene masu.